ទីក្រុងវេលីងតុន៖ នេះអាចចាត់ទុកថាជាសំណាង១នៅក្នុងចំណោម១ពាន់គ្រោះថ្នាក់។ យន្តហោះដឹកអ្នកដំណើរ១គ្រឿងរបស់ក្រុមហ៊ុនអាកាសចរណ៍អូស្ត្រាលីនៅពេលហោះហើរចេញពីប្រទេសនូវែលហ្សេឡង់សុខៗស្រាប់តែឆេះម៉ាស៊ីនម្ខាងដោយឥតដឹងមូលហេតុច្បាស់លាស់។ អ្នកបើកយន្តហោះអាចដោះស្រាយបញ្ហានេះបាន ដោយបិទម៉ាស៊ីនដែលឆេះ ហើយរកមើលព្រលានយន្តហោះណាដែលនៅជិតបំផុតដើម្បីចុះចតនៅក្នុងគ្រាអាសន្ន។
នៅអំឡុងពេលប្រថុចញ៉ុចនោះ អាកាសយានិកប្រញាប់ទាក់ទងទៅព្រលានយន្តហោះដែលគាត់ចង់ចុះចតដើម្បីឱ្យគេត្រៀមទីកន្លែង និងត្រៀមឡានបាញ់ទឹកទុកឱ្យហើយ។ សាក្សីនិយាយថានៅពេលហេតុការណ៍នេះកើតឡើងកាលពីថ្ងៃចន្ទ គេឃើញម៉ាស៊ីនយន្តហោះម្ខាងឆេះយ៉ាងសន្ធោសន្ធៅ។ ជាធម្មតា យន្តហោះដឹកអ្នកដំណើរខ្នាតធំច្រើនមានម៉ាស៊ីន២គ្រឿង។ ដូច្នេះ បើយន្តហោះឆេះម៉ាស៊ីនម្ខាង គេអាចបិទកុងតាក់ដើម្បីពន្លត់ម៉ាស៊ីនដែលឆេះ ហើយអាចប្រើម៉ាស៊ីនតែម្ខាងក៏បានដែរ។
តាមរយៈរូបថតដែលគេផ្ដិតយកពីវីឌីអូឃ្លីបដែលសាក្សីថតបាន បានបង្ហាញថាភ្លើងចាប់ផ្ដើមឆាបឆេះយ៉ាងសន្ធោសន្ធៅ។ អ្នកបើកយន្តហោះខិតខំបញ្ជាដៃចង្កូតដើម្បីចុះចតជាបន្ទាន់នៅព្រលានយន្តហោះដែលនៅជិតបំផុត។ ពេលនោះ យន្តហោះពោរពេញដោយភាពក្រឡាប់ចាក់ ម្ដងផ្អៀងទៅឆ្វេង ម្ដងផ្អៀងទៅស្ដាំ។ សារព័ត៌មានផ្សាយថាអ្នកដំណើរនៅក្នុងយន្តហោះនោះក៏មានអ្នករងរបួសជាច្រើននាក់ផងដែរដោយសារការប៉ះទង្គិចក្បាលគ្នា ឬប៉ះទង្គិចនឹងរបស់របរនៅក្នុងយន្តហោះ ។ ប៉ុន្តែរបួសបន្តិចបន្តួចមិនថ្វីទេ។ ធ្វើម៉េចឱ្យតែអាចរក្សាជីវិតឱ្យនៅគង់វង្ស។យន្តហោះម៉ាកបូអ៊ីង៧៣៧របស់ក្រុមហ៊ុនអាកាសចរណ៍វើជីន អូស្ត្រាលី (Virgin Australia) កំពុងហោះហើរនៅលើផ្ទៃអាកាសនូវែលហ្សេឡង់សំដៅទៅទីក្រុងមែលប៊ន ប្រទេសអូស្ត្រាលីសុខៗមិនទាន់ដល់គោលដៅផងស្រាប់តែចុះចតជាបន្ទាន់នៅទីក្រុងអ៊ីវើខាហ្គីល (Invercargill) ប្រទេសនូវែលហ្សេឡង់។ នៅពេលទៅដល់ព្រលានយន្តហោះឃើញឡានទឹករង់ចាំយ៉ាងត្រៀបត្រាដើម្បីពន្លត់ភ្លើង។ យន្តហោះនេះចាកចេញដំណើរពីទីក្រុងឃ្លីនថោន (Queenstown) បានប្រហែល៥០នាទីក៏ជួបនឹងហេតុការណ៍នេះតែម្ដង។ នេះបើតាមការឱ្យដឹងពីលោកលីន ក្រូសុន (Lynn Crosson) ជាអ្នកគ្រប់គ្រងក្រុមអ្នកពន្លត់អគ្គិភ័យ និងសង្គ្រោះបន្ទាន់នៃប្រទេសនូវែលហ្សេឡង់។
