កាហ្សាក់ស្ថាន៖ នៅឯកិច្ចប្រជុំកំពូល «អង្គការសហប្រតិបត្តិការសៀងហៃ» លោកពូទីនរំលេចឱ្យឃើញពីសង្គ្រាមអ៊ុយក្រែន និងការស្វែងរកសន្តិភាព។ បន្ទាប់ពីលោកត្រាំសន្យានៅក្នុងវេទិកាតទល់មតិថាលោកនឹងខិតខំបញ្ចប់សង្គ្រាមអ៊ុយក្រែន, លោកពូទីនទទួលស្គាល់ថាអ្វីដែលលោកត្រាំនិយាយនេះគឺនិយាយដោយស្មោះ។ លោកពិតជាចង់បញ្ចប់សង្គ្រាមពិតមែន។
ទន្ទឹមនឹងការទទួលស្គាល់ការពិតនេះ លោកពូទីនក៏មិនទាន់ដឹងច្បាស់ថាតើវិធីបញ្ចប់សង្គ្រាមរបស់លោកត្រាំនោះបញ្ចប់ដោយវិធីណាទេ។ ថ្មីៗនេះ លោកត្រាំប្រកាសថាបើដឹងថាឈ្នះឆ្នោតភ្លាម លោកនឹងចាប់ផ្ដើមគិតគូរដោះស្រាយបញ្ហាអ៊ុយក្រែនភ្លាមៗតែម្ដង មិនចាំបាច់រង់ចាំដល់ពេលស្បថចូលកាន់តំណែងទេ។ លោកចង់បង្ហាញពីទំហំចិត្តដែលចង់បញ្ចប់សង្គ្រាមដ៏មហន្តរាយនេះ។ មួយពិភពលោករងទុក្ខដោយសារសង្គ្រាមអ៊ុយក្រែន។ អាមេរិកខ្លួនឯងក៏អស់លុយមិនតិចដែរ។
លោកពូទីនថ្លែងថាលោកបានស្ដាប់ដោយយកចិត្តទុកដាក់ចំពោះការប្រកាសរបស់លោកត្រាំ។ ប៉ុន្តែលោកមិនទាន់ដឹងផែនការរបស់លោកត្រាំមានអ្វីខ្លះទេ។ នេះហើយជាចំណោទបញ្ហាដ៏ធំមួយ។ យោងតាមការចុះផ្សាយរបស់សែតវ៉ាស៊ីនតោនប៉ុស្តិ៍, លោកត្រាំថ្លែងថាលោកសុខចិត្តទទួលស្គាល់តំបន់គ្រីមៀ និងតំបន់ដុនបាស់ជាទឹកដីរបស់រុស្ស៊ីដើម្បីជាថ្នូរនឹងសន្តិភាព។
ទីប្រឹក្សាលោកត្រាំ២នាក់បានបង្ហាញផែនការដោះស្រាយវិបត្តិអ៊ុយក្រែនជូនលោកពិនិត្យ។ ក្នុងនោះ អ៊ុយក្រែនត្រូវតែចូលតុចរចាដើម្បីទទួលបានជំនួយរបស់អាមេរិក។ កាលពីខែមិថុនា លោកពូទីនក៏ធ្លាប់និយាយដែរថាសង្គ្រាមនឹងបញ្ចប់ភ្លាមបើអ៊ុយក្រែនលែងចង់ចូលជាសមាជិកអង្គការណាតូ និងទទួលស្គាល់តំបន់៤ដែលរុស្ស៊ីកំពុងកាន់កាប់ជាទឹកដីស្របច្បាប់របស់រុស្ស៊ី។ រដ្ឋាភិបាលទីក្រុងកៀវចេញមកបដិសេធភ្លាម និងចាត់ទុកថាធ្វើបែបនេះមិនខុសពីទម្លាក់អាវុធចុះចាញ់នោះទេ។
លោកពូទីនថ្លែងថាដោយសារប្រទេសអាមេរិកកំពុងត្រៀមបោះឆ្នោត ដូច្នេះការសន្ទនាគ្នារវាងម៉ូស្គូ និងវ៉ាស៊ីនតោនមិនអាចទៅរួចទេ។ លោកសុខចិត្តរង់ចាំលទ្ធផលឆ្នោតនៅចុងឆ្នាំ២០២៤នេះ។ ចំពោះសំណួរថាតើលោកគិតដូចម្ដេចចំពោះការជជែកគ្នារវាងលោកត្រាំ និងលោកបៃដិនកាលពីយប់ថ្ងៃព្រហស្បិ៍សប្ដាហ៍មុននោះ? លោកពូទីនតបថាការជជែកគ្នានោះមានលក្ខណៈដាច់ជាកំណាត់ៗ។
លោកពូទីនធ្លាប់និយាយជាច្រើនដងថាលោកចង់ឃើញលោកបៃដិនជាប់ឆ្នោតនៅអាណត្តិថ្មី។ សូម្បីតែលោកបៃដិនឡើងវេទិកាតទល់មតិគ្នា ហើយនិយាយមិនសូវបានល្អយ៉ាងណាក្ដី លោកពូទីននៅតែមិនក្រឡាស់ពាក្យសម្ដីទេ។ លោកនៅតែចង់ឃើញលោកបៃដិនឈ្នះឆ្នោតដដែល។ លោកពូទីនថ្លែងថាលោកមិនសូវចាប់អារម្មណ៍ប៉ុន្មានទេទៅនឹងព័ត៌មានដែលចុះផ្សាយមានភាពលំអៀងពាក់ព័ន្ធនឹងការជជែកដេញដោលគ្នានោះ។ ប៉ុន្តែលោកក៏មិនបដិសេធថាអាមេរិកនៅតែជាប្រទេសមហាអំណាច៕
ចែករំលែកព័តមាននេះ