រាជធានីភ្នំពេញ ៖ ជនសង្ស័យចំនួន២នាក់ ម្នាក់ជាសន្តិសុខបុរី ត្រូវបានអាវុធហត្ថរាជធានីភ្នំពេញ ឃាត់ខ្លួនបញ្ជូនទៅតុលាការ ពាក់ព័ន្ធចាំមើលផ្លូវអោយក្រុមជនសង្ស័យ ចូលធ្វើសកម្មភាពលួចគាស់ផ្ទះលួចយកសម្ភារៈ នៅក្នុងបុរី ចំនួន០៧លើក…
រាជធានីភ្នំពេញ ៖ ជនសង្ស័យចំនួន២នាក់ ម្នាក់ជាសន្តិសុខបុរី ត្រូវបានអាវុធហត្ថរាជធានីភ្នំពេញ ឃាត់ខ្លួនបញ្ជូនទៅតុលាការ ពាក់ព័ន្ធចាំមើលផ្លូវអោយក្រុមជនសង្ស័យ ចូលធ្វើសកម្មភាពលួចគាស់ផ្ទះលួចយកសម្ភារៈ នៅក្នុងបុរី ចំនួន០៧លើក ។
បើតាមកងរាជអាវុធហត្ថរាជធានីភ្នំពេញ បានអោយដឹងថា កាលពីយប់ថ្ងៃទី២៦ ខែមិថុនា ឆ្នាំ២០២៤ មានករណីគាស់ផ្ទះលួចយកទ្រព្យសម្បត្តិ កើតឡើងនៅចំណុចផ្ទះល្វែង ក្នុងបុរីមួយកន្លែង ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ ក្រោយមក កម្លាំងជំនាញអាវុធហត្ថរាជធានីភ្នំពេញ ក្នុងខណ្ឌសែនសុខ បានធ្វើការឃាត់ខ្លួនជនសង្ស័យ០១នាក់ ឈ្មោះ សុខ ចិន្តា ភេទប្រុស អាយុ៣៤ឆ្នាំ ព្រមជាមួយវត្ថុតាងមួយចំនួន រួមមាន ៖ ខ្សែភ្លើងកាត់កង់ៗ ចំនួន០២ វ៉ាឡូ, ម៉ូទ័រស្វាន ០១គ្រឿង, រណាអាដែក ០១ដើម, ដង្កាប់ ០២ដើម, ម៉ាលេត ០១, ពិល ០១, កាំបិតតាំងតោ ០១ និងជំពាមកៅស៊ូចំនួន០១ ព្រមជាមួយគ្រាប់កង់សំរាប់បាញ់ចំនួន០១ស្បោង ។
ក្រោយពេលស្តាប់ចម្លើយជនសង្ស័យ ឈ្មោះ សុខ ចិន្តា បានសារភាពថា ខ្លួនអាចចូលគាស់ផ្ទះខាងលើបាន ដោយសារមានការសហការពីសន្តិសុខបុរី ជាអ្នកផ្តល់ព័ត៌មាន និងចាំមើលផ្លូវ ។
បន្ទាប់មកកម្លាំងអាវុធហត្ថខណ្ឌសែនសុខ បានបន្តចុះឃាត់ខ្លួនជនសង្ស័យម្នាក់ទៀតឈ្មោះ កែវ សុខវ៉េត ភេទប្រុស អាយុ៤៣ឆ្នាំ ដែលជាសន្តិសុខបុរីខាងលើ ។
ជនសង្ស័យឈ្មោះ សុខ ចិន្តា បានបន្ថែមថា ខ្លួនមានបក្ខពួក ១២នាក់ (ប្រុស ០៨នាក់ និងស្រី០៤នាក់) បានដើរធ្វើសកម្មភាពលួចគាស់ផ្ទះនៅតាមបុរី លួចយកទ្រព្យសម្បត្តិ បានមួយចំនួន ដូចជា ៖ ខ្សែភ្លើង សម្ភារបន្ទប់ទឹក ទុយោ ម៉ាស៊ីនត្រជាក់ អំពូលភ្លើង។ល។ ចំពោះទីតាំងបុរីខាងលើនេះ ខ្លួនធ្លាប់លួចបានសម្រេច ០៧លើកមកហើយ ដោយមានសន្តិសុខយាមបុរីខាងលើជាអ្នកបោះដៃ និងចាំមើលផ្លូវ ។
ជនសង្ស័យ កែវ សុខវ៉េត ក៏បានឱ្យដឹងដែរថា ខ្លួនជាសន្តិសុខយាមវេនយប់ ក្នុងបុរីខាងលើ ហើយខ្លួនបានស្គាល់បុរសឈ្មោះ សុខ ចិន្តា រយៈពេល០៧ខែមកហើយ ហើយពិតជាបានចាំមើលផ្លូវអោយបុរសម្នាក់នោះ ចូលធ្វើសកម្មភាពលួចគាស់ផ្ទះលួចយកសម្ភារមួយចំនួន នៅក្នុងបុរីដែលខ្លួនធ្វើការ ចំនួន ០៧លើកពិតប្រាកដមែន ។
បច្ចុប្បន្ន ជនសង្ស័យទាំង០២នាក់ខាងលើ រួមនិងវត្ថុតាង ត្រូវបានកម្លាំងជំនាញ នៃកងរាជអាវុធហត្ថរាជធានីភ្នំពេញ កសាងសុំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់ ចំណែកឯបក្ខពួកដែលកំពុងរត់គេចខ្លួន អាវុធហត្ថរាជធានីភ្នំពេញ កំពុងស្រាវជ្រាវតាមចាប់ខ្លួនបន្ត ៕
ចែករំលែកព័តមាននេះ