ខេត្តសៀមរាប ៖ ថ្លែងពីទឹកដីខេត្តសៀមរាប សម្តេចធិបតី ហ៊ុន ម៉ាណែត បាន ស្នើឱ្យរដ្ឋមន្ត្រីក្រសួងព័ត៌មាន ដកអាជ្ញាប័ណ្ណ និងដាក់ក្នុងបញ្ជីខ្មៅចំពោះអ្នកព័ត៌មានណាដែលផ្សាយព័ត៌មានមិនពិត…
ខេត្តសៀមរាប ៖ ថ្លែងពីទឹកដីខេត្តសៀមរាប សម្តេចធិបតី ហ៊ុន ម៉ាណែត បាន ស្នើឱ្យរដ្ឋមន្ត្រីក្រសួងព័ត៌មាន ដកអាជ្ញាប័ណ្ណ និងដាក់ក្នុងបញ្ជីខ្មៅចំពោះអ្នកព័ត៌មានណាដែលផ្សាយព័ត៌មានមិនពិត តាមកៀបគេស៊ី និងបំពុលសង្គម ដើម្បីកុំធ្វើឱ្យអ្នកព័ត៌មានបួនដប់នាក់នេះធ្វើឱ្យប៉ះពាល់ដល់អ្នកព័ត៌មានវិជ្ជាជីវៈ ។
ការស្នើរបស់សម្តេចធិបតីនាយករដ្ឋមន្ត្រី បន្ទាប់ពីគេសង្កេតឃើញមានករណីផ្សាយព័ត៌មានមិនពិត ត្រូវបានធ្វើការវែកញែកគ្នាយ៉ាងក្តៅគកុក ពិសេសលើបណ្តាញសង្គម ។
ក្នុងឱកាសអញ្ជើញជាអធិបតីក្នុងពិធីបញ្ចុះបឋមសិលាសាងសង់សារមន្ទីរ សម្ដេចព្រះព្រហ្មរតនមុនី ពិន សែម ក្នុងបរិវេណវត្តរាជបូណ៌ ស្ថិតនៅសង្កាត់សាលាកំរើក ក្រុងសៀមរាប ខេត្តសៀមរាប នៅព្រឹកថ្ងៃទី១៨ ខែកក្កដា ឆ្នាំ២០២៤ សម្ដេចធិបតី នាយករដ្ឋមន្ដ្រីបានជំរុញឱ្យឯកឧត្ដម នេត្រ ភក្ដ្រា រដ្ឋមន្ត្រីក្រសួងព័ត៌មាន ត្រូវពិនិត្យមើលបញ្ហាដោយកុំឱ្យអ្នកសារព័ត៌មានមួយចំនួនតូច ដែលកំពុងប្រព្រឹត្តិខុសវិជ្ជាជីវៈ និងក្រមសីលធម៌ ដើម្បីបង្កើតជាមុខរបរ និងតាមគៀបគេស៊ី មកបំផ្លាយដល់អ្នកសារព័ត៌មាន ដែលគេកំពុងគោរពវិជ្ជាជីវៈយ៉ាងត្រឹមត្រូវ ។
សម្ដេចធិបតី នាយករដ្ឋមន្ត្រីបានគូសបញ្ជាក់យ៉ាងដូច្នេះថា ៖«ប្រសិនបើរកឃើញមានអ្នកសារព័ត៌មានទាំងអស់នេះត្រូវលុបអាជ្ញាប័ណ្ណចោល ដើម្បីកុំឱ្យមានបន្ដធ្វើសកម្មភាពទាំង នេះឱ្យខាងតែបាន ។ ប៉ុន្ដែអ្នកសារព័ត៌មានខ្លះដោយសារតែផ្សាយលឿនទើបផ្សាយខុស ហើយគាត់ផ្សាយកែតម្រូវ នោះមិនមែនជាបញ្ហានោះទេ ព្រោះគាត់ពុំមានចេតនា តែសារព័ត៌មានមួយចំនួនមានចេតនាផ្សាយខុស ផ្សាយបំភ្លៃ និងមានចេតនាបង្កើតបញ្ហា និងបំផ្លាញសង្គម នឹងប្រឈមមុខនឹងផ្លូវច្បាប់តែម្ដង» ។
