រាជធានីភ្នំពេញ ៖ ក្រោមការយកចិត្តទុកដាក់ និងក្តីមេត្តាករុណាដ៏ខ្ពង់ខ្ពស់ពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ…
រាជធានីភ្នំពេញ ៖ ក្រោមការយកចិត្តទុកដាក់ និងក្តីមេត្តាករុណាដ៏ខ្ពង់ខ្ពស់ពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត វីរកងទ័ពជួរមុខមួយរូបត្រូវបានសង្គ្រោះជីវិតដោយជោគជ័យ តាមរយៈការវះកាត់បេះដូង នៅមន្ទីរពេទ្យកាល់ម៉ែត ។
ជាក់ស្តែង បើយោងតាម TYDA – គ្រូពេទ្យស្ម័គ្រចិត្តយុវជនសម្តេចតេជោ បានប្រកាសនាព្រឹកថ្ងៃទី០៥ ខែមករា ឆ្នាំ២០២៦នេះថា ៖ ដោយក្តីមេត្តាករុណាដ៏ខ្ពង់ខ្ពស់បំផុត «សម្តេចមហាបវរធិបតី ហ៊ុន ម៉ាណែត» និង «លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត» បានអនុញ្ញាតឱ្យក្រុមគ្រូពេទ្យស្ម័គ្រចិត្តយុវជនសម្តេចតេជោ (TYDA) នាំវីរកងទ័ពឈ្មោះ វ៉ា មករា អាយុ៣៧ឆ្នាំ ជាកងទ័ពជួរមុខ មកទទួលការព្យាបាលដោយការវះកាត់ នៅមន្ទីរពេទ្យកាល់ម៉ែត ។
កន្លងមក វីរកងទ័ពមានជំងឺខូចប្រឹសបេះដូងរ៉ាំរ៉ៃ និងបេះដូងចំហ ដែលបានធ្វើទុក្ខខ្លាំងចាប់ពីឆ្នាំ២០២២មក ដោយមានអាការៈណែនទ្រូង ពិបាកដង្ហើម ហត់ និងញ័រទ្រូងខ្លាំង នាំឱ្យវីរកងទ័ពមានការលំបាកក្នុងការបំពេញការងារប្រចាំថ្ងៃ ។
ជាភ័ព្វសំណាង ដោយមានការចង្អុលបង្ហាញដ៏ខ្ពង់ខ្ពស់បំផុតរបស់ «សម្តេចធិបតី» និង «លោកជំទាវបណ្ឌិត» ក្រុមវេជ្ជបណ្ឌិតឯកទេសរបស់សមាគម TYDA បានធ្វើការព្យាបាលវីរកងទ័ព រហូតទទួលបានភាពជោគជ័យ ។
ក្នុងនោះដែរ វីរកងទ័ព និងក្រុមគ្រួសារ សូមគោរពអរគុណ និងគោរពដឹងគុណ យ៉ាងជ្រាលជ្រៅបំផុតជូន «សម្តេចមហាបវរធិបតី ហ៊ុន ម៉ាណែត» និង «លោកជំទាវបណ្ឌិត ពេជ ចន្ទមុន្នី» ដែលលោកទាំងពីរតែងតែគិតគូដល់សុខទុក្ខកងទ័ព ក៏ដូចជាប្រជាជនកម្ពុជា ។
សូមបញ្ជាក់ថា រាល់ការចំណាយទាំងអស់ក្នុងការព្យាបាល ថ្លៃអាហារប្រចាំថ្ងៃ និងថ្លៃធ្វើដំណើរ ត្រូវបានទំនុកបម្រុងដ៏ខ្ពង់ខ្ពស់បំផុតដោយ «សម្តេចធិបតី» និង «លោកជំទាវបណ្ឌិត» ៕
ចែករំលែកព័តមាននេះ