រាជធានីភ្នំពេញ ៖ តូបជួសជុសកង្ហារ និងលក់អង្ករ នៅផ្សារទួលគោក ត្រូវបានអគ្គិភ័យឆាបឆេះយ៉ាងសន្ធោសន្ធៅ បណ្តាលអោយរងការខូចខាតស្ទើរតែស្រុង ហើយឆេះរាលដាលទៅតូបសាឡនមួយទៀត ជាន់ឡាវតឿ រងការខូចខាតទាំងស្រុង…
រាជធានីភ្នំពេញ ៖ តូបជួសជុសកង្ហារ និងលក់អង្ករ នៅផ្សារទួលគោក ត្រូវបានអគ្គិភ័យឆាបឆេះយ៉ាងសន្ធោសន្ធៅ បណ្តាលអោយរងការខូចខាតស្ទើរតែស្រុង ហើយឆេះរាលដាលទៅតូបសាឡនមួយទៀត ជាន់ឡាវតឿ រងការខូចខាតទាំងស្រុង ខណៈពេលដែលម្ចាស់ចាក់សោទុកចោល ។
ហេតុការណ៍នេះ បង្កអោយមានការភ្ញាក់ផ្អើល កាលពីវេលាម៉ោងប្រមាណ៩និង១៥នាទីព្រឹក ថ្ងៃទី០២ ខែមិថុនា ឆ្នាំ២០២៤នៅចំណុចតូបលក់អង្ករ ជួសជុល និងលក់កង្ហារលេខ BB01 នៅផ្នែកខាងត្បូងផ្សារទួលគោក ស្ថិតតាមបណ្ដោយផ្លូវលេខ៥៨៦ ក្រុម៥៨ ភូមិ១៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
ម្ចាស់តូប ដែលត្រូវភ្លើងឆេះឈ្មោះ អ៊ុក សុខ ភេទប្រុស អាយុ៦៥ឆ្នាំមុខរបរជួសជុសកង្ហារ និងលក់អង្ករ និងប្រពន្ធឈ្មោះ ចាន់ ប៉ក់ ភេទស្រី អាយុ៧០ឆ្នាំ ។
តាមព័ត៌មានអោយដឹងថា នៅមុនពេលកើតហេតុ គេឃើញតូបខាងលើ ម្ចាស់ចាក់សោទុកចោល ស្រាប់តែភ្លើងបានឆាបឆេះនៅជាន់លើ យ៉ាងសន្ធោសន្ធៅ ហើយបានឆេះរាលយ៉ាងខ្លាំងទៅតូបធ្វើសាឡនដែលនៅជាប់នោះបង្កអោយមានការភ្ញាក់ផ្អើលយ៉ាងខ្លាំងដល់សន្តិសុខ និងអ្នកក្បែរនាំគ្នាជួយពន្លត់ តែពុំអាចទប់ស្កាត់បាន ។ ភ្លាមរថយន្តពន្លត់អគ្គិភ័យជាច្រើនគ្រឿងទៅអន្តរាគមន៍បា.ញ់ពន្លត់ទើបភ្លើងបានរលត់ទៅវិញ ។
តាមនគរបាល បង្ការពន្លត់អគ្គិភ័យ និងសង្គ្រោះនៃស្នងការនគរបាលរាជធានីភ្នំពេញ បានអោយដឹងថា នៅក្នុងហេតុការណ៍នេះរថយន្តពន្លត់អគ្គិភ័យចំនួន២០គ្រឿង បានទៅអន្តរាគមន៍បាញ់ពន្លត់ក្នុងនោះរថយន្តការិ. អគ្គិភ័យ ចំនួន១៨គ្រឿង ប្រើប្រាស់ទឹកអស់ចំនួន១៨ឡាន ស្មើនឹង៧២ម៉ែត្រគូប និងរថយន្តជំនួយអន្តរាគមន៍ក្រសួងមហាផ្ទៃចំនួន០២គ្រឿង ហើយភ្លើងបានរលត់ទៅវិញ នៅវេលាម៉ោង១០ព្រឹក ។
តាមនគរបាលអោយដឹងទៀតថា អគ្គិភ័យនេះបណ្តាលអោយតូបលេខPD01 ខូចខាតសម្ភារៈ និងកង្ហារ គ្រឿងកង្ហារ អស់មួយចំនួន ហើយឆេះរាលដាលទៅតូបសាឡន លេខPD02 ជាន់ឡៅតឿ បណ្តាលអោយរងការខូចខាតទាំងស្រុង ។ អគ្គិភ័យនេះបណ្តាល មកពីទុស្សេខ្សែភ្លើង (ឆ្លងចរន្តអគ្គីសនី) ខណៈពេលដែលម្ចាស់ចាក់សោទុកចោល ៕
ចែករំលែកព័តមាននេះ