រាជធានីភ្នំពេញ ៖ អង្គការ មូលនិធិថែទាំសុខភាពអ្នកជំងឺអេដស៍ (AHF) រៀបចំព្រឹត្តិការណ៍មួយនៅអនុវិទ្យាល័យគោកបញ្ជាន់ដើម្បីបញ្ជាក់អំពីសារៈសំខាន់ នៃការកាត់បន្ថយការរើសអើងអំឡុងពេលមករដូវ ។ ដើម្បីប្រារព្ធទិវាសុខភាពពេលមករដូវ (MHD)…
រាជធានីភ្នំពេញ ៖ អង្គការ មូលនិធិថែទាំសុខភាពអ្នកជំងឺអេដស៍ (AHF) រៀបចំព្រឹត្តិការណ៍មួយនៅអនុវិទ្យាល័យគោកបញ្ជាន់ដើម្បីបញ្ជាក់អំពីសារៈសំខាន់ នៃការកាត់បន្ថយការរើសអើងអំឡុងពេលមករដូវ ។
ដើម្បីប្រារព្ធទិវាសុខភាពពេលមករដូវ (MHD) លោកវេជ្ជបណ្ឌិត ចន ផាន់ណា ប្រធានគ្រប់គ្រងកម្មវិធីប្រចាំប្រទេស នៃអង្គការមូលនិធិថែទាំសុខភាពអ្នកជំងឺអេដស៍ (AHF) កម្ពុជា បានមានប្រសាសន៍ថា AHFបានរៀបចំព្រឹត្តិការណ៍រំលឹកជាកិត្តិយសមួយ នៅអនុវិទ្យាល័យគោកបញ្ជាន់សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី២៣ ខែឧសភា ឆ្នាំ២០២៦ ដើម្បីបញ្ជាក់អំពីសារៈសំខាន់ នៃការកាត់បន្ថយការរើសអើង អំឡុងពេលមករដូវ និងលើកកម្ពស់ការទទួលបានសម្ភារៈបរិក្ខារ ដែលមានសុវត្ថិភាព ស្អាត និងសំឡីអនាម័យឥតគិតថ្លៃ ឬមានតម្លៃសមរម្យសម្រាប់តម្រូវការ រួមទាំងវិធានការសំខាន់ៗក្នុងការការពារសុខភាពទូទៅ និងកាត់បន្ថយភាពងាយរងគ្រោះចំពោះមេរោគអេដស៍ និងការឆ្លងមេរោគផ្លូវភេទផ្សេងទៀត។ទិវាសុខភាពពេលមករដូវត្រូវបានប្រារព្ធជារៀងរាល់ឆ្នាំនៅថ្ងៃទី២៨ ខែឧសភា ។
ឆ្នាំនេះ អង្គការមូលនិធិថែទាំសុខភាពអ្នកជំងឺអេដស៍កម្ពុជា បានរៀបចំទិវាសុខភាពពេលមករដូវដោយសហការជាមួយមន្ទីរអប់រំ យុវជន និងកីឡារាជធានីភ្នំពេញ អាជ្ញាធរមូលដ្ឋាន នាយកសាលា គ្រូបង្រៀន និងសិស្សានុសិស្សចំនួន ៣០០នាក់ ចូលរួមក្នុងព្រឹត្តិការណ៍អបអរសាទរ និងស្វែងរកបរិយាកាសគាំទ្រចំពោះសុខភាព អំឡុងពេលមករដូវរបស់ក្មេងស្រី ជាពិសេសក្នុងវ័យសិក្សា ។
លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ីរបស់ អង្គការ AHF បានមានប្រសាសន៍ថា ៖ «នៅក្នុងតំបន់ជាច្រើន នៃទ្វីបអាស៊ី ការរើសអើង និងភាពស្ងៀមស្ងាត់ជុំវិញការមករដូវនៅតែបន្តជាឧបសគ្គក្នុងការទទួលបានផលិតផលសម្រាប់មករដូវ និងព័ត៌មានសុខភាពសំខាន់ៗ។ នៅពេល ដែលមនុស្សមិនអាចគ្រប់គ្រងដោយសុវត្ថិភាពចំពោះការមករដូវរបស់ពួកគេបាន គឺជាផលវិបាកដល់សុខភាព នឹងសុវត្ថិភាព និងធ្វើឱ្យពួកគេទទួលភាពងាយរងគ្រោះចំពោះមេរោគអេដស៍ និងជំងឺកាមរោគផ្សេងទៀត។ ទិវាសុខភាពពេលមករដូវគឺជាការរំលឹកថា ការលើកកម្ពស់ការទទួលបាន ការអប់រំ និងការពិភាក្សាដ៏ទូលំទូលាយ មានសារៈសំខាន់ណាស់ក្នុងការការពារសុខភាពបុគ្គល និងសាធារណៈ។ ប្រទេសអាស៊ីជាច្រើនដែលបានលុបចោលពន្ធលើផលិតផលសម្រាប់ការមករដូវ កំពុងជួយពង្រីកលទ្ធភាពទទួលបានសម្ភារៈបរិក្ខារ និងការប្រើប្រាស់សម្រាប់ពេលមករដូវ។ អង្គការ AHF សូមលើកទឹកចិត្តឱ្យប្រទេសដទៃទៀតជាច្រើន គួរតែលុបចោលពន្ធលើផលិតផលសម្រាប់ការមករដូវ »។
នៅទូទាំងពិភពលោក ប្រជាជនជិត២ពាន់លាននាក់មករដូវ ដែលក្នុងនោះ ៥០០លាននាក់កំពុងជួបប្រទះនឹងភាពក្រីក្រនៅពេលមករដូវ រួមទាំងកង្វះផលិតផលគ្រប់គ្រាន់ គ្រឿងបរិក្ខារ និងបរិយាកាសគាំទ្រ។ បញ្ហាប្រឈមទាំងនេះអាចនាំឱ្យមានការខកខានទៅសាលារៀន ឬការងារ ភាពងាយរងគ្រោះផ្នែកសេដ្ឋកិច្ច និងក្នុងករណីខ្លះ ការពឹងផ្អែកលើទំនាក់ទំនងផ្លូវភេទ ឬទំនាក់ទំនងដែលមានភាពខុសគ្នានៃអាយុយ៉ាងច្រើន ដែលកាត់បន្ថយសមត្ថភាពក្នុងការចរចាការរួមភេទដែលមានសុវត្ថិភាព និងបង្កើនហានិភ័យនៃមេរោគអេដស៍ និងជំងឺកាមរោគផ្សេងទៀត។
អង្គការ AHF សូមកោតសរសើរប្រទេសដែលបានកាត់បន្ថយ ឬលុបបំបាត់ពន្ធលើផលិតផលសម្រាប់មករដូវ ហើយជំរុញឱ្យទូទាំងពិភពលោកធានាបានដូចគ្នា ដើម្បីធានាលទ្ធភាពទទួលបាន និងប្រើប្រាស់សម្រាប់តម្រូវការ។
លើសពីនេះទៅទៀត ការរើសអើង និងភាពមិនអើពើរជុំវិញការមករដូវនៅតែជាឧបសគ្គចម្បង។ នៅក្នុងសហគមន៍ជាច្រើន ការហាមឃាត់រារាំងការពិភាក្សាដោយបើកចំហ ការទទួលបានព័ត៌មានសុខភាពផ្លូវភេទ និងសុខភាពបន្តពូជមិនទាន់គ្រប់គ្រាន់ត្រឹមត្រូវ និងបំបាក់ទឹកចិត្តមនុស្សពីការស្វែងរកការថែទាំ។ ការដោះស្រាយបញ្ហាសុខភាពរដូវត្រូវតែដើរទន្ទឹមគ្នាជាមួយនឹងកិច្ចខិតខំប្រឹងប្រែងដើម្បីធ្វើឱ្យការមករដូវជាលក្ខណៈធម្មតា ពង្រីកការទទួលបានសេវាកម្មសំខាន់ៗ រួមទាំងការបង្ការការឆ្លងមេរោគអេដស៍ការធ្វើតេស្ត និងការព្យាបាល ជាមួយនឹងការធានាឱ្យបានមនុស្សគ្រប់គ្នាអាចគ្រប់គ្រងសុខភាពរបស់ពួកគេបានដោយសុវត្ថិភាព ដោយសេចក្តីថ្លៃថ្នូរ និងដោយគ្មានការភ័យខ្លាច ឬការរើសអើង។
អង្គការ AHFគាំទ្រដល់ស្ត្រី និងក្មេងស្រី និងស្ត្រីវ័យក្មេងតាមរយៈកម្មវិធីផ្តល់ភាពអង់អាចដល់ក្មេងស្រី ដែលធ្វើការសម្រាប់ក្មេងស្រីនៅក្នុងសហគមន៍ ក្មេងស្រីដែលរងគ្រោះ និងក្មេងស្រីដែលងាយរកគ្រោះដទៃទៀត។
