ខេត្តសៀមរាប ៖ ពលរដ្ឋចំនួន២ភូមិ ប្រមាណជាង១០០នាក់ គឺភូមិជ្រៃ និងភូមិប្រិយ៍ សង្កាត់ទឹកវិល ក្រុងសៀមរាប លើកគ្នាកាន់កាំបិត និងផ្គាក់ដេញកាប់មន្ត្រីអាជ្ញាធរជាតិអប្សរា ខណៈនាំគ្នាចុះមក រុះរើស្ពានដើរឆ្លងទឹកប្រឡាយ និងផ្ទះកំពុងជួសជុល មិនបានសម្រេច នាំគ្នារត់យកព្រះអាយុ ចោល រថយន្ត និង ម៉ូតូ។
ការផ្ទុះតវ៉ារវាងអាជ្ញាធរអប្សរា និងប្រជាពលរដ្ឋនោះបានធ្វើឡើងនៅថ្ងៃទី២៧ ខែមិថុនា ឆ្នាំ២០២៤ ស្ថិតនៅក្នុងភូមិសាស្ត្រសង្កាត់ទឹកវិល ក្រុងសៀមរាប ។
![](https://kohsantepheapdaily.com.kh/wp-content/uploads/2024/06/2de2ef63a0280dc7f36e17be450c0563.jpg)
បើតាមប្រភពពីប្រជាពលរដ្ឋបានរៀបរាប់ថា កម្លាំងអាជ្ញាធរជាតិអប្សរា បានចុះមករុះរើស្ពានជួសជុលសម្រាប់ពលរដ្ឋឆ្លងកាត់ទឹក និងផ្ទះកំពុងជួសជុល ខណៈពេលនោះប្រជាពលរដ្ឋនៅក្នុងភូមិ ចំនួន២ភូមិ គឺភូមិជ្រៃ និងភូមិប្រិយ៍ សង្កាត់ទឹកវិល ក្រុងសៀមរាប ។ ឃើញដូច្នោះ ក៏បានលើកគ្នា ដេញកាប់ពួកអាជ្ញាធរអប្សរាឱ្យរត់បាតជើងសព្រាតទៅវិញ ខណៈចុះមករុះរើស្ពាន និងផ្ទះប្រជាពលមិនបានសម្រេច ។ ដោយមិនបានពិភាក្សាណាមួយជាមួយអ្នកភូមិសោះ គឺកោងកាចតាមអំណាចដែលមាន ។
តាមប្រភពបានឱ្យដឹងថា ទីតាំងទី១ ស្ថិតនៅក្នុងភូមិជ្រៃ សង្កាត់ទឹកវិល ក្រុងសៀមរាប ដែលមានម្ចាស់ផ្ទះឈ្មោះ ភឿន សុភាព ភេទប្រុស អាយុ៥១ឆ្នាំ មុខរបរនគរបាល ។ ទីតាំងទី២ ស្ថិតនៅភូមិប្រីយ៍ចាស់ សង្កាត់ទឹកវិល ក្រុងសៀមរាប មានម្ចាស់ផ្ទះឈ្មោះ ម៉ៅ សួង ភេទប្រុស អាយុ៦០ឆ្នាំ មុខរបរ នាយការិយាការពារអាកាសចំណុះយុទ្ធភូមិភាគទី៤។
![](https://kohsantepheapdaily.com.kh/wp-content/uploads/2024/06/42bab1394f57cafbddbb7d343735f1e0.jpg)
តាមប្រភពបានបញ្ជាក់ថា ចំពោះការចុះរុះរើសំណង់ខាងលើនោះ គឺមានបងប្អូនប្រជាពលរដ្ឋ មកចំនួន២ភូមិ ចូលរួមក្នុងការតវ៉ាប្រហែល១៥០នាក់។ ការផ្ទុះតវ៉ានេះ ធ្វើឱ្យ ក្រុមការងាររបស់អាជ្ញាធរជាតិអប្សរាមិនបានរុះរើសំណង់ខុសច្បាប់ទាំង២ នោះទេ ប៉ុន្តែបានឱ្យម្ចាស់ផ្ទះទាំង២នាក់ខាងលើ ធ្វើកិច្ចសន្យារុះរើដោយខ្លួនឯង។
ព័ត៌មានបន្ថែមនឹងមានផ្សាយនៅលើទំព័រកាសែតកោះសន្តិភាព ៕
![](https://kohsantepheapdaily.com.kh/wp-content/uploads/2024/06/d7d5347a6b0ccd8b09f27177af8ae2b8.jpg)
![](https://kohsantepheapdaily.com.kh/wp-content/uploads/2024/06/b35e6783a48f9f2e6ed8c3b488d48e54.jpg)
![](https://kohsantepheapdaily.com.kh/wp-content/uploads/2024/06/0928b47706310a8980c1c889ca8057a7.jpg)
ចែករំលែកព័តមាននេះ