ខេត្តបាត់ដំបង ៖ បុរស០២នាក់ដែលគេស្គាល់ព្រាលៗធ្លាប់ធ្វើជា «ឌីជេ» ឃើញមុខម្ដងម្កាលនៅតាមក្លិបរាត្រី ត្រូវបានកម្លាំងកងរាជអាវុធហត្ថឃាត់ខ្លួន ក្រោយបទសង្ស័យ«ជួញដូរគ្រឿងញៀន» កាលពីវេលាម៉ោង១០ និង២០នាទីព្រឹកថ្ងៃទី១៨ មិថុនា…
ខេត្តបាត់ដំបង ៖ បុរស០២នាក់ដែលគេស្គាល់ព្រាលៗធ្លាប់ធ្វើជា «ឌីជេ» ឃើញមុខម្ដងម្កាលនៅតាមក្លិបរាត្រី ត្រូវបានកម្លាំងកងរាជអាវុធហត្ថឃាត់ខ្លួន ក្រោយបទសង្ស័យ«ជួញដូរគ្រឿងញៀន» កាលពីវេលាម៉ោង១០ និង២០នាទីព្រឹកថ្ងៃទី១៨ មិថុនា ស្ថិតនៅភូមិអូរតាគាំ២ សង្កាត់ទូលតាឯក ក្រុងបាត់ដំបង ។
របាយការណ៍កងរាជអាវុធហត្ថបានឲ្យដឹងថា ជនសង្ស័យទាំង០២នាក់ ម្នាក់ឈ្មោះ យិន សិលា ហៅកូ អាយុ៣០ឆ្នាំ (ឌីជេ) នៅភូមិ-សង្កាត់កើតហេតុ និងម្នាក់ទៀតឈ្មោះសាយ រស្មី អាយុ២៧ឆ្នាំ (ឌីជេ) នៅភូមិព្រែកព្រះស្ដេច សង្កាត់ព្រែកព្រះស្ដេច ក្រុងបាត់ដំបង ។
ជនទាំង០២នាក់ ត្រូវបានកម្លាំងការិយាល័យជំនាញកងរាជអាវុធហត្ថឃាត់ខ្លួនពេលកំពុងជូញដូរគ្រឿងញៀនដោយខុសច្បាប់ថែមទាំងឆែកឆេរកឃើញគ្រឿងញៀនជាច្រើនប្រភេទ ដែលជនសង្ស័យរក្សាទុក ហើយត្រូវបានដកហូតជាវត្ថុតាង ។
បើតាមមន្ត្រីកងរាជអាវុធហត្ថបានបង្ហាញរបាយការណ៍វត្ថុតាងដែលរឹបអូសបានពីក្រុម «ឌីជេ» ត្បាញអាយខាងលើនេះ រួមមាន ១-ថ្នាំញៀនប្រភេទម្ស៉ៅក្រាមពណ៌.សថ្លា កេតាមីន (ខេ) ចំនួន០៦កញ្ចប់មានទម្ងន់៤៦,៩៤ក្រាម ២-ថ្នាំញៀនប្រភេទម្ស៉ៅទំពាំងបាយជូ (MDMA) ចំនួន០៦កញ្ចប់ទម្ងន់៤២,៧៣ក្រាម ៣-ថ្នាំញៀនប្រភេទគ្រាប់ ពណ៌ផ្កាឈូក (អ៊ិចស្ដាស៊ី) ចំនួន០៣គ្រាប់ ៤-ជញ្ជីងសម្រាប់ថ្លឹងគ្រៀងញៀនចំនួន០២ ៥-បារីអេឡិចត្រូនិក(vape)ចំនួន៩២ដើម និងវត្ថុតាងពាក់ព័ន្ធមួយចំនួនទៀត ។
ប្រភពនានាដែលធ្លាប់ស្គាល់ប្រវត្តិ «ឌីជេ»ទាំង០២នាក់នេះបានឲ្យដឹងថា តាមពិត «ឌីជេ»ត្បាញអាយទាំង០២នាក់ បានឆក់ឱកាសលក់ដូរថ្នាំញៀនប្រភេទដូចខាងលើនេះយូរមកហើយ ។ ប្រភពបានឲ្យដឹងទៀតថា ពួកគេធ្វើជាអ្នកចាក់បទភ្លេង ឬបង្ហាញមុខនៅតាមក្លិបរាត្រីម្ដងម្កាល គ្រាន់តែជាលេស ដើម្បីលក់ដូរគ្រឿងញៀនដែលជាមុខរបរសំខាន់របស់ពួកគេ ព្រោះនៅតាមក្លិបរាត្រី ឬនៅតាមក្លិបខារ៉ាអូខេ មួយចំនួនសំបូរម៉ូយប្រើប្រាស់ថ្នាំញៀនប្រភេទនេះ ។
យ៉ាងណា «ឌីជេ»គ្រឿងញៀនទាំង០២នាក់បានជាប់អន្ទាក់សមត្ថកិច្ចហើយ។ ពេលនេះមន្ត្រីជំនាញកំពុងសួរនាំ និងចាត់ការតាមនីតិវិធី៕
ចែករំលែកព័តមាននេះ