ខេត្តកំពង់ធំមានភ្នំប៉ុន្មាន? គ្មានឯកសារទេ ប៉ុន្តែមានភ្នំមាស
- កំពង់ធំ
ខេត្តកំពង់ធំ ៖ កំពង់ធំ គឺជាខេត្តមួយមាន ភូមិសាស្រ្តនៅចំកណ្តាលព្រះរាជាណាចក្រកម្ពុជា មាន
ខេត្តកំពង់ធំ ៖ កំពង់ធំ គឺជាខេត្តមួយមាន ភូមិសាស្រ្តនៅចំកណ្តាលព្រះរាជាណាចក្រកម្ពុជា មានក្រុង១ និងស្រុកចំនួន៨ រួមមាន ៖
១-ក្រុងស្ទឹងសែន
២-ស្រុកកំពង់ស្វាយ
៣-ស្រុកប្រាសាទសំបូរ
៤-ស្រុកសណ្តាន់
៥-ស្រុកប្រាសាទបល្ល័ង្ក
៦-ស្រុកស្ទោង
៧-ស្រុកសន្ទុក
៨-ស្រុកបារាយណ៍
៩-ស្រុកតាំងគោក ដែលជាស្រុកមួយទើបតែបង្កើតថ្មី ។
តើនៅខេត្តកំពង់ធំ មានភ្នំចំនួនប៉ុន្មាន ? នោះគឺជាការលំបាកដោយសារតែសួរនាំទៅមន្ទីរបរិស្ថានខេត្តលោកថាអត់ដឹងមានភ្នំប៉ុន្មានទេ និងប្រាប់ថាឱ្យសួរទៅមន្ទីរទេសចរណ៍វិញគេដឹងច្បាស់ ។ លុះពេលសួរនាំទៅខាងមន្ទីរទេសចរណ៍លោកក៏ប្រាប់ថាអត់ដឹងច្បាស់ដែរទេ រឿងភ្នំមានចំនួនប៉ុន្មាននោះ ព្រមទាំងឱ្យសួរទៅខាងមន្ទីររ៉ែ និងថាមពលខេត្តវិញ ក្រែងលោគេដឹងច្បាស់ ។ អ្នកយកព័ត៌មានយើង ក៏ទូរស័ព្ទសាកសួរទៅខាងមន្ទីររ៉ែ និងថាមពលខេត្តទៀត តែចម្លើយក៏មិនខុសពីខាងមន្ទីរជំនាញមុនៗដែរ គឺអត់ដឹងច្បាស់ទេរឿងភ្នំហ្នឹង គ្មានមន្ទីរណាចាប់អារម្មណ៍ទេ ។
ចំណែកខាងមន្ត្រីអាជ្ញាធរវិញ បានឲ្យដឹងថា នៅខេត្តកំពង់ធំមានស្រុកតិចតួចណាស់ដែលជាតំបន់ភ្នំ ក្នុងនោះស្រុកដែលមានភ្នំស្រស់ស្អាតជាទីគួរឱ្យចាប់អារម្មណ៍និងជាតំបន់មានសក្តានុពលផ្នែកទេចរណ៍ផងនោះគឺភ្នំសន្ទុក ។
លោក សន វឿន អភិបាលរងស្រុកសន្ទុកបានឱ្យដឹងថា នៅក្នុងទឹកដីនៃស្រុកសន្ទុក មានរមណីយដ្ឋានភ្នំសន្ទុកមួយជាតំបន់ទេសចរណ៍ដែលអាចទាក់ទាញភ្ញៀវជាតិ-អន្តរជាតិមកទស្សនាកម្សាន្តជារៀងរាល់ថ្ងៃ ជាពិសេសនៅថ្ងៃសៅរ៍ថ្ងៃអាទិត្យ និងថ្ងៃបុណ្យធំៗ ដូចជាបុណ្យចូលឆ្នាំថ្មីប្រពៃណីជាតិ និងបុណ្យភ្ជុំបិណ្ឌជាដើម ។
លោកបន្តថា ស្រុកសន្ទុកក្រៅអំពីភ្នំសន្ទុក នៅមានភ្នំតូចៗ២ទៀត ស្ថិតនៅទិសឦសានភ្នំសន្ទុកបន្តិច គឺភ្នំត្បែងស្រះខ្ចៅ និងភ្នំពែនជុំ ដែលមានទេសភាពស្រស់ស្អាតបែបធម្មជាតិពិតៗ ។ ភ្នំទាំងអស់នេះស្ថិតនៅប៉ែកខាងកើតផ្លូវជាតិលេខ៦ ។ បើបងប្អូនធ្វើដំណើរមកពីរាជធានីភ្នំពេញ តាមផ្លូវជាតិលេខ៦ ចម្ងាយប្រហែលជាង១៤០គីឡូម៉ែត្រ ឆ្លងកាត់ទីរួមស្រុកសន្ទុកប្រហែល១០គីឡូម៉ែត្រ ក្រឡេកមើលទៅខាងស្តាំដៃ នោះនឹងបានគយគន់មើលរូបរាងដ៏ស្រស់ស្អាតនៃភ្នំទាំងបីខាងលើនេះពីចម្ងាយជាក់ជាពុំខាន ។
ក្រៅពីពីនោះ ក៏មានភ្ញៀវជាតិ-អន្តរជាតិមួយចំនួន ដែលបានធ្វើដំណើរឆ្លងកាត់ទឹកដីស្រុកសន្ទុក ចូលទៅទស្សនាកម្សាន្តនៅរមណីយដ្ឋានភ្នំសន្ទុក ដែលពោរពេញទៅដោយសម្បត្តិវប្បធម៌ និងអបិយជំនឿនានាជាច្រើនរាប់មិនអស់ ដែលកប់ទុកនៅរមណីយដ្ឋាននេះផងដែរ ។