លោក សាំង សុផល ប្រធានការិយា ល័យសុខភាពសិក្សានៃមន្ទីរអប់រំ យុវជន និងកីឡា រាជធានីភ្នំពេញ បានលើកឡើងថា រាជរដ្ឋាភិបាលអាណត្តិថ្មី ក្រោមការដឹកនាំដ៏សកម្មរបស់ សម្តេចមធិបតី ហ៊ុន ម៉ាណែ ត នាយករដ្ឋមន្ត្រីកម្ពុជា មានគោលនយោបាយច្បាស់ លាស់ នៅតែបន្តពង្រឹង និងអនុវត្ត ហើយការផ្តល់ អាទិភាពដល់ស្ត្រីនៅតាមគ្រប់ក្រសួង ស្ថាប័នរដ្ឋ ព្រមទាំងវិធាន ការនានា សំដៅដោះស្រាយបញ្ហាប្រឈម របស់ស្ត្រី ។
ក្រសួងអប់រំ យុវជន និងកីឡា បានធ្វើការដឹកនាំ គ្រប់គ្រង និងសម្រប សម្រួល ជំរុញឱ្យមានការ ចូលរួមគ្រប់អ្នកពាក់ព័ន្ធ តាំងពីថ្នាក់ជាតិរហូតដល់ថ្នាក់ក្រោមជាតិ ដែលរួមមាន គណៈកម្មាធិការសុខភាព តាមស្ថាប័ន រាជធានីខេត្ត ស្រុក ខណ្ឌ និងឃុំ សង្កាត់ ទូទាំងប្រទេស រួមជាមួយដៃគូអភិវឌ្ឍន៍ជាតិ អន្តរជាតិ សង្គមស៊ីវិលដើម្បីពង្រឹងលើកកម្ពស់សុខភាពស្ត្រីនិងក្មេងស្រី។
ទិវាក្មេងស្រីអន្តរជាតិនាឱកាសនេះ យើងទាំងអស់គ្នា សូមអបអរសាទរ និងមានមោទនភាពក្នុងការ ចូលរួមចំណែក ស្វែងរកការគាំទ្រ និងដំណោះស្រាយ គ្រប់គ្រងសុខភាព ការអប់រំសុខភាពបន្តពូជដែលសម ស្របតាមវ័យ និងពង្រឹងពីសារៈសំខាន់នៃក្មេងស្រីដែលកំពុងចូលរៀន ចៀសវាងការឆ្លងមេរោគអេដស៍ ការមានផ្ទៃពោះដោយមិនបានគ្រោងទុក ការកសាងជំនាញបំណិនជីវិត និងបញ្ហាសំខាន់ៗផ្សេងទៀតដែល ប៉ះពាល់ដល់សុខភាពរបស់ពួកគេ ។
ជាមួយគ្នានេះ លោក គីម ប៊ុនធី នាយកសាលាអនុវិទ្យាល័យគោកបញ្ជាន់ បានឱ្យដឹងថា នៅអនុវិទ្យាល័យគោកបញ្ជាន់ ក៏មានបង្កើតគណៈកម្មាការសុខភាពផងដែរ ដោយបានយកចិត្តទុកដាក់ដល់សុខភាពមករដូវដល់សិស្សស្រីនៅពេលមករៀននៅសាលាគឺយើងមានសំឡីអនាម័យ តម្កល់ទុកក្នុងប្រអប់សុខភាព ទុកឱ្យសិស្សមកយកប្រើកុំឱ្យអវត្តមានសិក្សាពេលមករដូវ ។
នាយកសាលាបញ្ជាក់ថា មុនដំបូងសំឡីអនាម័យនេះ គណៈកម្មការសុខភាពសាលាបានទិញយកមកតម្កល់ទុកឲ្យសិស្សប្រើ ប្រាស់ ក្រោយមកបានអង្គការយើងនេះបានមកផ្សព្វផ្សាយហើយបានចែកឲ្យសិស្សប្រើប្រាស់ និងបានប្រគល់ មកសាលាតម្កល់ទុកឱ្យសិស្សនៅពេលមានមករដូវមកយកទៅប្រើប្រាស់ ។
ព្រឹត្តិការណ៍ ទិវាសុខភាពក្មេងស្រីអន្តរជាតិមានសារៈសំខាន់ណាស់ក្នុងការលើកកម្ពស់ ការអប់រំសុខភាពបន្តពូជដ៏ទូលំទូលាយ និងសមភាពយេនឌ័រ ការយល់ដឹង និងជួយក្មេង ស្រីឱ្យរស់នៅមានសុខភាពល្អដែលអាចឲ្យពួកគេបានចូលរៀននិងផ្តល់សិទ្ធិគ្រប់គ្រងជីវិតរបស់ពួកគាត់ ៕
ចែករំលែកព័តមាននេះ