ហាងទំនិញមិនជាប់ពន្ធ duty-free ទាំងអស់ នៅតាមព្រលានយន្តហោះអន្តរជាតិធំៗទូទាំងប្រទេសថៃត្រូវនឹងបិទចោល ដើម្បីជំរុញឱ្យមនុស្សយកប្រាក់ចេញទៅចាយវាយ និងដើរហើរកាន់តែច្រើននៅក្នុងផ្ទៃប្រទេស ។ អាកាសយានដ្ឋានអន្តរជាតិធំៗនៅទូទាំងប្រទេសថៃ មានគម្រោងបិទចោលនូវរាល់ហាងទំនិញមិនជាប់ពន្ធ duty-free…
ហាងទំនិញមិនជាប់ពន្ធ duty-free ទាំងអស់ នៅតាមព្រលានយន្តហោះអន្តរជាតិធំៗទូទាំងប្រទេសថៃត្រូវនឹងបិទចោល ដើម្បីជំរុញឱ្យមនុស្សយកប្រាក់ចេញទៅចាយវាយ និងដើរហើរកាន់តែច្រើននៅក្នុងផ្ទៃប្រទេស ។
អាកាសយានដ្ឋានអន្តរជាតិធំៗនៅទូទាំងប្រទេសថៃ មានគម្រោងបិទចោលនូវរាល់ហាងទំនិញមិនជាប់ពន្ធ duty-free ដើម្បីលើកទឹកចិត្តអ្នកដំណើរ ក៏ដូចជាភ្ញៀវបរទេសចេញទៅចំណាយកាន់តែច្រើននៅកន្លែងផ្សេងទៀតទូទាំងផ្ទៃប្រទេស ។ ទោះបីជានៅមិនទាន់មានការកំណត់ពីកាលបរិច្ឆេទច្បាស់លាស់ពីគណៈរដ្ឋមន្ត្រីថៃក្តី ប៉ុន្តែការបិទហាងទំនិញនៅក្នុងព្រលានយន្តហោះ ត្រូវបានរដ្ឋាភិបាលថៃប៉ាន់ប្រមាណថា នឹងជួយបង្កើនការចំណាយរបស់ភ្ញៀវបរទេសក្នុងម្នាក់ចំនួន៥៧០បាតក្នុងមួយដំណើរកម្សាន្ត។ នេះបើយោងតាមការចុះផ្សាយរបស់សារព័ត៌មាន CNA នៅថ្ងៃទី០៨ ខែកក្កដា ឆ្នាំ២០២៤ ។
អាកាសយានដ្ឋានអន្តរជាតិចំនួនប្រាំបី ដែលនឹងបិទចោលនូវហាងទំនិញមិនជាប់ពន្ធ duty-free រួមមានព្រលានយន្តហោះសុវណ្ណភូមិ និងដុនមឿង ក្នុងទីក្រុងបាងកក ក៏ដូចជាព្រលានយន្តហោះ នៅឈៀងម៉ៃ ភូកេត ហាតយ៉ៃ អ៊ូតាប៉ាវ (រ៉ាយ៉ង) សាមុយ និងក្រប៊ី ។ ទោះបីបច្ចុប្បន្ន ប្រតិបត្តិករព្រលានយន្តហោះទាំង៨នេះកំពុងដំណើរការហាងទំនិញមិនជាប់ពន្ធ duty-free ដោយរកចំណូលបានប្រមាណ៣ពាន់លានបាត ឬស្មើនឹងជាង៨២លានដុល្លារអាមេរិកកាលពីឆ្នាំ២០២៣ក៏ដោយចុះ ប៉ុន្តែក្រុមហ៊ុនទាំងនេះបានយល់ព្រមបិទទ្វារ ដើម្បីចូលរួមជាមួយយុទ្ធសាស្ត្ររបស់រដ្ឋាភិបាលថៃ ។
ទោះជាយ៉ាងណាក៏ដោយ តាមការវិភាគរបស់ គេហទំព័រ Moodie Davitt រាយការណ៍ថា ការសម្រេចចិត្តនេះអាចនាំឱ្យមានការធ្លាក់ចំនួននៃការលក់ម៉ាកយីហោសំខាន់ៗប្រហែល ២០%។
យុទ្ធសាស្ត្រថ្មីនេះ កើតឡើងក្នុងពេលដែល រាជាណាចក្រទេសចរណ៍ដ៏ល្បីប្រចាំអាស៊ីអេគ្នេយ៍មួយនេះ កំពុងស្វះស្វែងរិះរកគ្រប់មធ្យោបាយគ្រប់វីធីសាស្ត្រថ្មីចាស់ ដើម្បីកែលម្អយុទ្ធសាស្ត្រទេសចរណ៍របស់ខ្លួន ដើម្បីធ្វើយ៉ាងណាឱ្យភ្ញៀវទេសចរបង្កើនការចំណាយរបស់ពួកគេនៅក្នុងប្រទេសថៃ។
