ខេត្តព្រះវិហារ ៖ កាលពីពី្រកថ្ងៃទី១២ មិថុនាកន្លងទៅនេះ នៅភូមិសែនជ័យក្បែរជើងភ្នំដងរែក ស្ថិតក្នុងឃុំកន្ទួត ស្រុកជាំក្សាន្ដ មានរៀបចំពិធីប្រគល់លំនៅឋាន និងសំភារប្រើប្រាស់មួយចំនួនធំដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជាហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា
ខេត្តព្រះវិហារ ៖ កាលពីពី្រកថ្ងៃទី១២ មិថុនាកន្លងទៅនេះ នៅភូមិសែនជ័យក្បែរជើងភ្នំដងរែក ស្ថិតក្នុងឃុំកន្ទួត ស្រុកជាំក្សាន្ដ មានរៀបចំពិធីប្រគល់លំនៅឋាន និងសំភារប្រើប្រាស់មួយចំនួនធំដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជាហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនដល់យោធិនដែលនៅសមរភូមិជួរមុខនៃតំបន់ប្រាសាទព្រះវិហារ ។
ពិធីនោះស្ថិតក្រោមអធិបតីភាពលោកនាយឧត្ដមសេនីយ៍ នាង ផាត រដ្ឋលេខាធិការក្រសួងការពារជាតិ ដែលមានការចូលរួមដោយលោកឧត្ដមសេនីយ៍ឯក ស្រី ឌឹក ទីប្រឹក្សាផ្ទាល់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា នាយរងសេនាធិការចម្រុះ ជាមេបញ្ជាការកងពលធំអន្ដរាគមន៍លេខ៣ និងជាគណៈមេបញ្ជាការឯកភាពសមរភូមិជួរមុខទិសទី១ប្រាសាទព្រះវិហារ។ វត្ដមានចូលរួមនាឱកាសនោះផងដែរមានបណ្ដានាយទាហាន នាយទាហានរង និងពលទាហាន ព្រមទាំងគ្រួសារកងទ័ពដែលរស់នៅក្នុងភូមិសែនជ័យផងដែរ ។
លោកឧត្ដមសេនីយ៍ឯក ស្រី ឌឹកបានពាំនាំប្រសាសន៍ផ្ដាំផ្ញើសាកសួរសុខទុក្ខពីសម្ដេច តេជោ ហ៊ុន សែន និងលោកជំទាវ ដែលគ្រប់ពេលវេលាតែងតែបានយកចិត្ដទុកដាក់ដល់ការរស់នៅរបស់កងទ័ព និងគ្រួសារកងទ័ព ។ ជាក់ស្តែងពេលនោះអំណោយដ៏ថ្លៃថ្លារបស់សម្ដេចតេជោហ៊ុនសែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ត្រូវបានប្រគល់ជូនដល់យោធិន ឈ្មោះញ៉ែម ផល្លា នៅក្នុងកងឯកភាពលេខ៣៧៤ នៃកងពលតូចអន្ដរាគមន៍លេខ៧ ដែលកំពុងឈរជើងនៅខ្សែត្រៀមជួរមុខក្នុងតំបន់ប្រាសាទព្រះវិហារ។ យោធិនរូបនេះមានស្នាដៃឆ្នើមក្នុងការការពារបូរណភាពទឹកដី តែកន្លងមកនេះដោយគ្រួសារយោធិន ឈ្មោះញ៉ែម ផល្លា បានជួបភាពខ្វះខាតយ៉ាងខ្លាំងក្នុងជីវភាពរស់នៅដោយមានកូន៦នាក់ ម្នាក់បានចូលបម្រើក្នុងជួរកងទ័ពកំពុងឈរជើងនៅខ្សែត្រៀមជួរមុខ ២នាក់ទៀតបានផ្ញើឱ្យមជ្ឈមណ្ឌលកុមាកំព្រានៅភ្នំពេញជួយចិញ្ចឹម និងនៅក្នុងបន្ទុកគ្រួសារចំនួន៣នាក់ដែលពេលនេះកំពុងជួបការលំបាក ។
