ខេត្តបាត់ដំបង៖ ទីតាំងប្រព្រឹត្តបទល្មើសនេសាទចំនួន០៣កន្លែង នៅតំបន់ទន្លេសាប ក្នុងទឹកដីឃុំកោះជីវាំង ក្នុងស្រុកឯកភ្នំ ត្រូវបានកម្លាំងចម្រុះចុះទៅកាប់កំទេចចោល កាលពីព្រឹកថ្ងៃទី១៩ មិថុនា ។ នេះបើតាមសេចក្ដីរាយការណ៍សមត្ថកិច្ចដែលចុះបង្ក្រាបបទល្មើសនេះ។…
ខេត្តបាត់ដំបង៖ ទីតាំងប្រព្រឹត្តបទល្មើសនេសាទចំនួន០៣កន្លែង នៅតំបន់ទន្លេសាប ក្នុងទឹកដីឃុំកោះជីវាំង ក្នុងស្រុកឯកភ្នំ ត្រូវបានកម្លាំងចម្រុះចុះទៅកាប់កំទេចចោល កាលពីព្រឹកថ្ងៃទី១៩ មិថុនា ។ នេះបើតាមសេចក្ដីរាយការណ៍សមត្ថកិច្ចដែលចុះបង្ក្រាបបទល្មើសនេះ។
សេចក្ដីរាយការណ៍បានឲ្យដឹងថា ទីតាំងដែលមានប្រព្រឹត្តបទល្មើសនេសាទដែលកម្លាំងចម្រុះចុះទៅបង្ក្រាបនោះ ស្ថិតក្នុងភូមិសាស្ត្រ ភូមិព្រែកទាល់ ឃុំកោះជីវាំង។ តំបន់នោះ ជនល្មើសបានដាក់ពង្រាយឧបករណ៍នេសាទដោយខុសច្បាប់ពាសពេញផ្ទៃទឹក ដោយប្រើប្រាស់ស្បៃមុងដាក់ពង្រាយមួយខ្សែៗរាប់រយម៉ែត្រ និងជាច្រើនកន្លែង ។
នៅក្នុងកិច្ចប្រតិបត្តិការនេះ កម្លាំងចម្រុះក្នុងស្រុកឯកភ្នំបានកាប់បំផ្លាញបទល្មើសនេះចំនួន០៣ទីតាំងក្នុងនោះ កាប់កំទេចរបាំងសាច់អួនប្រវែង២,២៥០ម៉ែត្រ កំទេចឡុកចាប់ត្រីចំនួន០៥កន្លែង និង ដកបង្គោលឈើចំនួន១,២០០ដើម ប៉ុន្តែសមត្ថកិច្ចរកមិនឃើញម្ចាស់បទល្មើសទេ ។
បទល្មើសនេសាទនៅតែបន្តកើតមានស្អេកស្កះពាសពេញតំបន់ទន្លេសាប បើទោះកម្លាំងចម្រុះបានចុះបង្ក្រាបជាប្រចាំក្ដី។ នេះបើតាមប្រភពព័ត៌មានពីប្រជាពលរដ្ឋដែលរស់នៅតំបន់ទន្លេសាប។ ជាពិសេស នៅក្នុងភូមិសាស្ត្រ ស្រុកឯកភ្នំនេះតែម្ដង។
ជនប្រព្រឹត្តបទល្មើសនេសាទនៅតែមានឱកាសលួចដាក់ពង្រាយឧបករណ៍នេសាទដោយខុសច្បាប់ ពាសពេញតំបន់ទន្លេសាប ដោយសារពួកជនល្មើសទាំងនោះ មិនត្រូវបានសមត្ថកិច្ចឃាត់ខ្លួនយកទៅផ្តន្ទាទោស។ ដូច្នេះហើយ ទើបពួកគេនៅតែមានឪកាសប្រព្រឹត្តបទល្មើសយ៉ាងគគ្លើនដដែល៕
ចែករំលែកព័តមាននេះ