យោងតាមការប៉ាន់ប្រមាណអវត្តមាននៃការទិញទំនិញមិនជាប់ពន្ធនៅក្នុងព្រលានយន្តហោះ ត្រូវបានគេរំពឹងថានឹងនាំឱ្យអ្នកធ្វើដំណើរចំណាយជាមធ្យម១៥,៦៤ដុល្លារបន្ថែមទៀតនៅកន្លែងផ្សេងៗក្នុងប្រទេសថៃ អំឡុងពេលដំណើរទេសចរណ៍របស់ពួកគេ ។
យុទ្ធសាស្ត្រនេះ ធ្វើឡើងស្របពេលដែលប្រទេសថៃបានដាក់គោលដៅ កែលំអហេដ្ឋារចនាសម្ព័ន្ធអាកាសយានដ្ឋានសុវណ្ណភូមិ ដើម្បីឱ្យវាចូលទៅក្នុងចំណោមអាកាសយានដ្ឋានកំពូលទាំង៥០របស់ពិភពលោកនៅឆ្នាំ២០២៥ និងជាប់ចំណាត់ថ្នាក់កំពូលទាំង២០ ក្នុងរយៈពេល៥ឆ្នាំខាងមុខ ខណៈដែលកាលពីឆ្នាំ២០២៣ អាកាសយានដ្ឋានបានជាប់ចំណាត់ថ្នាក់ត្រឹមលេខ៦៨ ទោះបីជាវាគឺជាអាកាសយានដ្ឋានដ៏មមាញឹកបំផុតមួយនៅអាស៊ីអាគ្នេយ៍ក៏ដោយ។ រដ្ឋាភិបាលថៃ ចង់ឱ្យអាកាសយានដ្ឋានសុវណ្ណភូមិអាចផ្ទុកអ្នកដំណើរបាន១៧០លាននាក់ និងបម្រើជើងហោះហើរមួយលានជើងក្នុងមួយឆ្នាំ នៅឆ្នាំ២០២៩ខាងមុខ។
ក្រៅពីបិទហាងទំនិញ Duty-Free តើថៃមានយុទ្ធសាស្ត្រអ្វីដើម្បីទាក់ទាញភ្ញៀវទេសចរណ៍ក្នុងរដូវកាល ដែលខ្មែរយើងនៅតែបន្តហៅថា Low Season នោះ?
តាមពិតទៅរដូវកាល Low Season មិនមែនមានតែនៅប្រទេសកម្ពុជាទេ ប្រទេសថៃក៏មានដែរ ព្រោះជាជាធម្មតា ភ្ញៀវទេសចរអន្តរជាតិភាគច្រើនចូលចិត្តទៅលេងថៃ ក្នុងរដូវ High Season ចាប់ខែតុលាដល់ខែមីនា ដូចតែកម្ពុជាយើងដែរហ្នឹង។ ហើយក្រៅពីនោះចំនួនភ្ញៀវបរទេសតែងតែធ្លាក់ចុះ គ្រាន់តែ ថៃ ខុស ពីកម្ពុជា ត្រង់ថា កំឡុងពេលដែលខ្សត់ភ្ញៀវ គេមិនបានបណ្តែតបណ្តោយតាមយថាកម្ម ដោយប្រកាន់គំនិតចាស់គំរិលថា អ្នកធ្វើដំណើរមិនគួរមកទស្សានាក្នុងរដូវវស្សានោះដូចកម្ពុជាយើងទេ គឺខាងសមាគមទេសចរណ៍គេ រួមទាំងអង្គភាពពាក់ព័ន្ធ ទាំងរដ្ឋ ទាំងឯកជន គេខិតខំដាក់ចេញវិធានការជំរុញទេសចរណ៍ក្នុងរដូវកាលនេះ ដោយប្តូរពីការហៅថា Low Seasonទេ ប៉ុន្តែគេហៅថា រដូវកាលបៃតង Green Season រួមទាំងគំនិតផ្តួចផ្តើម «បញ្ឆេះទេសចរណ៍របស់ប្រទេសថៃ»។