សម្តេចធិបតីបានលើកឡើថា រាជរដ្ឋាភិបាលកំពុងតែទប់ស្កាត់ព័ត៌មានក្លែងក្លាយ ដែលកំពុងបង្កើតបញ្ហា និងវាយលុកយ៉ាងខ្លាំងបង្កផលប៉ះពាល់យ៉ាងធ្ងន់ធរដល់ប្រជាពលរដ្ឋ និងសង្គមជាតិ ។
ជាមួយគ្នានេះ មានបណ្ដាប្រទេសមួយចំនួននៅអ៊ឺរ៉ុប កាណាដា អាមេរិក ក៏កំពុងគិតអំពីបញ្ហាព័ត៌មានក្លែងក្លាយនេះផងដែរ ។ សម្ដេចធិបតីបានបញ្ជាក់ថា៖«រាជរដ្ឋាភិបាលគ្មានការបិទសិទ្ធិសេរីភាពក្នុងការបញ្ចេញមតិនោះទេ ប៉ុន្ដែត្រូវគោរពសិទ្ធិអ្នកដទៃ ដើម្បីទទួលបានព័ត៌មានពិតដោយមិនធ្វើ ដើម្បីចំណេញនយោបាយ និងធ្វើឱ្យសង្គមមានបញ្ហា ។ ខ្ញុំស្វាគមន៍ព័ត៌មានពិត ដើម្បីជួយស្ថាបនា និងចូលរួមអភិវឌ្ឍន៍សង្គមជាតិ» ។
ក្នុងឱកាសនោះ សម្ដេចធិបតី អំពាវនាវឱ្យអ្នកព័ត៌មានទាំងប្រកាន់ភ្ជាប់នូវក្រមសីលធម៌វិជ្ជាជីវៈឱ្យបានខ្ជាប់ខ្ជួន ដើម្បីលើកកម្ពស់សិទ្ធិសេរីភាពរបស់អ្នកសារព័ត៌មានឱ្យបានខ្លាំងក្លាបន្ថែមទៀត ។ ម្យ៉ាងវិញទៀត ដើម្បីលុបបំបាត់ព័ត៌មានក្លែងក្លាយ និងផ្ដល់ព័ត៌មានពិតដល់សាធារណជនឱ្យមានការយល់ដឹង និងច្បាស់លាស់ ។
សូមបញ្ជាក់ថា ព័ត៌មានក្លែងក្លាយ ឬ Fake News បានក្លាយជាប្រធានបទក្តៅមួយ និងមានការជជែកដេញដោលច្រើន នៅក្នុងចំណោមអ្នកជំនាញសារព័ត៌មានក៏ដូចជា ពលរដ្ឋទូទៅក្នុងពិភពលោក ។ សម្រាប់កម្ពុជាដែលជាប្រទេសកំពុងអភិវឌ្ឍន៍ ហើយព័ត៌មានក្លែងក្លាយត្រូវបានប្រើជាមធ្យោបាយមួយ ដើម្បីជះឥទ្ធិពលទៅលើផ្នត់គំនិត និងការសម្រេចចិត្តរបស់ពលរដ្ឋដែលមានការចាប់អារម្មណ៍ពីផ្នែកនយោបាយរហូតដល់ការទិញលក់ផលិតផលតូចតាច តាម បណ្តាញសង្គម ឬអ៊ីនធឺណិតជាដើម ។ រាល់ព័ត៌មានក្លែងក្លាយឃើញមានការចែករំលែកយ៉ាងច្រើនលើបណ្តាញសង្គម ដែលចំណុចនេះធ្វើឲ្យមានការយល់ច្រឡំកាន់តែខុស ៕
ចែករំលែកព័តមាននេះ