ទីក្រុងតូក្យូ៖ ថ្មីៗនេះ នាយករដ្ឋមន្ត្រីជប៉ុនយល់ថាដោយយសាររុស្ស៊ី និងកូរ៉េខាងជើងពង្រឹងកិច្ចសហប្រតិបត្តិការយោធា ដូចនេះជប៉ុនត្រូវតែពង្រឹងកិច្ចសហការជាមួយអង្គការណាតូដែរដើម្បីការពារសន្តិភាពពិភពលោក។ មុនពេលចូលរួមកិច្ចប្រជុំកំពូលអង្គការណាតូនៅវ៉ាស៊ីនតោន លោកបានសរសេរលិខិត១ច្បាប់សម្ដែងការព្រួយបារម្ភនៅពេលឮថាប្រទេសខ្លះជួយរុស្ស៊ីពីក្រោយខ្នង។ ទោះបីលោកមិនបញ្ចេញឈ្មោះប្រទេសណា ប៉ុន្តែគេដឹងថាលោកចង់សំដៅទៅលើប្រទេសចិន។
លោកថ្លែងថាបញ្ហាសន្តិសុខអឺរ៉ុប-អាត្លង់ទិច និងឥណ្ឌូ-ប៉ាស៊ីហ្វិចមានទំនាក់ទំនងគ្នាយ៉ាងជិតស្និទ្ធមិនអាចកាត់ផ្ដាច់ចេញពីគ្នាបានឡើយ។ ជាក់ស្ដែង ករណីរុស្ស៊ីវាយប្រហារអ៊ុយក្រែន និងកិច្ចសហប្រតិបត្តិការយោធារវាងរុស្ស៊ី និងកូរ៉េខាងជើងជាឧទាហរណ៍ស្រាប់។ ហេតុនេះ ជប៉ុនប្ដេជ្ញាថាត្រូវតែពង្រឹងកិច្ចសហប្រតិបត្តិការជាមួយអង្គការណាតូ និងប្រទេសជាដៃគូ។
លោកថ្លែងបន្តទៀតថាពិភពលោកមិនគួរអនុគ្រោះចំពោះប្រទេសខ្លះទេ។ នៅពេលពិភពលោកកំពុងតែមានសណ្ដាប់ធ្នាប់សុខៗ ពួកគេបែរជាយកជើងរាទឹក។ លោកព្រមានថាថ្ងៃនេះភ្នក់ភ្លើងសង្គ្រាមឆាបឆេះនៅអ៊ុយក្រែន ថ្ងៃស្អែកអាចនឹងឆាបឆេះនៅអាស៊ីបូព៌ាថែមទៀត។ លោកជំរុញឱ្យមានកិច្ចសហប្រតិបត្តិការទប់ទល់នឹងការគំរាមកំហែងថ្មីដែលហួសពីព្រំដែនកំណត់រវាងប្រទេស១ និងប្រទេស១ទៀត។ ឧទាហារណ៍ ការវាយប្រហារផ្នែកព័ត៌មានវិទ្យា និងជម្លោះនៅក្នុងទីអវកាស។
ក្រុមឥណ្ឌូ-ប៉ាស៊ីហ្វិចហ្វ័រ (Indo-Pacific Four) ដែលមានកូរ៉េខាងត្បូង អូស្ត្រាលី នូវែលហ្សេឡង់ និងជប៉ុននឹងចូលរួមកិច្ចប្រជុំកំពូលណាតូពីថ្ងៃទី១០-១១ ខែកក្កដា។ ករណីរុស្ស៊ី និងកូរ៉េខាងជើងបង្កើតកិច្ចព្រមព្រៀងជាមួយគ្នានឹងត្រូវកូរ៉េខាងត្បូងលើកយកទៅពិភាក្សានៅក្នុងកិច្ចប្រជុំដើម្បីក្រើនរំលឹកថានេះជាការគំរាមកំហែងសន្តិសុខអឺរ៉ុប។ កាលពីខែមិថុនា ព្យុងយ៉ាង និងម៉ូស្គូបានចុះកិច្ចព្រមព្រៀងការពារគ្នាទៅវិញទៅមក។ លោកគីមគាំទ្ររុស្ស៊ីយ៉ាងពេញទំហឹងនៅក្នុងសង្គ្រាមអ៊ុយក្រែន។
ប្រទេសអាមេរិក និងសម្ព័ន្ធមិត្តចោទប្រកាន់ថាទីក្រុងព្យុងយ៉ាងបានបញ្ជូនគ្រាប់មីស៊ីល និងគ្រាប់កាំភ្លើងធំទៅរុស្ស៊ី។ ដូច្នេះជាការតបស្នងមកវិញ រុស្ស៊ីអាចនឹងផ្ដល់បច្ចេកវិទ្យានុយក្លេអ៊ែរ។ វ៉ាស៊ីនតោនចោទប្រកាន់ថាប្រទេសចិនបានផ្គត់ផ្គង់បច្ចេកវិទ្យាផលិតយន្តហោះដ្រូន និងមីស៊ីលទៅឱ្យរុស្ស៊ី ព្រមទាំងផ្ដល់រូបភាពតាមផ្កាយរណប និងគ្រឿងបរិក្ខារដែលអាចជួយឱ្យរុស្ស៊ីផលិតអាវុធយុទ្ធភ័ណ្ឌដើម្បីធ្វើសង្គ្រាមនៅអ៊ុយក្រែន។ ប៉ុន្តែចិនបានបដិសេធរួចហើយចំពោះការចោទប្រកាន់នេះ។
នៅក្នុងបទសម្ភាសថ្មីៗនេះ នាយករដ្ឋមន្ត្រីជប៉ុនមិនបាននិយាយបញ្ចេញឈ្មោះប្រទេសចិនទេ។ លោកបាននិយាយដោយប្រយោលថាប្រទេសខ្លះផ្ដល់គ្រឿងបរិក្ខារដែលអាចប្រើប្រាស់នៅក្នុងវិស័យយោធាក៏បាន និងស៊ីវិលក៏បានទៅឱ្យរុស្ស៊ី។ ធ្វើបែបនេះដើម្បីងាយស្រួលបន្លំភ្នែក។ លោកយល់ថាគេចាំបាច់ត្រូវតែគ្រប់គ្រងស្ថានការណ៍ដោយពហុភាគី និងមានយុទ្ធសាស្ត្រច្បាស់លាស់។ គេត្រូវតែសម្លឹងមើលឱ្យច្បាស់ថាមានប្រទេសខ្លះកំពុងតែបំពេញមហិច្ឆតារបស់រុស្ស៊ីដែលចង់ផ្លាស់ប្ដូរសណ្ដាប់ធ្នាប់ពិភពលោកដោយកម្លាំង៕
ចែករំលែកព័តមាននេះ