ទីក្រុងកៀវ៖ ប្រមុខដឹកនាំអ៊ុយក្រែនមិនដឹងជាលោកគិតយ៉ាងម៉េចទេបានជាលោកហាក់ដូចជាមិនចង់ចរចាគ្នាដើម្បីបញ្ចប់សង្គ្រាមទេទោះបីភាគីរុស្ស៊ីខំបោះដៃទៅរកលោកជាច្រើនលើកច្រើនសា។ ថ្មីៗនេះទៀត ទោះបីសម្ព័ន្ធមិត្តរបស់លោកពូទីនគឺនាយករដ្ឋមន្ត្រីហុងគ្រីបានធ្វើដំណើរទៅដល់ទីក្រុងកៀវដើម្បីនិយាយគ្នាពីរឿងនេះ ប៉ុន្តែលោកហ្សឺលែនស្គីនៅតែបដិសេធ។
លោកហ្សេឡិនស្គីទទួលដំណើរទស្សនកិច្ចរបស់នាយករដ្ឋមន្ត្រីហុងគ្រីទៅទីក្រុងកៀវអ៊ុយក្រែនមិនទាន់ប្រញាប់ប្រញាល់ពេកទេក្នុងការសម្របសម្រួលជាមួយរុស្ស៊ី។ អ៊ុយក្រែនមិនអាចបណ្ដោយឱ្យបាត់បង់ទឹកដីដើម្បីគ្រាន់តែដើម្បីបញ្ចប់សង្គ្រាមនោះទេ។ ខាងលើនេះជាការអះអាងរបស់មន្ត្រីជាន់ខ្ពស់របស់អ៊ុយក្រែនម្នាក់។ នេះក៏ជាការឆ្លើយតបទៅលោកដូណាល់ត្រាំដែលចេញសេចក្ដីថ្លែងការណ៍កាលពីពេលថ្មីៗនេះគូសបញ្ជាក់ថាបើលោកជាប់ឆ្នោតជាប្រធានាធិបតីអាមេរិកនៅអាណត្តិថ្មី លោកប្រើពេលតែមួយប៉ប្រិចភ្នែកប៉ុណ្នោះអាចបិទបញ្ចប់សង្គ្រាមអ៊ុយក្រែនជាស្ថាពរ។
![](https://kohsantepheapdaily.com.kh/wp-content/uploads/2024/07/1984ebd0ed87b16a5b830649b04dfde6-1.jpg)
នៅក្នុងដំណើរទស្សនកិច្ចទៅកាន់រដ្ឋធានីវ៉ាស៊ីនតោន អគ្គសេនាធិការកងទ័ពអ៊ុយក្រែន ឧត្ដមសេនីយ៍អានឌ្រី យេម៉ាក (Andriy Yermak) ថ្លែងប្រាប់អ្នកសារព័ត៌មានថារដ្ឋាភិបាលរបស់លោកមិនបដិសេធទេនូវការផ្ដល់មតិយោបល់ផ្សេងៗ។ ប៉ុន្តែត្រូវពិនិត្យមើលដែរ។ លុះត្រាតែមតិយោបល់នោះនាំទៅដល់ការបញ្ចប់សង្គ្រាម និងនាំមកនូវសន្តិភាពដ៏ពិតប្រាកដប្រកបដោយភាពយុត្តិធម៌ទើបអាចទទួលយកបាន។ មានន័យថាអ៊ុយក្រែនមិនសុខចិត្តបាត់បង់ទឹកដីដើម្បីជាថ្នូរនឹងសន្តិភាពទេ។
អគ្គសេនាធិការកងទ័ពអ៊ុយក្រែន ឧត្ដមសេនីយ៍អានឌ្រី យេម៉ាក (Andriy Yermak)នាយអគ្គសេនាធិការរូបនេះថ្លែងបន្តទៀតថាសម្រាប់ពេលនេះ យើងមិនទាន់ត្រៀមខ្លួនចរចាគ្នាដើម្បីជាថ្នូរនឹងតម្លៃដែលយើងចង់បានដូចជាឯករាជ្យភាព, សិទ្ធិសេរីភាព, លទ្ធិប្រជាធិបតេយ្យ, បូរណភាពទឹកដី, អធិបតេយ្យភាព។ល។ ដំណើរទស្សនកិច្ចរបស់លោកយេម៉ាកទៅវ៉ាស៊ីនតោនលើកនេះធ្វើឡើងមុនកិច្ចប្រជុំកំពូលរបស់អង្គការណាតូនៅវ៉ាស៊ីនតោននាសប្ដាហ៍ក្រោយ។ នៅក្នុងឱកាសនោះ គេរំពឹងថាបញ្ហាអុយក្រែននឹងក្លាយជារបៀបវារៈសំខាន់ជាងគេនៅក្នុងកិច្ចពិភាក្សា។
