(ឥណ្ឌា)៖ ស្ថានីយ៍ទូរទស្សន៍ NDTV បានរាយការណ៍ថា យ៉ាងហោចណាស់មនុស្ស១១៦នាក់បានស្លាប់នៅក្នុងការរត់ជាន់គ្នានៅឯពិធីសាសនាហិណ្ឌូនៅភាគខាងជើងប្រទេសឥណ្ឌាកាលពីថ្ងៃទី២ ខែកក្កដា។ មន្ត្រីសុខាភិបាលបាននិយាយថា ចំនួនអ្នកស្លាប់អាចកើនឡើង នេះបើយោងតាម កាសែត New York Times ។
ឧប្បត្តិហេតុនេះបានកើតឡើងនៅពេលដែលមនុស្សជាច្រើនបានប្រមូលផ្តុំគ្នាដើម្បីថ្វាយបង្គំព្រះហិណ្ឌូព្រះសិវៈ នៅក្នុងភូមិមួយក្នុងរដ្ឋ Uttar Pradesh ភាគខាងជើងប្រទេសឥណ្ឌា ប្រហែល១៤០គីឡូម៉ែត្រពីរដ្ឋធានីញូវដែលី។
អាជ្ញាធរបាននិយាយថា ហ្វូងមនុស្សយ៉ាងច្រើនបានប្រមូលផ្តុំគ្នាបន្ទាប់ពីការអំពាវនាវពីមេដឹកនាំសាសនាក្នុងតំបន់។ លោក Ashish Kumar អ្នកគ្រប់គ្រងតំបន់ Hathras បានប្រាប់អ្នកយកព័ត៌មានថា «ឧបទ្ទវហេតុនេះបានកើតឡើងដោយសារតែមានមនុស្សច្រើនកំពុងព្យាយាមចាកចេញពីកន្លែងអធិស្ឋាន»។
សាក្សីនិងប្រព័ន្ធផ្សព្វផ្សាយក្នុងស្រុកបាននិយាយថានៅពេលការអធិប្បាយបានបញ្ចប់ មនុស្សម្នាចាប់ផ្ដើមនាំគ្នាប្រជ្រៀតចេញ ពួកគេចាប់ផ្តើមសង្កត់ពីលើគ្នា។ សាក្សី ម្នាក់បានប្រាប់ទូរទស្សន៍ India Today ថាច្រកចេញគឺតូចចង្អៀតណាស់។ សាក្សីរូបនេះបាននិយាយថា៖ «នៅពេលយើងព្យាយាមចេញពីកន្លែងបួងសួង ស្រាប់តែមានភាពចលាចលបានកើតឡើង ហើយយើងមិនដឹងត្រូវធ្វើយ៉ាងណានោះទេ»។
លោក Umesh Kumar Tripathi នាយកផ្នែកសុខាភិបាលក្នុងតំបន់បានប្រាប់អ្នកសារព័ត៌មានថា អ្នកស្លាប់ភាគច្រើនជាស្ត្រី។ វីដេអូនៅលើប្រព័ន្ធផ្សព្វផ្សាយសង្គមបានបង្ហាញពីសាកសពដេកនៅលើដីនៅខាងក្រៅមន្ទីរពេទ្យក្នុងស្រុកមួយ។
សោកនាដកម្មដ៏សាហាវតែងតែកើតឡើងនៅកន្លែងគោរពបូជាក្នុងប្រទេសឥណ្ឌាក្នុងអំឡុងពិធីបុណ្យសាសនាធំៗ៕
ចែករំលែកព័តមាននេះ