រាជធានីភ្នំពេញ ៖ អ្នកនាំពាក្យរង ក្រសួងមហាផ្ទៃ បានបកស្រាយបញ្ជាក់ថា កម្ពុជាមិនព្រងើយកន្តើយ ក្នុងការប្រយុទ្ធប្រឆាំងនឹងអំពើជួញដូរមនុស្សឡើយ ។
ការបញ្ជាក់នេះ បន្ទាប់ពីក្រសួងការបរទេសអាមេរិក បានចេញរបាយការណ៍មួយបង្ហាញថា កម្ពុជាបន្តស្ថិតក្នុងចំណាត់ថ្នាក់ទាបបំផុត ពាក់ព័ន្ធនឹងការចាត់វិធានការលុបបំបាត់ ឬទប់ស្កាត់ការជួញដូរមនុស្ស ។
តាមរយៈសារតេឡេក្រាម លោក ទូច សុខៈ ក៏បានចាត់ទុករបាយការណ៍នោះថា គ្រាន់តែជារបាយការណ៍នយោបាយ បម្រើរបៀបវារៈនយោបាយប៉ុណ្ណោះ។ ការដាក់ចំណាត់ថ្នាក់មកលើកម្ពុជា ពីសំណាក់អាមេរិក មិនមែនជារឿងថ្មីនោះឡើយ។ ការដាក់ចំណាត់ថ្នាក់ ក៏ដូចជា ការវាយតម្លៃអំពីស្ថានភាព នៃការការជួញដូរមនុស្សនៅកម្ពុជានោះ ជាការវាយតម្លៃ ដោយពុំមានសុក្រឹត្យភាព និងពុំមានព័ត៌មានគ្រប់ជ្រុងជ្រោយ ។
លោកបន្ដថា ជាក់ស្តែងក្នុងក្របខ័ណ្ឌក្រសួងមហាផ្ទៃ អភិសន្តិបណ្ឌិត ស សុខា ឧបនាយករដ្ឋមន្ត្រី ដ្ឋមន្ត្រីក្រសួងមហាផ្ទៃ តែងតែចង្អុលដឹកនាំជាប្រចាំឲ្យសមត្ថកិច្ច និងអាជ្ញាធរពាក់ព័ន្ធតាមដានស្ថានភាព នៃអំពើជួញដូរមនុស្សជាប្រចាំ ដើម្បីដាក់ចេញយន្តការនានា ក្នុងការបង្ការទប់ស្កាត់ និងបង្ក្រាបឲ្យបានទាន់ពេលវេលា ។
លោកបានគូសបញ្ជាក់ថា «មិនមែនមានន័យថា សមត្ថកិច្ចរបស់កម្ពុជា ព្រងើយកន្ដើយ ឬក៏បង្កលក្ខណៈឲ្យមានបទល្មើសជួញដូរមនុស្សនេះទេ។ នៅក្នុងក្របខ័ណ្ឌក្រសួងមហាផ្ទៃ ឯកឧត្តមអភិសន្ដិបណ្ឌិត ស សុខា គឺលោក តែងតែចង្អុលដឹកនាំជាប្រចាំឲ្យសមត្ថកិច្ច ប្រចាំដើម្បីដាក់ចេញ នូវយន្តការនានា ក្នុងការបង្ការទប់ស្កាត់ និងបង្ក្រាបឲ្យបានទាន់ពេលវេលា» ។
អ្នកនាំពាក្យរងរូបនេះបានបន្ដថា នាពេលកន្លងទៅ ក្នុងជំនួបសវនាការជាមួយបណ្តាអង្គទូតនានា លោកឧបនាយករដ្ឋមន្ដ្រី ស សុខា បានលើកឡើងជាបន្តបន្ទាប់អំពីយន្តការក្នុង ប្រយុទ្ធប្រឆាំងអំពីជួញដូរមនុស្សនេះ ។
យោងតាមរបាយការណ៍ ស្តីពីការជួញដូរមនុស្សរបស់ក្រសួងការបរទេសអាមេរិក បានបង្ហាញថា ប្រទេសកម្ពុជាបន្តស្ថិតនៅក្នុងចំណាត់ថ្នាក់ទាបបំផុត ពាក់ព័ន្ធនឹងការចាត់វិធានការលុបបំបាត់ ឬទប់ស្កាត់ការជួញដូរមនុស្ស ដែលនាំឲ្យប្រទេសអាស៊ីអាគ្នេយ៍មួយនេះ ស្ថិតក្នុងចំណាត់ថ្នាក់កម្រិត ៣ ឬ Tier 3 ។ កម្រិតបី (Tier 3) មានន័យថា រដ្ឋាភិបាលម្ចាស់ប្រទេសមិនបានប្រឹងប្រែងជាដុំកំភួន និងតាមបទដ្ឋាន ដូចមានចែងនៅក្នុងច្បាប់ ស្ដីពីការការពារជនរងគ្រោះដោយការជួញដូរ (TVPA) ៕
ចែករំលែកព័តមាននេះ