ទីក្រុងស៊ីដនី៖ នៅទីបំផុត ម្ចាស់គេហទំព័រវីឃីលីក (Wikileak) ដែលផ្សព្វផ្សាយឯកសារសម្ងាត់របស់ប្រទេសអាមេរិកកាលពីអតីតកាលនោះត្រូវចៅក្រមនៃតុលាការអាមេរិកដោះលែងឱ្យមានសេរីភាពវិញហើយនៅព្រឹកថ្ងៃពុធនេះ។ គាត់ត្រូវអាជ្ញាធរអាមេរិកចង់ចាប់ខ្លួនតាំងពីយូរមកហើយដើម្បីកាត់ទោសពីបទផ្សព្វផ្សាយឯកសារសម្ងាត់របស់យោធាអាមេរិក។
ចាប់ពីពេលនេះតទៅ, លោកជូនលាន អាសាង (Julian Assange) អាចធ្វើដំណើរដោយសេរីដោយគ្មានការតាមចាប់ចងតទៅទៀតឡើយ។ នេះបើតាមការប្រកាសរបស់ចៅក្រមតុលាការកោះម៉ារីយ៉ានខាងជើង (Northern Mariana Islands) ដែលជាដែនដីរបស់អាមេរិកនៅក្រៅប្រទេស។ មុនពេលដោះលែង, អូស្ត្រាលី និងអាមេរិកបានចរចាត្រូវរ៉ូវគ្នាដើម្បីបញ្ចប់សំណុំរឿងចោទប្រកាន់លោកអាសាង។ ប៉ុន្តែអាមេរិកបានដាក់លក្ខខណ្ឌឱ្យលោកអាសាងទទួលស្គាល់ទោសកំហុសរបស់ខ្លួន។
នៅក្នុងបន្ទប់សវនាការ លោកអាសាងទទួលស្គាល់ថាខ្លួនពិតជាបានប្រព្រឹត្តកំហុស១ករណីពីបទទទួលឯកសារសម្ងាត់ពាក់ព័ន្ធនឹងវិស័យការពារជាតិអាមេរិក និងផ្សព្វផ្សាយឯកសារទាំងនោះនៅលើគេហទំព័ររបស់គាត់ឈ្មោះវីឃីលីក (Wikileak)។ លោកអាសាងដែលមានវ័យ៥២ឆ្នាំរូបនេះថ្លែងថា «ក្នុងនាមជាអ្នកកាសែតម្នាក់, គាត់បានលើកទឹកចិត្តឱ្យប្រភពដែលផ្ដល់ដំណឹងឱ្យគាត់ខិតខំបញ្ចេញឯកសារសម្ងាត់»។ ចាប់តាំងពីឆ្នាំ២០១០ លោកអាសាងបានផ្សព្វផ្សាយនៅលើគេហទំព័ររបស់គាត់នូវឯកសារសម្ងាត់រាប់សែនទំព័រ។ កាលពីថ្ងៃចន្ទសប្ដាហ៍នេះ លោកអាសាងត្រូវបានដោះលែងពីពន្ធនាគារអង់គ្លេស។
ថ្ងៃនេះ តុលាការបានកាត់ទោសឱ្យគាត់ជាប់ពន្ធនាគារ៥ឆ្នាំ និង២ខែ។ ប៉ុន្តែទោសនេះសន្មតថាគាត់បានអនុវត្តចប់សព្វគ្រប់អស់ហើយនៅពេលគាត់ជាប់ឃុំនៅអង់គ្លេសដើម្បីរង់ចាំធ្វើបត្យាប័នទៅប្រទេសអាមេរិក។ ដូច្នេះ មានន័យថាតុលាការកាត់ទោសតម្រឹមដើម្បីឱ្យគាត់រួចខ្លួនត្រឹមហ្នឹងចុះ។ អាសាងមើលទៅមានអារម្មណ៍ហត់នឿយខ្លាំងគួរសមដែរ ជាពិសេស ហត់នឿយផ្លូវចិត្តណាស់។ ប៉ុន្តែយ៉ាងហោចណាស់គាត់អាចមានអារម្មណ៍ធូរទ្រូងបន្ទាប់ពីស្ដាប់សេចក្ដីប្រកាសរបស់ចៅក្រម។