នៅស្រុកសណ្តាន់ បើតាមលោក ស៊ិន វណ្ណវុឌ្ឍ អភិបាលស្រុក ថ្លែងថា នៅឃុំសុចិត្រ នៃស្រុកសណ្តាន់ មានភ្នំមួយឈ្មោះថា «ភ្នំជី» ។ ភ្នំជីគឺជាភ្នំមួយដែលពោរពេញទៅដោយសម្បត្តិធម្មជាតិពិតៗ មានព្រៃឈើនិងរ៉ែមាស និងមានវត្តមួយនៅលើកំពូលភ្នំ ។ មិនតែប៉ុណ្ណោះ នៅតាមតំបន់នានានៅជើងភ្នំនេះ សម្បូរទៅដោយរ៉ែមាស ដែលបងប្អូនប្រជាពលរដ្ឋនៅក្នុងស្រុក ក៏ដូចជាក្រៅស្រុកមួយចំនួន បាននាំគ្នាមកប្រកបរបរជីករែងមាសនៅទីនេះផងដែរ ដែលអាចរកកម្រៃបានខ្លះៗក្នុងការចិញ្ចឹមជីវិត ។ ក្រៅពីនេះ នៅក្បែរភ្នំជីក៏មានកូនភ្នំតូចៗដែរ តែមិនមានឈ្មោះហៅឱ្យប្រាកដនោះទេ ។
ក្រៅពីបងប្អូនប្រជាពលរដ្ឋយើងនាំគ្នាទៅប្រកបរបរជីកមាសនៅទីនោះ ក៏មានក្រុមហ៊ុនចិន
ចំនួន២ គឺក្រុមហ៊ុន K88 និងក្រុមហ៊ុន ឡេត ចេង(Late Cheng) កំពុងធ្វើសកម្មភាពជីកកកាយយករ៉ែមាសនៅទីនោះ ដោយប្រើប្រាស់សុទ្ធតែម៉ាស៊ីន និងគ្រឿងចក្រទំនើបៗផងដែរ ។
បច្ចុប្បន្ន ក្រុមហ៊ុនទាំង២នេះកំពុងធ្វើអាជីវកម្មរុករកខ្នាតតូចៗនៅឡើយនោះទេ តែថ្ងៃក្រោយគេអាចពង្រីកខ្នាតអាជីវកម្មរបស់គេធំប៉ុនណានោះ លោកក៏មិនបានដឹងមុនដែរ ក្នុងនោះខាងក្រុមហ៊ុនបានបង់វិភាគទានចូលរដ្ឋ ហើយក៏បានជួយកសាងផ្លូវខ្លះៗដែរសម្រាប់សម្រួលដល់ការធ្វើដំណើរ ។
សូមកុំយល់ច្រឡំថា ស្រុកសណ្តាន់គឺជាស្រុកមួយដែលសម្បូរទៅដោយម្ជូរសណ្តាន់ឱ្យសោះណា ការពិតគឺជាស្រុកមួយដែលមានសក្តានុពលពោរពេញទៅដោយសម្បត្តិធម្មជាតិដ៏មានតម្លៃមិនអាចកាត់ថ្លៃបាន មានដូចជា ព្រៃឡង់ ព្រៃអង់តែន និងរ៉ែមាស ដែលកំពុងរងនូវការបំផ្លិចបំផ្លាញពីបុគ្គលមួយចំនួនតូច និងក្រុមឧក្រិដ្ឋជនបំផ្លាញព្រៃឈើផងដែរ រួមទាំងរ៉ែមាសនៅក្នុងដីគួរឱ្យសោកស្តាយ ដែលសម្បត្តិធនធានធម្មជាតិរបស់ខ្មែរត្រូវបានរងនូវការបំផ្លិចបំផ្លាញ ។
ចំណែកកូនភ្នំដ៏តូចច្រឡឹងមួយទៀតដែលស្ថិតនៅលើផ្ទៃទឹកទន្លេសាប ត្រូវបានលោក យ៉ាន់ វិសាក់ នាយផ្នែករដ្ឋបាលជលផលផាត់សណ្តាយ ប្រាប់ថា ភ្នំនោះមានឈ្មោះថា ភ្នំជីមូស ដែលនៅឆ្ងាយដាច់ស្រយាលពីគេឯង ស្ថិតនៅក្នុងឃុំផាត់សណ្តាយ ស្រុកកំពង់ស្វាយ ។ ភ្នំនេះមានទំហំតូច មានវត្ត និងព្រះវិហាក៏តូចមួយហាក់ដូចជាកំពុងតែអណ្តែតនៅលើផ្ទៃទឹកទន្លេនារដូវវស្សា ។
បើពុទ្ធបរិស័ទចង់ទៅកាន់វត្តនោះ ត្រូវធ្វើដំណើរតាមទូក ឬកាណូតទើបទៅដល់ ដោយសារតែវត្តដ៏កម្សត់នេះនៅឆ្ងាយពីទីប្រជុំជនផងនោះ ។ ផ្លូវធ្វើដំណើរទៅមកក៏ពិបាក ទើបធ្វើឱ្យព្រះសង្ឃដែលគង់នៅទីនោះ ពុំសូវសម្បូរចង្ហាន់ឆាន់ប៉ុន្មានទេ ហាក់ដូចជាកូនកោះមួយនៅលើផ្ទៃទឹកដូច្នោះ ហើយម្តងម្កាលព្រះសង្ឃដែលគង់នៅទីនោះតែងតែខ្វះខាត ៕
ចែករំលែកព័តមាននេះ