យោងតាមការព្យាករណ៍របស់ធនាគារពិភពលោកបានឱ្យដឹងថា ប្រទេសថៃត្រូវបានគេរំពឹងថា នឹងទាក់ទាញភ្ញៀវទេសចរជាង ៣៦លាននាក់នៅឆ្នាំ២០២៤ ប៉ុន្តែថៃខ្លួនឯង មានគោលដៅទាក់ទាញភ្ញៀវបរទេសឱ្យបានដល់ ៣៩ ទៅ ៤០លាននាក់ក្នុងឆ្នាំនេះ។ យោងតាមស្ថិតិពីក្រសួងទេសចរណ៍ និងកីឡាបានឱ្យដឹងថា ក្នុងរយៈពេល៦ខែ ឆ្នាំ២០២៤ ប្រទេសនេះមានភ្ញៀវទេសចរបរទេសចំនួន ១៧.៥លាននាក់ កើនឡើង ៣៥% ធៀបនឹងរយៈពេលដូចគ្នាកាលពីឆ្នាំមុន ដែលបង្កើតប្រាក់ចំណូលបាន ៨២៥ ពាន់លានបាត (២២.៤២ ពាន់លានដុល្លារ) ភ្ញៀវទេសចរសំខាន់ៗ គឺមកពីប្រទេសចិន ម៉ាឡេស៊ី ឥណ្ឌា រុស្ស៊ី និង កូរ៉េខាងត្បូង។
ប្រទេសនេះបាននឹងកំពុងចាត់វិធានការសំខាន់ៗ ដើម្បីជំរុញកំណើនទេសចរណ៍បរទេស កាលពីខែមុន ប្រទេសថៃបានសម្រេចលុបចោលការកំណត់ថ្លៃ ៣០០បាត (៨,២០ ដុល្លារ) លើភ្ញៀវទេសចរអន្តរជាតិដែលមកដល់តាមផ្លូវអាកាស។ លើសពីនេះ រដ្ឋាភិបាលនបន្តគម្រោងធានារ៉ាប់រងឥតគិតថ្លៃរបស់ខ្លួនសម្រាប់ភ្ញៀវទេសចរអន្តរជាតិរហូតដល់ចុងឆ្នាំ២០២៤ ។ គំនិតផ្តួចផ្តើមនេះផ្តល់ការធានារ៉ាប់រងផ្នែកវេជ្ជសាស្ត្ររហូតដល់ 500,000 បាត (13,650 ដុល្លារ) សម្រាប់គ្រោះថ្នាក់ ឬគ្រោះធម្មជាតិ។
ចាប់ពីថ្ងៃទី១ ខែមិថុនាមក ចំនួនប្រទេសដែលមានសិទ្ធិចូលប្រទេសថៃដោយគ្មានទិដ្ឋាការបានកើនឡើងពី ៥៧ ទៅ៩៣ប្រទេស តំបន់និងដែនកោះ ។ អ្នកទេសចរណ៍ត្រូវបានអនុញ្ញាតឱ្យស្នាក់នៅរហូតដល់ ៣០ថ្ងៃ ហើយអាចបន្តការស្នាក់នៅរបស់ពួកគេបាន ៣០ ថ្ងៃបន្ថែមទៀត សម្រាប់ថ្លៃសេវាត្រឹមតែ 1,900បាត ឬប្រហែល ៥២ដុល្លារ)។
ដើម្បីទាក់ទាញភ្ញៀវទេសចរណ៍អំឡុងពេលធ្លាក់ចុះនេះ ប្រទេសថៃ បានបង្កើនការផ្សព្វផ្សាយ និង បង្កើតឱ្យមានព្រឹត្តិការណ៍ធំៗ តាមផែនការ ដូចជា ការប្រគុំតន្ត្រី ព្រឹត្តការណ៍កីឡាអន្តរជាតិ និងពិធីបុណ្យសិល្បៈឆ្នេរខ្សាច់ ដើម្បីផ្តល់នូវបទពិសោធន៍ទេសចរណ៍ថ្មី សម្រាប់ភ្ញៀវទេសចរឱ្យទទួលយកបទពិសោធន៍ និងសបញ្ជាក់ថា “ប្រទេសថៃជាទីតាំងដែលមនុស្សជុំវិញពិភពលោកអាចធ្វើដំណើរកម្សាន្តបានពេញមួយឆ្នាំ និងគ្រប់រដូវកាល”។
បន្ថែមលើនេះ សមាគមទេសចរណ៍ថៃ TAT បានដាក់គោលដៅបង្កើត «បរិយាកាសទេសចរណ៍រស់រវើក» បន្តពីរដូវបៃតងរហូតដល់ដំណាច់ឆ្នាំ 2024 ដើម្បីឱ្យវាឈានដល់គោលដៅទេសចរណ៍អន្តរជាតិចំនួន ៣៩លាននាក់ ដោយនៅដើមខែកក្កដានេះ TAT ក៏បានដាក់ចេញនូវគម្រោងផ្សព្វផ្សាយសកម្មភាព «ត្រូវធ្វើ» ចំនួន ៧២ នៅក្នុងប្រទេសថៃ ដើម្បីជំរុញទេសចរណ៍បន្ថែមទៀតក្នុងរដូវធ្លាក់ភ្ញៀវ ដោយសកម្មភាពនេះមានដូចជា ព្រឹត្តការណ៍ប្រកួតMuay Thai អាហារ វប្បធម៌ សំលៀកបំពាក់ និងការសម្ដែងសិល្បៈជាដើម ៕
ចែករំលែកព័តមាននេះ