រាជធានីភ្នំពេញ ៖ រថយន្តដឹកស៊ីម៉ង់តិ៍ មួយគ្រឿង បានបើកបោះពួយ ជ្រុលឡើងចិញ្ចើមផ្លូវ ទៅបុកអ្នកលក់ទឹកសុទ្ធ បណ្តាលអោយបាក់ជើង និងបុកជាប់របងសាលា ណតប្រីដ ទៅមុខលែងរួច ។
គ្រោះថ្នាក់នេះ បានកើតឡើងកាលពីវេលាម៉ោងប្រមាណ១២ថ្ងៃត្រង់ ថ្ងៃទី០២ ខែកក្កដា ឆ្នាំ២០២៤ នៅចំណុចស្តុបណតប្រីដ ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ ។
រថយន្ត ដែលបង្កគ្រោះថ្នាក់ ជារថយន្តធុនធ្ងន់ ពុំស្គាល់ម៉ាកនោះទេ ពណ៌ខៀវ ពាក់ស្លាកលេខ ភ្នំពេញ 3B-8078 បើកបរដោយបុរសម្នាក់ ត្រូវបានសមត្ថកិច្ច ឃាត់ខ្លួន ។
តាមសាក្សី បានអោយដឹងថា នៅមុនពេលកើតហេតុ រថយន្តដឹកទំនិញមួយគ្រឿងខាងលើ បានធ្វើដំណើរតាមផ្លូវណតប្រីដ ក្នុងទិសដៅពីត្បូងទៅជើង ដោយល្បឿនលឿន។ នៅពេលមកដល់ចំណុចកើតហេតុ ជិតដល់ស្តុបស្រាប់តែ រថយន្តបានរ៉េចង្កូតទៅស្តាំដៃ ជ្រុលបុកអ្នកលក់ទឹកសុទ្ធ បណ្តាលអោយបាក់ជើង ហើយរថយន្តក៍បានជ្រុលឡើងចិញ្ចើមផ្លូវទៅបុក របងសាលាណតប្រីដ ដែលហ៊ុំព័ទ្ធទៅដោយផ្ទាំងប៉ាណូខុនដូរ ជាប់ទៅមុខលែងរួច។ បន្ទាប់ពីគ្រោះថ្នាក់ អ្នកបើកបរ ត្រូវបានកម្លាំងនគរបាលឃាត់ខ្លួន ៕
![](https://kohsantepheapdaily.com.kh/wp-content/uploads/2024/07/f63eb0fef0d37d614574bcb287890944.jpg)
![](https://kohsantepheapdaily.com.kh/wp-content/uploads/2024/07/3728aa66b2044624aee8c7ba5a0c4107.jpg)
ចែករំលែកព័តមាននេះ