លោកនាយឧត្ដមសេនីយ៍ នាង ផាត បានមានប្រសាសន៍សំណេះសំណាលទៅកាន់យោធិន ញ៉ែម ផល្លា ព្រមទាំងក្រុមគ្រួសារថា នេះជាមោទនភាពមួយដែលបានការយកចិត្តទុកដាក់ពីប្រមុខដឹកនាំនៃរាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាអគ្គភស្តុភារជាន់ខ្ពស់នៃកងកម្លាំងកម្ពុជាដែលគ្រប់ពេលវេលាសម្តេចតែងតែបានយកចិត្តទុកដាក់ក្នុងជីវភាពរស់នៅរបស់កងទ័ព និងគ្រួសារកងទ័ព ។ លោកនាយឧត្តមសេនីយ៍បានផ្តាំផ្ញើទៅដល់យោធិនញ៉ែម ផល្លា ព្រមទាំងក្រុមគ្រួសារថា ចាប់ពីពេលនេះតទៅត្រូវមានសុទិដ្ឋិនិយមក្នុងជីវិតជាដរាបចំពោះសម្ដេចតេជោហ៊ុន សែន ជាប្រមុខដឹកនាំ ។
អំណោយដ៏ថ្លៃថ្លាដែលត្រូវផ្តល់ជូននេះ រួមមានផ្ទះក្បឿង១ខ្នងទំហំ៦,៥ម៉ែត្រ×៧,៥ម៉ែត្រ ដែលសង់ឡើងនៅលើផ្ទៃដីទំហំ៧០ម៉ែត្រ×១០០ម៉ែត្រ និងសម្ភារមួយចំនួនធំទៀត ដែលជាអំណោយរបស់សម្ដេចតេជោ ហ៊ុន សែន និងលោកជំទាវកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈលោកឧត្ដមសេនីយ៍ឯក ស្រី ឌឹក និងលោកជំទាវ ចាន់ សាមី ជាភរិយា រួមមាន ៖កន្ទេល២, មុង២, ភួយ១, ធុងដាក់ទឹកចំណុះ៦០លីត្រ១, កំសៀវដាំទឹក១, កាធុនជ័រ២, ឆ្នាំងដាំ ស្ល២, ខ្ទះឆា១, វែកឆា១, វែកសម្ល១, ស្លាបព្រាហូបបាយ១២, ចានបាយ១០, ចានសម្ល២, ចានចង្កឹះ១០ ប៊ីចេង១គីឡូក្រាម, ទឹកស៊ីអ៊ីវ១យួរ, ទឹកត្រី១យួរ, ត្រីខកំប៉ុង១យួរ, មី១កេស, នំ១ធុង, អង្ករ២បាវ, កូនជ្រូកសម្រាប់ចិញ្ចឹម២ក្បាល, មាន់សម្រាប់ចិញ្ចឹម៥ក្បាល, ថវិកា៥០ម៉ឺនរៀល, ពូជដូង២០ដើម, ស្វាយ៣០ដើម,ចេក២៥ដើម, ទៀប១៥ដើម, ខ្នុរ១៥ដើម, និងជីកស្រះសម្រាប់ចិញ្ចឹបត្រីខ្នាតគ្រួសារក្នុងលំនៅឋានចំនួន១ ។ ក្នុងនោះដែរក៏មានការចែកជូនគ្រួសារកងទ័ពដែលទៅចូលរួមអបអរក្នុងពិធីចំនួន១០គ្រួសារ ក្នុងមួយគ្រួសារៗទទួលបានសារុង១, មី១កេសតូច, ប៊ីចេង០, ៥គីឡូក្រាម, ត្រីខ១យួរ, ទឹកត្រី១យួរ, ទឹកស៊ីអ៊ីវ១យួរ, នំ១ធុង និងថវិកា១ម៉ឺនរៀលផងដែរ ។
យោធិន ញ៉ែម ផល្លា ព្រមទាំងគ្រួសារ បានលើកដៃបូងសួងថ្លែងនូវអំណរគុណដ៏ជ្រាលជ្រៅដល់សម្ដេចតេជោ ហ៊ុន សែន និងលោកជំទាវ ដែលបានយកចិត្ដទុកដាក់ដល់ជីវិតគ្រួសារគាត់ឱ្យមានទីជម្រក និងមានភាពលំនឹងក៏ដូចជាកងទ័ពដែលកំពុងឈរជើងការពារបូរណភាពទឹកដីទាំងអស់គ្នាដែរ ៕
ចែករំលែកព័តមាននេះ