ទីក្រុងកៀវ៖ កងទ័ពអ៊ុយក្រែនអះអាងថាពួកគេបន្តឈរជើងនៅនៅទីក្រុងផូករ៉ូស និងរារាំងកងទ័ពរុស្ស៊ីមិនឱ្យវាយសម្រុកចូលទីក្រុងនេះបានឡើយ។ អ៊ុយក្រែនបានវាយប្រហារកងទ័ពរុស្ស៊ីនៅចំណុចកណ្ដាលនៃទីក្រុងដែលរងខូចខាតយ៉ាងដំណំដោយសារសង្គ្រាម។ ពួកគេ (ទ័ពអ៊ុយក្រែន) អាចវាយយកបានមកវិញនូវស្ថានីយរថភ្លើងមួយកន្លែង, សាកលវិទ្យាល័យ និងមូលដ្ឋានរបស់កងទ័ពរុស្ស៊ី។ នេះបើយោងតាមសេចក្ដីប្រកាសរបស់កងទ័ពប្រតិបត្តិការវាយលុកទី៧របស់អ៊ុយក្រែន។
មូលដ្ឋានរបស់យើងនៅភាគកណ្ដាលទីក្រុងនៅដដែល ការប្រយុទ្ធគ្នាតូចៗនៅតែបន្ត ហើយពួកសត្រូវរបស់យើងមិនអាចវាយសម្រុកបន្ថែមទៀតទេ។ ទីក្រុងផូករ៉ូសត្រូវគេដាក់រហស្សនាមថា «បន្ទាយការពារតំបន់ដូញែត» ដែលជាខ្សែត្រៀមសំខាន់របស់អ៊ុយក្រែននៅភាគខាងកើត និងមានតំណភ្ជាប់ទៅទីក្រុងតូចធំនានាដែលបង្កើតបានជាកំពែងការពាររបស់អ៊ុយក្រែននៅភាគខាងកើត។ រុស្ស៊ីចាប់ផ្ដើមបើកយុទ្ធនាការវាយយកទីក្រុងផូករ៉ូសកាលពីរដូវក្ដៅឆ្នាំ២០២៤។
កងទ័ពរុស្ស៊ីមិនប្រើយុទ្ធសាស្ត្រវាយទម្លុះខ្សែការពារចូលទីក្រុងផូករ៉ូសទេ។ ប៉ុន្តែពួកគេប្រើយុទ្ធសាស្ត្រហ៊ុមព័ទ្ធពីខាងក្រៅ និងបិទខ្ទប់កងទ័ពអ៊ុយក្រែនដែលចង់បញ្ជូនទៅជួយទីក្រុងនេះ។ បន្ទាប់មក រុស្ស៊ីចូលតំបន់កណ្ដាលក្រុងផូករ៉ូសដោយសន្សឹមៗ។ រុស្ស៊ីវាយនៅតំបន់ជាយក្រុងខាងត្បូងឆ្ពោះទៅកាន់តំបន់ឌីនីប្រូប៉េត្រូស (Dnipropetrovsk) ដែលនៅក្បែរនោះ។
ក្រុមអ្នកជំនាញយោធាយល់ថាទីក្រុងផូករ៉ូសលែងមានសារៈសំខាន់ផ្នែកភស្តុភារតទៅទៀតហើយសម្រាប់កងទ័ពអ៊ុយក្រែន។ ប៉ុន្តែបើសិនកងទ័ពរុស្ស៊ីវាយយកទីក្រុងនេះបាន ពួកគេងាយស្រួលវាយចូលមូលដ្ឋានដទៃទៀតនៅតំបន់ដូញែត។ ម៉្យាងទៀត បើបណ្ដោយឱ្យរុស្ស៊ីវាយយកបានទីក្រុងនេះបាន វាប្រៀបបាននឹងការទះមួយកំផ្លៀងយ៉ាងដំណំសម្រាប់អ៊ុយក្រែន។
កងប្រតិបត្តិការសឹកទី៧របស់អ៊ុយក្រែនថ្លែងថានៅពេលវាយរុញច្រានកងទ័ពរុស្ស៊ីចេញពីទីតាំងកណ្ដាលនៃទីក្រុងផូករ៉ូសរួចហើយ អ៊ុយក្រែនអាចបញ្ឈប់រុស្ស៊ីមិនឱ្យកសាងកម្លាំងនៅក្នុងទីក្រុងនេះផង និងបញ្ឈប់ការដាក់សម្ពាធទៅលើខ្សែការពាររបស់អ៊ុយក្រែននៅភាគខាងជើងទីក្រុងនេះផង។ កងប្រតិបត្តិការដដែលនេះថ្លែងនៅក្នុងសេចក្ដីប្រកាសបន្តទៀតថាកងទ័ពរុស្ស៊ីបាត់បង់កម្លាំងប្រយុទ្ធអស់ជាច្រើននៅពេលពួកគេព្យាយាមវាយឆ្លងកាត់ផ្លូវរថភ្លើងដែលខណ្ឌចែកទីក្រុងនេះភាគខាងកើត និងភាគខាងលិច។ ទាហានរុស្ស៊ីប្រហែល៤រយនាក់បានស្លាប់នៅផូករ៉ូសចាប់តាំងពីដើមខែវិច្ឆិកា។ នេះបើយោងតាមប្រភពពីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