ខេត្តត្បូងឃ្មុំ ៖ លំនៅឋានរបស់ប្រជាពលរដ្ឋចំនួនពីរខ្នងស្មើនឹងពីរម្ចាស់ត្រូវបានអគ្គិភ័យលេបត្របាក់បង្កជាអណ្ដាតភ្លើងឆេះសន្ធោសន្ធៅ ដោយក្នុងនោះមាននៅស្រុកពញាក្រែក បង្ក៤ឡើងដោយកូនម្ចាស់ផ្ទះស្រវឹងស្រា និងស្រុកត្បូងឃ្មុំ ខណៈពេលម្ចាស់មិននៅចេញទៅស៊ីឈ្នួលគេ ដើម្បីយកប្រាក់មកផ្គត់ផ្គង់ជីវភាពគ្រួសារ ។
![](https://kohsantepheapdaily.com.kh/wp-content/uploads/2024/06/d4f48ca3f3a761bb4ad36bc7ee761971.jpg)
សមត្ថកិច្ចមូលដ្ឋានបានឲ្យដឹង នារសៀលថ្ងៃទី៣០ មិថុនាថា នៅចំណុចភូមិកោងកាងទី១ ឃុំកោងកាង ស្រុកពញាក្រែក វេលាម៉ោង៧យប់ ។ ថ្ងៃទី២៩ មិថុនា ឆ្នាំ២០២៤ ដោយបុរសម្នាក់ឈ្មោះ ចត់ វាំង អាយុ៣១ឆ្នាំ បានដុតបំផ្លាញផ្ទះរបស់ខ្លួនបង្កជាអគ្គិភ័យ ឆាបឆេះភ្ញាក់ផ្អើលដល់អ្នកជិតខាងនាំគ្នាជួយអន្តរាគមន៍ដងទឹកហ្នឹងបាញ់ទឹកជះពន្លត់មិនបានធ្វើឲ្យភ្លើងឆេះរាលដាលដល់ផ្ទះពលរដ្ឋនៅក្បែរខាងនោះទេ ។
សមត្ថកិច្ចមូលដ្ឋានបន្តឲ្យដឹងទៀតថា មុនពេលកើតហេតុ បុរសជាកូនម្ចាស់ផ្ទះរូបនេះបានផឹកស្រាស្រវឹង រករឿងឪពុកចុង ដោយឃើញស្ថានភាពបែបនេះ ឪពុកចុង និងប្រពន្ធមិនបាននៅផ្ទះទេ គឺរត់គេចទៅផ្ទះកូន ដែលនៅមិនឆ្ងាយពីកន្លែងកើតហេតុ ក្នុងគោលបំណងឲ្យមានសុវត្ថិភាព តែដោយសារស្រាចូលខ្លួនជាហេតុធ្វើឲ្យបុរសកូនម្ចាស់ផ្ទះមួរម៉ៅខឹងឪពុកចុងក៏បានដុតផ្ទះឆេះជាអណ្ដាតភ្លើង ។
![](https://kohsantepheapdaily.com.kh/wp-content/uploads/2024/06/c98eea9417b3608d68f8e68313f78eb2.jpg)
ភ្លាមនោះអ្នកក្បែរខាងឃើញទាន់ស្រែកប្រគោកប្រកាស នាំគ្នាជួយពន្លត់បានទាន់ពេលវេលាតែទំហំការឆេះគឺអស់ជាង៦០% ដូច្នេះផ្ទះឈើដែលមានទំហំ ៤គុណ៥ម៉ែត្រ មិនអាចឲ្យម្ចាស់ផ្ទះនៅបានទៀតនោះទេ ។
បើតាមលោកវរសេនីយ៍ឯកថាញ់ សុវ៉ាត អធិការនគរបាលស្រុកពញាក្រែកប្រាប់ឲ្យដឹងដែរថា ករណីអគ្គិភ័យមួយកើតឡើងបង្កដោយឈ្មោះ ចត់ វាំង ភេទប្រុស អាយុ៣១ឆ្នាំ ជាតិខ្មែរ រស់នៅភូមិ-ឃុំកើតហេតុខាងលើ បានធ្វើសកម្មភាពយកភ្លើងដុតផ្ទះរបស់ឈ្មោះម៉ូវ ថា ភេទប្រុស អាយុ៦១ឆ្នាំ ជាតិខ្មែរ រស់នៅភូមិ-ឃុំកើតហេតុខាងលើ បណ្តាលឲ្យឆាបឆេះ ផ្អើលឆោឡោ ប្រជាពលរដ្ឋ នាំគ្នាជួយពន្លត់ ដោយមានការសហការពីកម្លាំងសមត្ថកិច្ច និងកម្លាំងប្រជាការពារ ទើបពន្លត់បានទាំងស្រុក មិនរាលដាលដល់ផ្ទះអ្នកជិតខាងឡើយ ។
