រាជធានីភ្នំពេញ ៖ ក្រុមជនសង្ស័យចោរប្លន់ និងជាក្មេងទំនើងរហស្សនាម DMS (ក្រុមដើមស្តៅ) ដែលកន្លងមក តែងតែធ្វើសកម្មភាពកាប់ប្លន់ម៉ូតូ និងឆក់ទ្រព្យសម្បត្តិអ្នកដទៃជាច្រើនលើកច្រើនសារ ហើយបានគេចខ្លួនរួចដោយសុវត្ថិភាពនោះ…
រាជធានីភ្នំពេញ ៖ ក្រុមជនសង្ស័យចោរប្លន់ និងជាក្មេងទំនើងរហស្សនាម DMS (ក្រុមដើមស្តៅ) ដែលកន្លងមក តែងតែធ្វើសកម្មភាពកាប់ប្លន់ម៉ូតូ និងឆក់ទ្រព្យសម្បត្តិអ្នកដទៃជាច្រើនលើកច្រើនសារ ហើយបានគេចខ្លួនរួចដោយសុវត្ថិភាពនោះ ពេលនេះអស់លក្ខណ៍ក្រោមកណ្ដាប់ដៃកងរាជអាវុធហត្ថរាជធានីភ្នំពេញហើយ ។
ក្រុមជនសង្ស័យខាងលើ ត្រូវបានកម្លាំងអាវុធហត្ថរាជធានីភ្នំពេញ ធ្វើការបង្ក្រាបបានជាបន្តបន្ទាប់ចំនួន០៨នាក់ កាលពីពេលថ្មីៗកន្លងទៅនេះ និងបានកសាងសំណុំរឿងបញ្ជូនទៅកាន់សាលាដំដំបូងរាជធានីភ្នំពេញ នៅថ្ងៃទី០១ ខែកក្កដា ឆ្នាំ២០២៤ ដើម្បីផ្ដន្ទាទោសនិតិវិធី នៃតាមច្បាប់ ។
ក្រុមជនសង្ស័យជាចោរប្លន់ និងជាក្មេងទំនើងរហស្សនាម DMS (ក្រុមដើមស្តៅ) នេះរួមមាន ៖
១-ឈ្មោះ ចាន់ ប្រុសពៅ ហៅឆ្លូញ អាយុ២០ឆ្នាំ
២.ឈ្មោះ ហ៊ឹម សុខសេរីវឌ្ឍនា ហៅប្រេស អាយុ១៨ឆ្នាំ
៣.ឈ្មោះ សូវ៉ុន រតនៈ អាយុ ១៨ឆ្នាំ
៤.ឈ្មោះ វ៉ាត សីហា អាយុ ១៥ឆ្នាំ
៥.ឈ្មោះ ឡុង ដារ៉ា អាយុ ១៥ឆ្នាំ
៦.ឈ្មោះ ថន ភារុណ អាយុ ១៨ឆ្នាំ
៧.ឈ្មោះ ជ័យ សុខា ហៅជាំ អាយុ ១៨ឆ្នាំ
និង៨-ឈ្មោះ ឡេង វ៉ាន់ឌី អាយុ ១៧ឆ្នាំ ។
កងរាជអាវុធហត្ថ បានប្រាប់ឲ្យដឹងថា ក្រុមជនសង្ស័យខាងលើនោះ កន្លងមកតែងតែបានធ្វើសកម្មភាពកាប់ប្លន់ម៉ូតូ និងឆក់ទ្រព្យសម្បត្តិអ្នកដទៃជាច្រើនលើកច្រើនសារ នៅសង្កាត់ព្រែកកំពឹស វត្តឬស្សីសាញ់សង្កាត់ព្រៃស ខណ្ឌដង្កោ។ នៅម្ដុំភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ និងច្រមុះជ្រូកស្ទឹងមានជ័យ ខណ្ឌមានជ័យ រាជធានីភ្នំពេញ ពេលនេះ ក៏ត្រូវបានកម្លាំងកងរាជអាវុធហត្ថរាជធានីភ្នំពេញ ស្រាវជ្រាវរហូតឈានដល់ការឃាត់ខ្លួនជាបន្តបន្ទាប់ តែម្ដង ។
ក្រោយការចាប់ខ្លួន ជនសង្ស័យទាំង០៨នាក់ បានសារភាពប្រាប់កងរាជអាវុធហត្ថថា ពួកខ្លួន និងបក្ខពួកជាច្រើននាក់ផ្សេងទៀត ពិតជាបានប្រព្រឹត្តអំពើ ឆក់ កាប់ប្លន់ និងប្រើអំពើហិ.ង្សាជាច្រើនលើកច្រើនសារមកហើយ មានដូចជា ៖ ឆក់ទូរសព្ទ ចំនួន០២លើកនៅតាមផ្លូវជាតិលេខ៣ និងផ្លូវ៦០ម៉ែត្រ កាលពី៦ខែមុន ។ កាប់ប្លន់ម៉ូតូចំនួន០៤លើក នៅតាមផ្លូវជាតិលេខ៣ ជិតដល់ស្រុកកណ្តាលស្ទឹង ខេត្តកណ្តាល ចំណុចវត្តឬស្សីសាញ់ សង្កាត់ព្រៃស ចំណុចភូមិព្រែកកំពឹស ខណ្ឌដង្កោ និងចំណុចភូមិទួលពង សង្កាត់ចោមចៅទី១ ខណ្ឌពោធិ៍សែនជ័យ។ ធ្លាប់វាយកាប់គ្នា នៅសង្កាត់ព្រែកកំពឹស ខណ្ឌដង្កោ ផ្សារអ៊ីអន៣ផ្លូវ៦០ម៉ែត្រ ផ្លូវលេខ២១៧ ជិតស្រាបៀរកម្ពុជា ខណ្ឌដង្កោ ចំណុចលូប្រាំ ខណ្ឌមានជ័យ និងម្តុំទួលពង្រ ខណ្ឌពោធិ៍សែនជ័យ ដែលបណ្តាលឲ្យជនរងគ្រោះរងរបួស មានស្រាល និងមានធ្ងន់ ផងដែរ ។
បច្ចុប្បន្ន បក្ខពួកផ្សេងទៀតរបស់ក្រុមពួកគេ ដែលកំពុងរត់គេចខ្លួន សមត្ថកិច្ចជំនាញ អាវុធហត្ថរាជធានីភ្នំពេញ កំពុងស្រាវជ្រាវតាមចាប់ខ្លួនបន្ត ៕
ចែករំលែកព័តមាននេះ