រាជធានីភ្នំពេញ ៖ អ្នកនាំពាក្យក្រសួងការពារជាតិ នាយឧត្តមសេនីយ៍ ឈុំ សុជាត បានប្រកាសច្រានចោលទាំងស្រុង ចំពោះប្រព័ន្ធផ្សព្វផ្សាយបរទេសបានផ្សាយថា នៅមូលដ្ឋានកងទ័ពជើងទឹក នៅសមុទ្ររាមកម្ពុជា មានការបែងចែកតំបន់សម្រាប់មូលដ្ឋាននាវាយោធាចិន និងតំបន់នាវាយោធាកម្ពុជា ។
![](https://kohsantepheapdaily.com.kh/wp-content/uploads/2024/07/10331fdcaaa07927626d9226813389eb.jpg)
តាមរយៈគេហទំព័រហ្វេសប៊ុក នៅយប់ថ្ងៃទី២ ខែកក្កដានេះ នាយឧត្តមសេនីយ៍ ឈុំ សុជាត បានលើកឡើងថា ដើម្បីឆ្លើយតបនឹងសំណួរអ្នកសារព័ត៌មានមួយចំនួនដែលបានចោទសួរពាក់ព័ន្ធនឹងការចុះផ្សាយរបស់សារព័ត៌មាន Wall Street Journal កាលពីថ្ងៃទី០១ ខែកក្កដា ឆ្នាំ២០២៤ ដោយចោទប្រកាន់លើវត្តមាននាវាយោធា២គ្រឿង របស់ចិន នៅមូលដ្ឋានសមុទ្ររាមកងទ័ពជើងទឹកកម្ពុជា, ក្នុងនាមអ្នកនាំពាក្យក្រសួងការពារជាតិ បានបញ្ជាក់ចំនួន២ចំណុច ដូចខាងក្រោម ៖
១. នាវាយោធាចិន២គ្រឿង ដែលបានចូលចតនៅមូលដ្ឋានសមុទ្ររាមកងទ័ពជើងទឹកកម្ពុជានោះ គឺទើបតែមកដល់នាថ្មីៗនេះប៉ុណ្ណោះ ដែលជានាវាផ្លាស់ប្តូរវេនជាមួយនឹងនាវាយោធាចិនកន្លងទៅតាមកិច្ចព្រមព្រៀងរវាងក្រសួងការពារជាតិប្រទេសទាំងពីរ ដើម្បីមកបណ្តុះបណ្តាលជំនាញបច្ចេកទេសអំពីការប្រើប្រាស់នាវាដល់កងទ័ពជើងទឹកកម្ពុជា មិនដូច ការចុះផ្សាយរបស់សារព័ត៌មាន Wall Street Journal ដែលថា នាវានេះ បានចូលចតរយៈពេល៦ខែនោះឡើយ ។
![](https://kohsantepheapdaily.com.kh/wp-content/uploads/2024/07/25756111957ee09de1e29ffc163bc098.jpg)
២. ខ្ញុំសូមច្រានចោលទាំងស្រុងចំពោះការផ្សព្វផ្សាយថា នៅមូលដ្ឋានសមុទ្ររាមកងទ័ពជើងទឹកកម្ពុជា មានការបែងចែកតំបន់សម្រាប់មូលដ្ឋាននាវាយោធាចិន និងតំបន់នាវាយោធាកម្ពុជា ។ ការផ្សព្វផ្សាយបែបនេះ ជាជាចេតនាបង្កឱ្យមានភាន់ច្រឡំ ហើយមិនមែនជាការពិតនោះឡើយ ។
នៅមូលដ្ឋានសមុទ្ររាមកងទ័ពជើងទឹកកម្ពុជា កំពុងធ្វើការអភិវឌ្ឍជាបន្តបន្ទាប់ដោយក្នុងនោះមានតំបន់ខ្លះកំពុងសាងសង់តម្រូវឱ្យមានការហាមឃាត់មិនឱ្យមានចេញចូលនោះឡើយ ដែលនេះជាកិច្ចការសម្ងាត់របស់កងទ័ព ស្របតាមច្បាប់នៃព្រះរាជាណាចក្រកម្ពុជា ។
![](https://kohsantepheapdaily.com.kh/wp-content/uploads/2024/07/8bc4d95b31343225804e4661295a9803.jpg)
សូមជម្រាបថា បញ្ហាសមុទ្ររាមនេះគេសង្កេតឃើញថានៅតែជាចំណុចមួយដែរក្រុមប្រឆាំងយកមកនិយាយ ពិសេសនោះអ្នកសារព័ត៌មានអន្តរជាតិ នៅតែបន្តផ្សព្វផ្សាយព័ត៌មានទោះបីជារាជរដ្ឋាភិបាលបានបញ្ជាក់ និងបង្ហាញជំហរមិនអនុញ្ញាតឲ្យមានមូលដ្ឋានកងទ័ពប្រទេសណាមួយយកទឹកដីកម្ពុជា ដើម្បីប្រឆាំង ឬធ្វើការហាយប្រហារទៅលើប្រទេសទីបីជាច្រើនមកយ៉ាងណាក្តី ៕
ចែករំលែកព័តមាននេះ