(ឥណ្ឌា)៖ ប៉ូលិសបាននិយាយថា បុរសម្នាក់ត្រូវបានជួយសង្គ្រោះ បន្ទាប់ពីជាប់នៅក្នុងជណ្តើរយន្តមន្ទីរពេទ្យនៅភាគខាងត្បូងប្រទេសឥណ្ឌាអស់រយៈពេលពីរថ្ងៃ។ ខណៈគ្រួសាររបស់បុរសរងគ្រោះ បានដាក់ពាក្យស្នើសុំស្វែងរកអ្នកបាត់ខ្លួនកាលពីថ្ងៃទី១៤ ខែកក្កដា បន្ទាប់ពីបានរកឃើញថាគាត់មិនបានត្រលប់មកផ្ទះវិញទេ។
Independent រាយការណ៍ថា កាលពីថ្ងៃទី១៣ ខែកក្កដា លោក Ravindran Nair អាយុ៥៩ឆ្នាំ បានបាត់ខ្លួនខណៈពេលដែលទៅពិនិត្យសុខភាព នៅមន្ទីរពេទ្យក្នុងរដ្ឋ Kerala ។
នៅថ្ងៃទី១៥ ខែកក្កដា គាត់ត្រូវបានជួយសង្គ្រោះហើយបាននិយាយថាគាត់បានជាប់គាំងនៅក្នុងជណ្តើរយន្តមន្ទីរពេទ្យកាលពីចុងសប្តាហ៍។ នាយកដ្ឋានសុខភាពរដ្ឋ Kerala បាននិយាយថា បុគ្គលិកបីនាក់នៅមន្ទីរពេទ្យត្រូវបានផ្អាកពីការងារដោយសារការធ្វេសប្រហែស។
បុរសជាជនរងគ្រោះបាននិយាយថា គាត់បានឡើងលើជណ្តើរយន្តដើម្បីទៅជាន់ទីមួយ ប៉ុន្តែបានអះអាងថា ជណ្តើរយន្តបានធ្លាក់ជាប់ ហើយទ្វារមិនអាចបើកបានទេ។ គាត់បាននិយាយថា គាត់បានស្រែកឲ្យគេជួយ ប៉ុន្តែគ្មានអ្នកណាមកជួយទេ។
ប៉ូលិសបាននិយាយថា ជណ្ដើរយន្តបានជាប់គាំង ហើយទូរស័ព្ទរបស់ Nair បានដាច់ ខណៈពេលដែលគាត់ព្យាយាមហៅរកជំនួយ។ មនុស្សម្នាក់នេះក៏បានចុចប៊ូតុងរោទិ៍របស់ជណ្តើរយន្ត ហើយហៅទៅសេវាសង្គ្រោះបន្ទាន់ ប៉ុន្តែមិនបានទទួលការឆ្លើយតបទេ។
ជនរងគ្រោះបន្តថា «ខ្ញុំបានព្យាយាមទូរស័ព្ទទៅលេខសង្គ្រោះបន្ទាន់ទាំងអស់ដែលមានរាយក្នុងជណ្តើរយន្ត ប៉ុន្តែគ្មាននរណាម្នាក់ឆ្លើយតបទេ។ សំឡេងរោទិ៍បានបន្លឺឡើង ប៉ុន្តែគ្មាននរណាម្នាក់មកជួយទេ។ មួយសន្ទុះក្រោយមក ខ្ញុំយល់ថាវាជាចុងសប្តាហ៍គ្មាននរណាធ្វើការ ហើយសម្រេចចិត្តនៅស្ងៀម ហើយរង់ចាំនៅក្នុងជណ្តើរយន្តតែម្តង»។
លោកបន្តថា ប៉ុន្តែមិនទាន់ដល់ព្រឹកថ្ងៃច័ន្ទទេ មានប្រតិបត្តិករម្នាក់បានរកឃើញគាត់ នៅពេលដែលគាត់មកថែទាំជាប្រចាំ។ លោក Nair បាននិយាយថា៖ «យើងទាំងពីរបានប្រើកម្លាំងដើម្បីបើកទ្វារពីភាគីទាំងសងខាង ហើយខ្ញុំបានលោតចេញពីទ្វារ»។
កូនប្រុសរបស់គាត់ឈ្មោះ Hari Shankar បាននិយាយថា ឪពុករបស់គាត់មានការតក់ស្លុតបន្ទាប់ពីហេតុការណ៍ដ៏រន្ធត់នេះ។ ប្រធាននាយកដ្ឋានសុខាភិបាលរដ្ឋ លោក Veena George បានស្នើឲ្យថ្នាក់គ្រប់គ្រងមន្ទីរពេទ្យធ្វើការស៊ើបអង្កេតលើឧបទ្ទវហេតុនេះ៕ ប្រភព៖ BBC NEWS
ចែករំលែកព័តមាននេះ