ទីក្រុងញូយ៉ក៖ អង្គការសុខភាពពិភពលោករកឃើញថាគ្រឿងស្រវឹងសម្លាប់មនុស្សជិតបីលាននាក់ក្នុងមួយឆ្នាំៗ។ ថ្វីដ្បិតអត្រាមរណភាពដោយសារគ្រឿងស្រវឹងថយចុះបន្តិចវិញនៅរយៈពេលប៉ុន្មានឆ្នាំចុងក្រោយនេះ ប៉ុន្តែអង្គការសុខភាពពិភពលោកយល់ថាអត្រានេះនៅតែមិនទាន់អាចទទួលយកបាននៅឡើយទេ។ របាយការណ៍ថ្មីបំផុតស្ដីពីគ្រោះថ្នាក់នៃការទទួលទានគ្រឿងស្រវឹងបង្ហាញថានៅក្នុងចំណោមអ្នកស្លាប់ទូទាំងពិភពលោក ៥%ស្លាប់ដោយសារគ្រឿងស្រវឹង។
គ្រោះថ្នាក់នេះមិនមែនមានន័យថាគ្រឿងស្រវឹងជាអ្នកសម្លាប់ដោយផ្ទាល់នោះទេ។ ប៉ុន្តែស្លាប់ដោយប្រយោលដោយសារការប្រើគ្រឿងស្រវឹង។ ឧទាហរណ៍ បើកបរក្រោមឥទ្ធិពលគ្រឿងស្រវឹងក៏បណ្ដាលឱ្យស្លាប់, ការប្រើប្រាស់អំពើហិង្សា ឬការបៀតបៀនធ្ងន់ធ្ងរក៏បណ្ដាលឱ្យស្លាប់ ហើយនឹងការកើតជំងឺតម្កាត់ផ្សេងៗទាំងផ្លូវកាយ និងផ្លូវចិត្តក៏បណ្ដាលឱ្យស្លាប់ដូចគ្នា។
របាយការណ៍របស់អង្គការសុខភាពពិភពលោកបង្ហាញថាកាលពីឆ្នាំ២០១៩ មនុស្សស្លាប់២,៦លាននាក់ដោយសារគ្រឿងស្រវឹង។ មានន័យថាវាមានចំណែក៤,៧%នៃអត្រាមរណភាពសរុប។ ជិត៣៥%នៃជនរងគ្រោះជាបុរស។ នាយកអង្គការសុខភាពពិភពលោក លោកថេដ្រូស (Tedros) ថ្លែងថាការប្រើប្រាស់គ្រឿងស្រវឹងពិតជាបង្កគ្រោះថ្នាក់ខ្លាំងណាស់សម្រាប់សុខភាពមនុស្ស ធ្វើឱ្យកើតជំងឺរ៉ាំរ៉ៃ និងមានបញ្ហាសុខភាពផ្លូវចិត្ត។ នៅទីបំផុតធ្វើឱ្យមនុស្សស្លាប់រាប់លាននាក់ក្នុងមួយឆ្នាំៗ។
លោកទទួលស្គាល់ថាការប្រើប្រាស់គ្រឿងស្រវឹងថយចុះចាប់ពីឆ្នាំ២០១០ ហើយគ្រោះថ្នាក់ផ្សេងៗដោយសារគ្រឿងស្រវឹងក៏ថយចុះផងដែរ។ ប៉ុន្តែបញ្ហាចោទចំពោះសុខភាព និងចំពោះសង្គមនៅតែមានកម្រិតខ្ពស់ដែលមិនទាន់អាចទទួលយកបាននៅឡើយទេ។ ចំណុច១ទៀត យុវជនក្មេងៗចាប់ផ្ដើមប្រឡូកនៅក្នុងវិស័យគ្រឿងស្រវឹងកាន់តែច្រើន។ ជាក់ស្ដែង នៅក្នុងចំណោមអ្នកស្លាប់ដោយសារគ្រឿងស្រវឹងកាលពីឆ្នាំ២០១៩ ភាគច្រើនជាមនុស្សដែលមានអាយុចន្លោះពី២០-៣៩ឆ្នាំ។
ជំងឺមហារីក និងគ្រោះថ្នាក់ចរាចរណ៍ដោយសារគ្រឿងស្រវឹង
ការសេពគ្រឿងស្រវឹងជាប់ពាក់ព័ន្ធយ៉ាងជិតស្និទ្ធនឹងការចុះទ្រុឌទ្រោមផ្នែកសុខភាពរួមទាំងការកើតជំងឺរលាកថ្លើម និងជំងឺមហារីកផងដែរ។ នៅក្នុងចំណោមអត្រាមរណភាពដោយសារគ្រឿងស្រវឹងកាលពីឆ្នាំ២០១៩ របាយការណ៍របស់អង្គការសុខភាពពិភពលោករកឃើញថាមនុស្ស១,៦លាននាក់ស្លាប់ដោយសារជំងឺមិនឆ្លង, ជាង៤៧ម៉ឺននាក់ស្លាប់ដោយសារជំងឺស្ទះសរសៃបេះដូង, ជាង៤០ម៉ឺននាក់ស្លាប់ដោយសារជំងឺមហារីក និងជាង៧២ម៉ឺននាក់ស្លាប់ដោយសារគ្រោះថ្នាក់ចរាចរណ៍ និងការធ្វើអត្តឃាត។
ការទទួលទានគ្រឿងស្រវឹងហួសប្រមាណក៏អាចធ្វើឱ្យមនុស្សកើតជំងឺរបេង អេដស៍ និងរលាកសួតផងដែរ។ ក្នុងចំណោមអ្នកទទួលទានគ្រឿងស្រវឹងច្រើនៗហួសប្រមាណ បើតាមរបាយការណ៍ស្រាវជ្រាវឆ្នាំ២០១៩ ពួកគេទទួលទានជាតិអាល់កុលសុទ្ធចូលទៅក្នុងខ្លួនជាមធ្យម២៧ក្រាមក្នុងមួយថ្ងៃ។ មានន័យថាពួកគេអាចជាអ្នកផឹកស្រាទំពាំងបាយជូរ១ថ្ងៃ២កែវ, ផឹកស្រាបៀរដប១ថ្ងៃ២ដប ឬស្រាស១ថ្ងៃ២កែវ៕
ចែករំលែកព័តមាននេះ