![](https://kohsantepheapdaily.com.kh/wp-content/uploads/2024/07/0de724397c74e5ab443d6f1e64ca6aa7.jpg)
សូមរំលឹកថានៅក្នុងវេទិកាតទល់មតិគ្នាកាលពីយប់ថ្ងៃព្រហស្បតិ៍ លោកត្រាំសន្យាថាឱ្យតែដឹងថាឈ្នះឆ្នោតភ្លាម លោកនឹងមិនបង្អង់យូរឡើយ នឹងចាប់ផ្ដើមគិតគូរដោះស្រាយបញ្ហាអ៊ុយក្រែនភ្លាមៗតែម្ដង មិនចាំបាច់រង់ចាំដល់ពេលស្បថឡើងកាន់តំណែងទេ។ លោកមិនបានបង្ហាញផែនការលម្អិតទេ។ ប៉ុន្តែសារព័ត៌មានផ្សាយថាទីប្រឹក្សាសំខាន់ៗ២រូបបានបង្ហាញផែនការដោះស្រាយបញ្ហានេះទៅលោកត្រាំ។ ក្នុងនោះមានលក្ខខណ្ឌមួយដែលរដ្ឋាភិបាលរបស់លោកត្រាំ (បើសិនជាប់ឆ្នោតនៅអាណត្តិថ្មី) នឹងចាប់បង្ខំឱ្យរដ្ឋាភិបាលទីក្រុងកៀវត្រូវតែចូលតុចរចា។ បើមិនដូច្នេះទេ វ៉ាស៊ីនតោននឹងកាត់ផ្ដាច់ជំនួយ។
![](https://kohsantepheapdaily.com.kh/wp-content/uploads/2024/07/3607e540433fb71bef11cfe306b00746-1.jpg)
ទោះជាយ៉ាងណាក្ដី បើតាមអ្វីដែលលោកត្រាំនិយាយនៅក្នុងការតទល់មតិនោះ លក្ខខណ្ឌរបស់លោកពូទីនក៏លោកមិនអាចទទួលយកបានឡើយ។ នៅក្នុងលក្ខខណ្ឌនោះ មានចំណុច១ដែលលោកពូទីនទាមទារឱ្យអ៊ុយក្រែនទទួលស្គាល់តំបន់ចំនួន៤ជាទឹកដីរុស្ស៊ី ហើយដែលកំពុងកាន់កាប់ដោយកងទ័ពរុស្ស៊ី៖ ដូញែត, លូហាន, ខឺសុន និងហ្សាប៉ូរីហ្សៀ។ នេះមិនទាន់គិតទៅដល់តំបន់គ្រីមៀដែលរុស្សីបានកាត់ខ្វៀលយកតាំងពីឆ្នាំ២០១៤នោះផងទេ។ នៅក្នុងក្រសែភ្នែករបស់អ៊ុយក្រែន កុំថាឡើយត្រូវប្រគល់តំបន់៤ទៅរុស្ស៊ី សូម្បីតែតំបន់គ្រីមៀក៏អ៊ុយក្រែនចិញ្ចឹមចិត្តថាត្រូវតែវាយយកមកវិញឱ្យបាន។
![](https://kohsantepheapdaily.com.kh/wp-content/uploads/2024/07/1bc63e1e84c5a536f9cfc97eea0ca67d.jpg)
រហូតមកដល់ពេលនេះ ប្រទេសអាមេរិកផ្ដល់ជំនួយយោធាជាង៥០ពាន់លានដុល្លារទៅឱ្យអ៊ុយក្រែន។ នេះមិនទាន់គិតទៅដល់ជំនួយសេដ្ឋកិច្ច ជំនួយស្ដារប្រទេសឡើងវិញ និងជំនួយមនុស្សធម៌នៅឡើយទេ។ លោកត្រាំថ្លែងថាអាមេរិកចាយលុយអស់ជាង១០០ពាន់លានដុល្លាររួចហើយដើម្បីអ្វីដែលលោកចាត់ទុកថាជាសង្គ្រាមបង្ហូរឈាមដ៏ឥតន័យ។ សង្គ្រាមនេះធ្វើឱ្យ ខាតបង់ទាំងរុស្ស៊ី អ៊ុយក្រែន អាមេរិក អឺរ៉ុប និងប្រទេសដទៃទៀតទូទាំងពិភពលោកដែលសុទ្ធតែរងផលប៉ះពាល់ពីវិបត្តិសេដ្ឋកិច្ច និងពាណិជ្ជកម្ម។ វ៉ាស៊ីនតោនត្រៀមផ្ដល់ជំនួយសន្តិសុខជាតិ២៣០០លានដុល្លារបន្ថែមទៀតសម្រាប់អ៊ុយក្រែន៕
ចែករំលែកព័តមាននេះ