មូលហេតុដែលប្រទេសអាមេរិកជ្រើសរើសយកការកាត់ទោសលោកអាសាងនៅលើកោះម៉ារីយ៉ានខាងជើងដោយសារគាត់មិនព្រមធ្វើដំណើរទៅកាត់ទោសនៅប្រទេសអាមេរិកទេ។ ម៉្យាងទៀត បើដឹកគាត់ទៅអាមេរិកក៏មានរយៈចម្ងាយឆ្ងាយពេកពីប្រទេសអូស្ត្រាលី។ នេះបើតាមការបញ្ជាក់របស់តុលាការ។ ក្រោយការសម្រេចថ្ងៃនេះ លោកអាសាងនឹងជិះយន្តហោះទៅរដ្ឋធានីកង់ប៊ែរ៉ា (Canberra) ប្រទេសអូស្ត្រាលី។ នេះបើយោងតាមការបញ្ជាក់របស់ក្រុមការងារវីឃីលីកនៅលើបណ្ដាញទ្វីតថឺ។
នាយករដ្ឋមន្ត្រីអូស្ត្រាលីថ្លែងថាការបិទបញ្ចប់សំណុំរឿងនេះដោយភ្ជាប់លក្ខខណ្ឌទទួលស្គាល់ទោសកំហុសរបស់ជនជាប់ចោទអាចចាត់ទុកជាដំណឹងល្អ។ គ្រាន់តែថាសំណុំរឿងនេះហាក់ដូចជាអូសបន្លាយពេលវេលាយូរពេកហើយ។ លោកយល់ថាបើទុកជាគេឃុំឃាំងលោកអាសាងយូរតទៅទៀតក៏គ្មានបានទទួលផលប្រយោជន៍អ្វីដែរ។ គេដឹងថាប្រទេសអាមេរិកចោទប្រកាន់ធ្ងន់ៗណាស់ចំពោះលោកអាសាង។ បើតុលាការរកឃើញថាមានទោស, គាត់អាចនឹងជាប់ពន្ធនាគារ១៧៥ឆ្នាំ។
លោកអាសាងមានទាំងអ្នកស្អប់ និងអ្នកស្រឡាញ់។ សម្រាប់អ្នកដែលស្រឡាញ់សិទ្ធិសេរីភាពខាងសារព័ត៌មាន និងការបញ្ចេញមតិ ពួកគេចាត់ទុកលោកអាសាងដូចជាវីរបុរស។ ប៉ុន្តែសម្រាប់អ្នកដែលមិនពេញចិត្តនឹងការបញ្ចេញឯកសារសម្ងាត់ ពួកគេយល់ថាគាត់ជាមនុស្សចង្រៃរកលេខដាក់គ្មាន។ ពួកគេយល់ថាទង្វើរបស់គាត់បង្កគ្រោះថ្នាក់ចំពោះសន្តិសុខជាតិ និងវិស័យស៊ើបការណ៍សម្ងាត់របស់ប្រទេសអាមេរិក។
អាជ្ញាធរអាមេរិកចង់នាំខ្លួនលោកអាសាងឡើងតុលាការពីបទផ្សព្វផ្សាយឯកសារសម្ងាត់អំពីយុទ្ធនាការយោធានៅអ៊ីរ៉ាក់ និងអាហ្វហ្កានីស្ថាន។ លោកអាសាងធ្លាប់រស់នៅក្នុងស្ថានទូតប្រទេសអេក្វាឌ័រប្រចាំប្រទេសអង់គ្លេសរយៈពេល៧ឆ្នាំដើម្បីគេចចេញពីការចាប់ខ្លួនបញ្ជូនទៅស៊ុយអែតដើម្បីកាត់ទោសពីបទសង្ស័យថាគាត់បានបៀតបៀនកេរខ្មាសនារីមួយចំនួន។ ប៉ុន្តែក្រោយមក ការចោទប្រកាន់នោះត្រូវគេទម្លាក់ចោលវិញ៕
ចែករំលែកព័តមាននេះ