ខេត្តស្វាយរៀង ៖ រថយន្តបុកបន្តកន្ទុយគ្នា ចំនួន០៣គ្រឿង បណ្តាលឲ្យមានមនុស្សរងរបួសធ្ងន់ស្រាល ចំនួន០៣នាក់ មូលហេតុបើកបរខ្វះការប្រុងប្រយត្ន័ ។
ករណីគ្រោះថ្នាក់ចរាចរណ៍នេះ កើតឡើងនៅវេលាម៉ោង០៧និង១៥នាទីព្រឹកថ្ងៃទី២៨ ខែមិថុនា ឆ្នាំ២០២៤ នៅលើកំណាត់ផ្លូវជាតិលេខ១ ត្រង់ចំណុចខាងលិច ខ្លោងទ្វារវត្តបន្ទាយ ស្ថិតនៅភូមិអង្គស្វាយ ឃុំប្រសូតិ ស្រុកស្វាយទាប ។
បើតាមអ្នកឃើញហេតុការណ៍ បានឲ្យដឹងថា មុនពេលកើតហេតុ គេឃើញមានរថយន្តដឹកកម្មករ-កម្មការិនី និងរថយន្តគ្រួសារ បើកបរពីទិសខាងលិចទៅកើត វ៉ាជែងគ្នាពេញផ្លូវ លុះមកដល់កន្លែងកើតហេតុ រថយន្តម៉ាកហ៊ីយ៉ាន់ដាយ ដឹកកម្មករ-កម្មការិនីពេញ ក៏បានវ៉ាក់ ជាមួយអ្នកបើកម៉ូតូ មកពីមុខ ក៏ជាន់ហ្វ្រាំងប្រថុចញ៉ុច បង្កឲ្យរថយន្តតូយ៉ូតាព្រូស ពាក់ស្លាកលេខភ្នំពេញ 2AK-0969 បុកចូលក្រោមគូថរថយន្តដឹកកម្មករពីក្រោយ ពេញទំហ៊ឹង ហើយក៏មានរថយន្តក្រឡុកស៊ីម៉ង់ដ៏ ១គ្រឿងទៀត បើកស្របទិសគ្នា ក៏បានជ្រុលបុករថយន្តតូយ៉ូតាព្រូស ពីក្រោយពេញទំហ៊ឹងបន្ថែមទៀត បណ្តាលឲ្យរថយន្តព្រូស រុញផ្ទប់ខ្ទេចខាងមុខ និងខាងក្រោយធ្ងន់ធ្ងរ បណ្តាលឲ្យអ្នកបើកបររថយន្តព្រូស និងអ្នករួមដំណើររងរបួសធ្ងន់ស្រាល០៣នាក់ ត្រូវបានប្រជាពលរដ្ឋ ជួយគាស់ទាញយកពីក្នុងរថយន្ត និងហៅរថយន្តសង្គ្រោះដឹកបញ្ជូនទៅមន្ទីរពេទ្យបង្អែកស្រុកស្វាយទាប ផងដែរ ។
បន្ទាប់មក សមត្ថកិច្ចចុះធ្វើការវាស់វែង ហើយសមត្ថកិច្ចបានយករថយន្តទាំង០៣គ្រឿង ទៅរក្សាទុកនៅអធិការដ្ឋាននគបាលស្រុកស្វាយទាប រង់ចាំដោះស្រាយនៅពេលក្រោយ ។
សមត្ថកិច្ច បានសន្និដ្ឋានជាបឋមថា មូលហេតុអ្នកបើកបររថយន្តទាំង០៣គ្រឿង បើកបរខ្វះការប្រុងប្រយត្ន័ បើកកៀកិតគ្នាពេក(ចន្លោះសុវត្ថិភាព) ទើបបង្កគ្រោះថ្នាក់ បែបនេះ ៕
![](https://kohsantepheapdaily.com.kh/wp-content/uploads/2024/06/a39ec54f99228e6bd4929762be734bed.jpg)
![](https://kohsantepheapdaily.com.kh/wp-content/uploads/2024/06/2161fee93a8685139996892363237402.jpg)
![](https://kohsantepheapdaily.com.kh/wp-content/uploads/2024/06/8e3d9db8387bade68008e6a9583268f4.jpg)
ចែករំលែកព័តមាននេះ