មេភូមិស្បថថា មិនបានយកប្រាក់ជាថ្នូរឱ្យផ្ទះស្នាក់នៅទេ
- បន្ទាយមានជ័យ
ខេត្តបន្ទាយមានជ័យ ៖ លោកមេភូមិសាមគ្គី ត្រូវបានគេតម្រូវឱ្យស្បថនៅចំពោះមុខប្រជាពលរដ្ឋថា លោកមិនបានទទួលលុយមួយលានប្រាំសែនរៀល ជាថ្នូរឱ្យផ្ទះ១ខ្នងនៅតំបន់ភៀសសឹក ដូចបណ្តាញសង្គមបានផ្សាយចោទប្រកាន់ឡើយ ។ សម្បថនេះ បានធ្វើឡើងនៅថ្ងៃទី១៥ ខែកក្កដា ឆ្នាំ២០២៦ នៅស្នាក់ការភូមិសាមគ្គី ដែលស្ថិតនៅក្នុងភូមិរង់ចាំ ឃុំស្លក្រាម ស្រុកស្វាយចេក តំបន់ជនភៀសសឹក ។
ក្នុងពិធីនេះ ក៏មានវត្តមានឯកឧត្តមទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា និងលោក ឃ្លូក នួយ អភិបាលរងខេត្តបន្ទាយមានជ័យ តំណាងឱ្យឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងក្រុមការងារថ្នាក់ជាតិ និងខេត្ត ស្រុក ក្រុង ជាច្រើនរូបទៀតចូរួមដឹងឮ ។
ឯកឧត្តមទេសរដ្ឋមន្ត្រី គន់ គីម មានប្រសាសន៍ថា ព័ត៌មានបានផ្សព្វផ្សាយចោទប្រកាន់លោក ជា តយ មេភូមិសាមគ្គីថា យកលុយពីប្រជាពលរដ្ឋ២នាក់ប្តីប្រពន្ធ ជាជនពិការជាថ្នូរឱ្យផ្ទះ១ខ្នងចំនួន១លាន៥សែនរៀល ។ ដើម្បីឱ្យលោកមេភូមិបកស្រាយឱ្យបានច្បាស់ ជូនប្រជាពលរដ្ឋបានដឹង តើការពិត ឬយ៉ាងណា ?
លោក ជា តយ មេភូមិសាមគ្គីបានបញ្ជាក់ថា រឿងព័ត៌មានបានផ្សាយចោទប្រកាន់ថាលោកយកលុយជាថ្នូរផ្ទះ១ខ្នងនោះ គឺលោកបាននិយាយជាមួយគ្រួសារជនពិការ២នាក់ប្តីប្រពន្ធ ដែលទើបត្រឡប់ពីធ្វើការនៅប្រទេសថៃ ដោយលោកបានបញ្ជាក់ថា ទោះជាមានលុយ១លានរៀល ឬ១លាន៥សែនរៀល ក៏គាត់គ្មានផ្ទះឱ្យដែរ ព្រោះគាត់គ្មានសិទ្ធិបែងចែក និងប្រគល់ជូនទេ គ្រាន់តែទទួលពាក្យដើម្បីស្នើសុំ និងទៅសិក្សាឱ្យច្បាស់លាស់ថា តើប្រជាពលរដ្ឋរស់នៅក្នុងមូលដ្ឋានពិតប្រាកដ ទើបថ្នាក់លើប្រគល់ជូន ។
លោកបានស្បថចំពោះមុខប្រជាពលរដ្ឋថា លោកមានកូន៧នាក់ និងចៅជាង២០នាក់ បើសិនជាលោកបានយកលុយ១លានរៀល ឬ១លាន៥សែនរៀល ពីប្រជាពលរដ្ឋណាមួយជាថ្នូរចែកផ្ទះ១ខ្នង សុំឱ្យរន្ទះបាញ់ទាំងពូជ ព្រោះផ្ទះសម្រាប់ជនភៀសសឹកនៅភូមិរង់ចាំ លោកគ្មានសិទ្ធិបែងចែកឡើយ តែមានសិទ្ធិធ្វើរបាយការណ៍ស្នើសុំទៅថ្នាក់លើ ដើម្បីប្រគល់ជូនសម្រាប់ប្រជាពលរដ្ឋរស់នៅជាក់ស្តែង ក្នុងតំបន់ដែលភាគីថៃហ៊ុមព័ន្ធយកលំនៅឋានប៉ុណ្ណោះ ។
ឯកឧត្តមទេសរដ្ឋមន្ត្រី គន់ គីម បានបញ្ជាក់ថា បងប្អូនប្រជាពលរដ្ឋបានស្គាល់មេភូមិរបស់ខ្លួនច្បាស់ហើយ ទាំងគាត់បានស្បថស្បែរជូនដល់ប្រជាពលរដ្ឋ ហើយថារាល់ព័ត៌មានក្នុងបណ្តាញសង្គម បានផ្សព្វផ្សាយចោទប្រកាន់លោក ជា តយ មេភូមិសាមគ្គី គឺគ្មានការពិតឡើយ ជាការមួលបង្កាច់ ដែលជាព័ត៌មានមិនពិត ធ្វើឱ្យប៉ះពាល់កិត្តិយសសង្គម ។
ឯកឧត្តមបានបញ្ជាក់ថា នៅពេលដែលជម្លោះព្រំដែន ទាហានថៃបានឈ្លានពានបូរណភាពទឹកដីកម្ពុជា បានប្រើប្រាស់អាវុធមានទម្លាក់គ្រាប់ពីលើយន្តហោះ និងគ្រាប់ផ្លោងបណ្តាលឱ្យប្រជាពលរដ្ឋស្លូតត្រង់ស្លាប់ និងរបួស ត្រូវបានជម្លៀសចេញពីលំនៅឋាន ហើយត្រូវបានទាហានថៃយកលួសបន្លា និងកុងតឺន័រហ៊ុមព័ទ្ធយកលំនៅឋានប្រជាពលរដ្ឋចំនួន៦ភូមិមាន២ភូមិក្នុងឃុំអូរបីជាន់ ស្រុកអូរជ្រៅ និង៤ភូមិនៅឃុំគោករមៀត ស្រុកថ្មពួក ។
ឯកឧត្តម គន់ គីម បានបញ្ជាក់ថា ជាការយកចិត្តទុកដាក់ពីប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានកសាងលំនៅឋានបណ្តោះអាសន្ន រហូតពេលនេះបានចំនួន ៣ ៣១៨ខ្នងផ្ទះ និងជនភៀសសឹកបានចូលរស់នៅជាង ៣ ០០០គ្រួសារ ហើយមានភ្លើង ទឹក សាលារៀន និងផ្សារ សម្រាប់បងប្អូនប្រជាពលរដ្ឋដែលរស់នៅភូមិរង់ចាំនេះ ៕
ចែករំលែកព័តមាននេះ