ក្រុមហ៊ុន រ៉ូយ៉ាល់ រ៉ៃវេ កម្ពុជា បានអះអាងនៅថ្ងៃទី២៦ ខែមិថុនា ឆ្នាំ២០២៤ ថា រថភ្លើងជជុះដឹកពីជប៉ុនទាំង១១គ្រឿង បានបញ្ចប់ការត្រួតពិនិត្យ និងសាកល្បងដំណើរការនៅលើផ្លូវដែ
ក្រុមហ៊ុន រ៉ូយ៉ាល់ រ៉ៃវេ កម្ពុជា បានអះអាងនៅថ្ងៃទី២៦ ខែមិថុនា ឆ្នាំ២០២៤ ថា រថភ្លើងជជុះដឹកពីជប៉ុនទាំង១១គ្រឿង បានបញ្ចប់ការត្រួតពិនិត្យ និងសាកល្បងដំណើរការនៅលើផ្លូវដែកនៅកម្ពុជាហើយនៅពេលនេះ ។
ក្រុមហ៊ុននេះ បានបញ្ជាក់ថា «សូមស្វាគមន៍ Kiha 182-183 ២ទូចុងក្រោយឆ្លងកាត់ ការតេស្តបើកបរសាកល្បងមកកាន់ស្ថានីយ៍ភ្នំពេញ ដោយជោគជ័យនារសៀលថ្ងៃទី២៦ ខែមិថុនា ឆ្នាំ២០២៤នេះ» ។
ប្រភពដដែល បានឲ្យដឹងថា ក្រុមហ៊ុន បានកំពុងយកចិត្តទុកដាក់យ៉ាងខ្លាំងលើការថែទាំ ធ្វើតេស្តលើប្រព័ន្ធសុវត្ថិភាព ដំណើរការកង់ ប្រព័ន្ធហ្វ្រាំង ម៉ាស៊ីនត្រជាក់ ច្រកទ្វារចេញចូល ជណ្តើរឡើងចុះសម្រាប់អ្នកដំណើរ សម្ភារបរិក្ខារផ្សេងៗទៀត ក៏ដូចជាសុវត្ថិភាពនៅតាមផ្លូវ រួមទាំងសុវត្ថិភាពដែលមានផ្លូវគោកឆ្លងកាត់ផ្លូវដែក ដើម្បីធានាជូនបាននូវសុវត្ថិភាពខ្ពស់ និងមានផាសុកភាព មុននឹងសម្រេចដាក់ឱ្យដំណើរការទូថភ្លើងថ្មីនេះ។
ប្រភពដដែល បានជូនដំណឹងថា សេវាកម្មដឹកអ្នកដំណើរ ដោយប្រើរថភ្លើងទាំងនេះ នឹងដំណើរការជាផ្លូវការក្នុងពេលឆាប់ៗខាងមុខនេះ ប៉ុន្តែមិនបញ្ជាក់លំអិតឡើយ ។
តាមការជូនដំណឹងពីមុន សម្រាប់ផ្លូវដែកពីភ្នំពេញទៅខេត្តព្រះសីហនុ ឆ្លងកាត់តាកែវ កំពត នឹងអាចរត់បាននៅក្នុងល្បឿន៨០គីឡូម៉ែត្រ នៅក្នុងមួយម៉ោង ប៉ុន្តែសម្រាប់មួយខ្សែទៀតពីភ្នំពេញទៅប៉ោយប៉ែត ឆ្លងកាត់កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ នឹងអាចរត់នៅក្នុងល្បឿនត្រឹមពី ៣០ទៅ ៥០ គីឡូម៉ែត្រតែប៉ុណ្ណោះ នៅក្នុងមួយម៉ោង ។
ចែករំលែកព័តមាននេះ