រាជធានីភ្នំពេញ ៖ ឲ្យតែយ៉ាងៗនឹង អ្នកកាសែតអាជីព នឹងត្រូវស្អុយឈ្មោះអស់ហើយ ខណៈមានជនសង្ស័យ ចំនួន៥នាក់ កាន់សុទ្ធកាតកាសែតអនឡាញ ប៉ុន្តែតាមពិតគឺជាក្រុមចោរសោះ បើតាមព័ត៌មានបឋមឲ្យដឹងថា…
រាជធានីភ្នំពេញ ៖ ឲ្យតែយ៉ាងៗនឹង អ្នកកាសែតអាជីព នឹងត្រូវស្អុយឈ្មោះអស់ហើយ ខណៈមានជនសង្ស័យ ចំនួន៥នាក់ កាន់សុទ្ធកាតកាសែតអនឡាញ ប៉ុន្តែតាមពិតគឺជាក្រុមចោរសោះ បើតាមព័ត៌មានបឋមឲ្យដឹងថា កន្លងមកក្រុមនេះ តែងតែធ្វើសកម្មភាពបន្លំលួចទ្រព្យសម្បត្តិជនរងគ្រោះ នៅពេលមានឧប្បត្តិហេតុគ្រោះថ្នាក់ចរាចរណ៍កើតឡើងម្ដងៗ ពួកគេធ្វើសកម្មភាពលួចអីវ៉ាន់ ផ្សេងៗ និងរបស់របរមានតម្លៃ ព្រមទាំងកាបូបលុយ នៅក្នុងរថយន្តផងដែរ ហើយចុងក្រោយថ្លើមធំហ៊ានលួចកាំខ្លីម៉ាកឡុក ចំនួន២ដើមរបស់នគរបាល ដែលទុកនៅក្នុងរថយន្ត ទើបនគរបាលស្រាវជ្រាវឃាត់ខ្លួនបានជាបន្តបន្ទាប់តែម្ដង ។
យោងតាមព័ត៌មានបឋម បានប្រាប់ឲ្យដឹងថា ហេតុការណ៍ចុងក្រោយ លួចកាំភ្លើងនគរបាលនេះ បានកើតឡើងកាលពីវេលាយប់ថ្ងៃទី៣០ ខែមិថុនា ឆ្នាំ២០២៤ នៅតាមផ្លូវ៥០ម៉ែត្រ ត្រង់ចំណុចភ្លើងស្តុបឫស្សីសាញ់ ស្ថិតនៅក្នុងភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ ។
ជនសង្ស័យមានគ្នាសរុប ចំនួន៥នាក់ ហើយត្រូវនគរបាលឃាត់ខ្លួនបានចំនួន៤នាក់ហើយ ក្នុងនោះ ត្រូវបានស្គាល់ម្នាក់ គឺឈ្មោះ សួង បុរិន អាយុ៣៨ឆ្នាំ កាន់កាតកាសែតអនឡាញ «អង្គភាពគេហទំព័រនគរប៉ុស្តិ៍ធីវីអនឡាញ» ។
ជនសង្ស័យរូបនេះ មានទីលំនៅភូមិត្រពាំងលាន ឃុំចំបក់ ស្រុកបាទី ខេត្តតាកែវ និងស្នាក់នៅខាងក្រោយផ្សារកាណាស៊ីធី ភូមិព្រៃល្វា សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ចំណែកឯបក្ខពួក៤នាក់ទៀត ក្នុងនោះ៣នាក់ ត្រូវឃាត់ខ្លួន និងម្នាក់កំពុងរត់គេចខ្លួន ពុំទាន់ត្រូវបាននគរបាលប្រាប់ឲ្យដឹងពីអត្តសញ្ញាណនៅឡើយទេ ។