![](https://kohsantepheapdaily.com.kh/wp-content/uploads/2024/06/186d68d24fa0f8afb2ca9f52b3ecd964.jpg)
ក្រោយហេតុការណ៍កើតឡើងភ្លាម កម្លាំងសមត្ថកិច្ចយើង បានចាប់ខ្លួនជនសង្ស័យឈ្មោះ ចត់ វាំង ខាងលើ បញ្ជូនមកកាន់អធិការដ្ឋាននគរបាលស្រុកពញាក្រែក ដើម្បីសាកសួរ និងបំពេញសំណុំរឿងតាមនីតិវិធី ។ សូមបញ្ជាក់ថា កាលពីកន្លះខែមុនពេលកើតខេត្តបុរសដែលដុតផ្ទះនេះធ្លាប់បានគំរាមកំហែងឪពុកចុងម្ដងរួចមកហើយ ។
ចំពោះករណីអគ្គិភ័យទី២វិញ គឺបានកើតឡើង នៅថ្ងៃទី២៥ មិថុនា ២០២៤ វេលាម៉ោង៤:០០នាទីទៀបភ្លឺ មានករណីភ្លើងឆេះផ្ទះប្រជាពលរដ្ឋនៅភូមិមជ្ឈឹមភាគ ឃុំអញ្ចើម ស្រុកត្បូងឃ្មុំ ខេត្តត្បូងឃ្មុំ ។ -ម្ចាស់ផ្ទះឈ្មោះសន សុខនី ភេទប្រុស អាយុ៥២ឆ្នាំ ជាតិខ្មែរ ប្រពន្ធឈ្មោះ សឿង ឃាន ជាតិខ្មែរ មានកូនចំនួន០៥ នាក់ខូចខាតទាំងស្រុង ។ ផ្ទះមួយខ្នងទំហំ៥*៦ ម៉ែត្រ ធ្វើអំពីឈើ ដំបូលប្រក់សង្គ័សី ជញ្ជាំងបាំងប្រទាំ និងស័ង្កសីសម្ភារៈខូចខាតរួមមាន ÷ -គ្រែឈើ០១ កង់០១ សម្ភារៈផ្ទះបាយ និងឯកសារផ្ទាល់ខ្លួនមួយចំនួន ។ – មូលហេតុបណ្ដាលមកពីឆ្លងចរន្តអគ្គិសនី ហើយម្ចាស់មិននៅផ្ទះចេញទៅស៊ីឈ្នួលគេ ដើម្បីយកថវិកាផ្គត់ផ្គង់ជីវភាពគ្រួសារ ៕
![](https://kohsantepheapdaily.com.kh/wp-content/uploads/2024/06/5add7dd398a693a90946b32d21cc9a89.jpg)
![](https://kohsantepheapdaily.com.kh/wp-content/uploads/2024/06/41c569c135da10888af33300a42d8dfb.jpg)
![](https://kohsantepheapdaily.com.kh/wp-content/uploads/2024/06/b5173f95d646d98ca8f854984d71e5b1.jpg)
![](https://kohsantepheapdaily.com.kh/wp-content/uploads/2024/06/b51e99a854ac8f7be83abc57a0f8c81b.jpg)
ចែករំលែកព័តមាននេះ