ទីក្រុងវ៉ាស៊ីនតោន៖ ថ្នាក់ដឹកនាំប្រទេសសមាជិកអង្គការណាតូចាប់ផ្ដើមធ្វើដំណើរទៅដល់ទីក្រុងវ៉ាស៊ីនតោនជាបណ្ដើរៗហើយដើម្បីត្រៀមចូលរួមកិច្ចប្រជុំកំពូលចាប់ពីថ្ងៃទី១០-១១ ខែកក្កដា។ របៀបវារៈដែលសំខាន់ជាងគេគឺបញ្ហាសង្គ្រាមអ៊ុយក្រែន និងការប្ដេជ្ញាគាំទ្រអ៊ុយក្រែនជាបន្តទៀត។ ប៉ុន្តែកិច្ចប្រជុំនេះត្រូវរំខានដោយបញ្ហាចាក់ស្រេះរបស់លោកបៃដិន។
ក្រៅពីមតិខ្សិបខ្សៀវគ្នាដែលចង់ឱ្យលោកដកថយពីបេក្ខភាពប្រធានាធិបតី ឥឡូវនេះ លេចឮរឿងថ្មី១ទៀតថាវេជ្ជបណ្ឌិតឯកទេសខាងបញ្ហាខួរក្បាល និងប្រព័ន្ធប្រសាទឧស្សាហ៍ចេញចូលសេតវិមានប្រហែលជាព្យាបាលជំងឺរបស់លោកបៃដិន។ លោកបៃដិននឹងព្យាយាមប្រើប្រាស់កិច្ចប្រជុំនេះដើម្បីធានាប្រាប់ក្រុមប្រទេសសម្ព័ន្ធមិត្តថាអាមេរិកនៅតែជាមេដឹកនាំស្ថាប័ននេះដដែល។
លោកនៅតែមានសមត្ថភាពដឹកនាំប្រទេសអាមេរិកដដែល។ លោកថ្លែងនៅក្នុងបទសម្ភាសថាសម្ព័ន្ធមិត្តរបស់យើងត្រូវការយើងជាជំហរដ៏ធំ១របស់ពួកគេ។ លោកដាក់ជាសំណួរថាតើមាននរណាដែលស័ក្ដិសមនឹងមកធ្វើកិច្ចការនេះ? លោកខិតខំពង្រីកអង្គការណាតូ និងខិតខំធ្វើឱ្យមានឯកភាពផ្ទៃក្នុងនៃអង្គការនេះ។ សម្ព័ន្ធមិត្តរបស់លោកបៃដិននៅតែមានទំនុកចិត្តទៅលើលោកជានិច្ច។ អធិការបតីអាល្លឺម៉ង់ថ្លែងមុនចាកចេញពីទីក្រុងប៊ែឡាំងថាលោកគ្មានអ្វីត្រូវព្រួយបារម្ភអំពីបញ្ហាសុខភាពរបស់លោកបៃដិនទេ។
ទោះជាយ៉ាងណាក្ដី សមាជិកអង្គការណាតូទាំង៣២ប្រទេសនៅតែនឹកមមៃថាលោកត្រាំអាចនឹងឈ្នះឆ្នោតនៅអាណត្តិថ្មី។ ចំណុចដែលគួរឱ្យបារម្ភនោះនៅត្រង់ថាលោកត្រាំនៅពេលឃោសនាបោះឆ្នោតម្ដងៗ លោកតែងតែព្រមានថាអាមេរិកនឹងឈរឱបដៃមើលប្រទេសដទៃវាយប្រហារសមាជិកណាតូបើពួកគេមិនព្រមបង់ថ្លៃការពារឱ្យបានច្រើនគ្រប់គ្រាន់។
ឥឡូវនេះ បញ្ហាមិនមែនកើតឡើងតែចំពោះប្រទេសអាមេរិកមួយប៉ុណ្ណោះទេ។ នៅប្រទេសបារាំង លោកម៉ាក្រុងក៏កំពុងតែក្រពុលមុខរឿងបង្កើតរដ្ឋាភិបាលថ្មីក្រោយការបោះឆ្នោតកាលពីប៉ុន្មានថ្ងៃមុនដែលក្រុមឆ្វេងនិយមជ្រុលទទួលបានសំឡេងនាំមុខ។ នៅអង់គ្លេស នាយករដ្ឋមន្ត្រីទើបតែឡើងកាន់តំណែងបានប៉ុន្មានថ្ងៃក៏ទៅប្រជុំណាតូ។ នៅហុងគ្រី នាយករដ្ឋមន្ត្រីវីកទ័រ អ័របេន (Viktor Orban) ទៅជួបលោកពូទីនដល់វិមានក្រឹមឡាំងក្នុងនាមលោកជាប្រធានប្ដូរវេនរបស់សហភាពអឺរ៉ុប។ លោកក៏ត្រូវចូលរួមប្រជុំនៅវ៉ាស៊ីនតោនផងដែរ។
ការសន្យាផ្ដល់ខែលការពារដែនអាកាសទៅឱ្យអ៊ុយក្រែន
ទោះបីមានបញ្ហាចម្រូងចម្រាសនៅក្នុងប្រទេសរៀងៗខ្លួនយ៉ាងណាក្ដី ប៉ុន្តែថ្នាក់ដឹកនាំសមាជិកណាតូត្រូវតែបង្ហាញការរួបរួមគ្នានៅក្នុងបញ្ហាអ៊ុយក្រែន។ លោកហ្សេឡិនស្គីនឹងជិះយន្តហោះទៅវ៉ាស៊ីនតោនដោយក្ដីសង្ឃឹមថានឹងទទួលបានកាំជ្រួចប៉ាទ្រីយ៉ូត (Patriot) បន្ថែមទៀត។ នេះជាអ្វីដែលលោកបានស្នើសុំជាយូរមកហើយដើម្បីទប់ទល់នឹងគ្រាប់មីស៊ីលរបស់រុស្ស៊ី។
ដោយសារបារម្ភថាទៅថ្ងៃមុខបើដើរនយោបាយមិនស្រួលអាចនឹងអូសទាញណាតូ និងរុស្ស៊ីឱ្យផ្ទុះសង្គ្រាមជាមួយគ្នាដោយផ្ទាល់។ ដូច្នេះ អាមេរិក និងអាល្លឺម៉ង់បានសម្រេចគ្នាថាមិននិយាយជាចំហទេនូវការទទួលយកអ៊ុយក្រែនជាសមាជិកអង្គការណាតូ។ ប៉ុន្តែក្រុមអ្នកការទូតនិយាយថាទាំងណាតូ និងអ៊ុយក្រែនបានដើរដល់ដំណាក់កាលនេះហើយ។ ពួកគេមិនថយក្រោយវិញទេ។ ពួកគេនឹងបន្តជួយអ៊ុយក្រែន១ឆ្នាំ៤០ពាន់លានអឺរ៉ូ។ ពួកគេនឹងបន្តជួយយ៉ាងតិចក៏រយៈពេល១ឆ្នាំទៀតដែរ៕
ចែករំលែកព័តមាននេះ