ប្រភពដដែល បានប្រាប់ឲ្យដឹងបន្តទៀតថា កន្លងមក ជនសង្ស័យ១ក្រុមនេះ តែងតែធ្វើសកម្មភាព បន្លំលួចទ្រព្យសម្បត្តិជនរងគ្រោះ នៅពេលមានឧប្បត្តិហេតុអ្នកគ្រោះថ្នាក់ចរាចរណ៍កើតឡើងម្ដងៗ មិនតែប៉ុណ្ណោះ ក៏តែងតែធ្វើសកម្មភាពលួចអីវ៉ាន់ផ្សេងៗ និងរបស់របរមានតម្លៃ ព្រមទាំងកាបូបលុយ នៅក្នុងរថយន្តផងដែរ។ ដោយឡែក ចុងក្រោយនេះ ហ៊ានច្បូតពុកមាត់ខ្លា មិនខ្លាចញញើតអ្វីឡើយ ដោយបានធ្វើសកម្មភាពលួចយកកាំភ្លើងខ្លីម៉ាកឡុក ចំនួន២ដើមរបស់នគរបាលព្រហ្មទណ្ឌកម្រិតធ្ងន់ នៃស្នងការដ្ឋានរាជធានីភ្នំពេញ ដែលទុកក្នុងរថយន្ត ។
ប្រភពខាងលើ បានប្រាប់បន្ថែមទៀតថា បន្ទាប់ពីលួចកាំភ្លើងខ្លី បានសម្រេច ក៏បាននាំគ្នាគេចខ្លួនបាត់អស់ ប៉ុន្តែក្រោយមកត្រូវបានកម្លាំងនគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋានរាជធានីភ្នំពេញ សហការជាមួយនគរបាលខណ្ឌដង្កោ ធ្វើការស្រាវជ្រាវរហូតឈានដល់ការឃាត់ខ្លួនបានចំនួន៣នាក់ ជាបន្តបន្ទាប់ នាំយកទៅធ្វើការសាកសួរ ។
ប្រភពមួយនេះ ក៏បានបញ្ជាក់ប្រាប់ទៀតថា រហូតដល់វេលាល្ងាចថ្ងៃទី២ ខែកក្កដា ឆ្នាំ២០២៤នេះ កម្លាំងនគរបាលខាងលើ បានចុះទៅសហការជាមួយនគរបាលខណ្ឌពោធិ៍សែនជ័យ ធ្វើការឃាត់ខ្លួនជនសង្ស័យឈ្មោះ សួង បុរិន ដល់កន្លែងស្នាក់នៅក្នុងខាងក្រោយផ្សារកាណាស៊ីធី ភូមិព្រៃល្វា សង្កាត់ចោមចៅទី២ ខណ្ឌពោធិ៍សែនជ័យ បានម្នាក់ទៀត ហើយជននេះគ្រាន់តែឃើញនគរបាលទៅដល់បានរត់ពួនលើដំបូលផ្ទះ និងយកក្រណាត់គ្របរថយន្តទៅគ្របពីលើ ប៉ុន្តែនៅតែនគរបាលរកឃើញ និងឃាត់ខ្លួនបានរួចដកហូតបានម៉ូតូ ១គ្រឿង ម៉ាកហុងដាឌ្រីមសេ១២៥ ពណ៍ខ្មៅ ស៊េរីឆ្នាំ២០២០ផងដែរ ។
នៅក្នុងប្រតិបត្តិការខាងលើនោះ កម្លាំងសមត្ថកិច្ចមានការប្រុងប្រយ័ត្នខ្លាំងណាស់ ព្រោះតែកាំភ្លើង ចំនួន២ដើម ដែលលួចបាននោះពុំដឹងថា នៅក្នុងដៃជនណាម្នាក់ពិតប្រាកដឡើយ ប៉ុន្តែក្រោយពីចាប់ខ្លួនឈ្មោះ សួង បុរិន ដែលជាជនទី៤នេះបាន។ ទើបនគរបាលដឹងថា កាំភ្លើងខ្លីនោះ នៅក្នុងដៃជនសង្ស័យទី៥ ហើយនគរបាលសង្ស័យថា ជននោះយកទៅលក់បាត់ហើយ បន្ទាប់មកនគរបាល បានតាមស្វែងរកឃាត់ខ្លួនជននោះ បន្តទៀតហើយ ៕
ចែករំលែកព័តមាននេះ