រាជធានីភ្នំពេញ ៖ ប្រមុខការពារជាតិកម្ពុជា បានបញ្ជាក់ថា ជនរងគ្រោះដែលបានបាត់ខ្លួន ដោយសារឧបទ្ទវហេតុធ្លាក់ឧទ្ធម្ភាគចក្រ នៅតំបន់ភ្នំជួរក្រវាញ រវាងខេត្តខេត្តពោធិ៍សាត់ និងខេត្តកោះកុង មានតែពីរនាក់ប៉ុណ្ណោះ…
រាជធានីភ្នំពេញ ៖ ប្រមុខការពារជាតិកម្ពុជា បានបញ្ជាក់ថា ជនរងគ្រោះដែលបានបាត់ខ្លួន ដោយសារឧបទ្ទវហេតុធ្លាក់ឧទ្ធម្ភាគចក្រ នៅតំបន់ភ្នំជួរក្រវាញ រវាងខេត្តខេត្តពោធិ៍សាត់ និងខេត្តកោះកុង មានតែពីរនាក់ប៉ុណ្ណោះ គឺអ្នកបើកបរម្នាក់ និងជំនួយការបើកបរម្នាក់ ពុំមែន៧នាក់ ដូចការផ្សព្វផ្សាយរបស់សារព័ត៌មួយចំនួនដែលផ្សាយខុសពីការពិតនោះទេ ។
ការថ្លែងរបស់នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួង ការពារជាតិនៅព្រឹកថ្ងៃទី១៤ ខែកក្កដា ឆ្នាំ២០២៤នេះ នាឱកាស អញ្ជើញជាអធិបតីភាព ប្រារព្ធពិធីអបអរសាទរ ខួបលើកទី៣១ឆ្នាំនៃ ទិវាបង្កើតកងរាជអាវុធហត្ថលើផ្ទៃប្រទេស (១៤ កក្កដា ១៩៩៣ – ១៤ កក្កដា ២០២៤) នៅវិទ្យាស្ថានកងរាជអាវុធហត្ថកំបូល រាជធានីភ្នំពេញ ។
ឯកឧត្តមឧបនាយករដ្ឋមន្ត្រីបានលើកឡើងយ៉ាងដូច្នេះថា ៖«ឧទ្ធម្ភាគចក្ររបស់កងទ័ពអាកាសក្រសួងការពារជាតិចេះហោះហើរជារៀងរាល់ថ្ងៃ ដើម្បីហ្វឹកហ្វឺន និងដើម្បីពិនិត្យមើលនូវបច្ចេកទេស និងឧបកណ៍ ដែលមានទំនើបកម្មក្នុងវិស័យនេះ ។ យើងហោះហើររាល់ថ្ងៃទាំងបើកបរ និងជំនួយការ» ។
ជាមួយគ្នានោះដែរ ឯកឧត្តមបានឲ្យដឹងថា ពេលខ្លះក៏មានការហ្វឹកហ្វឺនក្នុងរយៈពេលខ្លី និងចម្ងាយឆ្ងាយផងដែរ ។ ដែលក្រសួងបានដាក់ចេញជាគោលដៅជាប្រចាំ ។ ចំពោះឧទ្ធម្ភាគចក្រដែលបានបាត់ទំនាក់ទំនងនេះត្រូវបានឯកឧត្តម ទៀ សីហា បានឲ្យដឹងថា គឺមានទិសដៅហោះហើរពីភ្នំពេញទីថ្មដា នៅខេត្តពោធិ៍សាត់ ហើយពីពោធិ៍សាត់ទៅភ្នំពេញវិញ ។
ចំពោះករណីធ្លាក់ឧទ្ធម្ភាគចក្រនេះ ឯកឧត្តមឧបនាយករដ្ឋមន្ត្រីបានគូសបញ្ជាក់យ៉ាងដូច្នេះថា ៖« ខ្ញុំមិនទាន់បានសន្នីដ្ឋានបែបណាទេ ប៉ុន្តែក្នុងសេបកម្មរបស់យើងនេះគឺ មានអ្នក បើកបរជំនាញមួយនាក់ និងជំនួយការម្នាក់ គឺមានតែពីររូបប៉ុណ្ណោះ ដែលបានហ្វឹកហ្វឺន ហោះហើរទៅគោលដៅបានកំណត់ក្នុងបេសកម្មទ័ពអាកាស ។ តែជាអកុសលអាកាសធាតុ មិនអំណោយផលបានផ្តាច់ការទាក់ទងគ្នារហូតមកដល់ពេលនេះ គឺដល់ថ្ងៃទី២ហើយ» ។
បើតាមឯកឧត្តម ឧបនាយករដ្ឋមន្ត្រីបានអះអាងថា មកដល់ពេលនេះកងកម្លាំងជំនាញទាំងអស់បានកំពុងតែចុះរុករកនៅក្នុងតំបន់ដែលបានបាត់សញ្ញានេះ ។ ជាមួយគ្នានោះ ឯកឧត្តមក៏បានស្នើឲ្យបញ្ឈប់ចេញព័ត៌មានដែលមិនការពិតពីប្រព័ន្ធផ្សព្វផ្សាយមួយចំនួនផងដែរ ។ ដោយខ្លះថា រកឃើញនៅកន្លែងនេះ កន្លែងនោះ និងមានមនុស្សនៅក្នុងហេតុការណ៍នោះចំនួន៧នាក់ ដែលជាការមិនពិត ។
ឯកឧត្តម ទៀ សីហា បានអះអាងចំពោះព័ត៌មាននូវការធ្លាក់ឧទ្ធម្ភាគចក្រនេះ ក្រសួងការ ពារជាតិនឹងធ្វើការផ្សព្វផ្សាយជាបន្តបន្ទាប់ ព្រោះថា វាមិនមែនជាព័ត៌មានតែត្រូវលាក់បាំងនោះទេ ។
យ៉ាងណាក្តី សម្រាប់ថ្ងៃទី១៤ ខែកក្កដា ដែលជាថ្ងៃនេះទី២ នៃការបាត់នូវឧទ្ធម្ភាគ ចក្រនេះ ឯកឧត្តមឧបនាយករដ្ឋមន្ត្រីបានសម្តែងក្តីសង្ឃឹមថា នឹងរកឃើញឧទ្ធម្ភាគចក្រ នេះផងដែរ ។ នៅក្នុងនោះ ក្រសួងការពារជាតិបានបញ្ចេញកម្លាំងជាច្រើនរួមទាំងបច្ចេកវិទ្យាល័យផងដែរ ។ ពោល គឺទាំងកម្លាំងស្មើជើង កងកម្លាំទ័ពអាកាសផងដែរសម្រាប់រុករក ។
ឯកឧត្តមក៏បានសង្កត់ធ្ងន់ថា៖«អ្វីដែលខ្ញុំត្រូវយកចិត្តទុកដាក់នោះ គឺព័ត៌មានមិនពិត ដែលបានធ្វើឲ្យប៉ះពាល់ដល់ការសន្និដ្ឋានការសង្ស័យទៅលើកងកម្លាំង ជាពិសេសនោះមិនទាន់ដឹងច្បាស់ថា មានអ្វីកើតឡើងនោះ ខណៈពេលនេះក្រុមគ្រួសាររបស់ពិលុតបានកំពុងរងចាំដោយអស់សង្ឃឹមដោយសារព័ត៌មានមិនពិតនេះ» ៕
ចែករំលែកព័តមាននេះ