គេមិនទាន់ដឹងថាមូលហេតុអ្វីបានជាយន្តហោះនេះឆេះម៉ាស៊ីនម្ខាង ហើយក៏មិនដឹងថាមានអ្នកដំណើរប៉ុន្មាននាក់នៅលើយន្តហោះនោះដែរ។ នេះបើតាមការបញ្ជាក់របស់អ្នកនាំពាក្យអាកាសយានដ្ឋានឃ្វីនថោន។ ប៉ុន្តែប្រភពខ្លះថាមានអ្នកដំណើរ៧៣នាក់។ ក្រុមហ៊ុនអាកាសចរណ៍វើជីន អូស្ត្រាលី យល់ថាឧបទ្ទវហេតុឆេះម៉ាស៊ីនយន្តហោះលើកនេះអាចបណ្ដាលមកពីសត្វបក្សីហើរទៅបុកយន្តហោះ ឬហោះចូលកង្ហារយន្តហោះ។
ករណីសត្វបក្សីហើរចូលក្នុងកង្ហារយន្តហោះ ឬហើរទៅបុកយន្តហោះមានកម្រិត០,០៤% មានន័យថានៅក្នុងចំណោមជើងហោះហើរទៅមក១ម៉ឺនដងមាន៤ដងដែលជួបនឹងហេតុការណ៍នេះ។ នេះបើតាមការរៀបរាប់របស់អាកាសចរណ៍ស៊ីវិលនូវែលហ្សេឡង់នៅលើគេហទំព័ររបស់ខ្លួន។ យន្តហោះអាចនឹងរងគ្រោះកម្រិតណាអាស្រ័យទៅលើកត្តាជាច្រើនដូចជា៖ សត្វបក្សីហើរទៅប៉ះចំកន្លែងណានៃយន្តហោះ? សត្វបក្សីទំហំប៉ុណ្ណា? និងអ្នកបើកយន្តហោះចេះគ្រប់គ្រងសភាពការណ៍នៅក្នុងគ្រាអាសន្នបែបនេះបានល្អកម្រិតណា។ មានន័យថាបើមើលស្ថានភាពមិនស្រួលទេ អាកាសយានិកប្រញាប់រកកន្លែងចុះចតទាន់ពេលវេលាប្រហែលជាអាចជួយស្រោចស្រង់ស្ថានការណ៍បាន។
នៅក្នុងព្រឹត្តិការណ៍មួយទៀត កាលពីថ្ងៃអាទិត្យ នូវែលហ្សេឡង់ក៏ជួបប្រទះនឹងបញ្ហាយន្តហោះផងដែរ។ លើកនេះកើតឡើងចំពោះយន្តហោះយោធាដែលដឹកនាយករដ្ឋមន្ត្រីនូវែលហ្សេឡង់ផ្ទាល់តែម្ដង។ យន្តហោះនោះត្រូវដឹកលោកគ្រីសស្តូហ្វឺ ឡាក់សុន (Christopher Luxon) ទៅប្រទេសជប៉ុនដើម្បីបំពេញទស្សនកិច្ចជាផ្លូវការ។ ប៉ុន្តែគួរឱ្យស្ដាយ, នៅពេលចូលចាក់សាំងនៅប្រទេសប៉ាពួញូហ្គីណេ យន្តហោះនេះក៏ខូចម៉ាស៊ីនតែម្ដង។ តាមគម្រោង, លោកឡាក់សុនត្រូវស្នាក់នៅប្រទេសជប៉ុនបួនថ្ងៃដើម្បីផ្សព្វផ្សាយវិស័យធុរកិច្ច។ នៅពេលជួបនឹងឧបទ្ទវហេតុនេះ លោកត្រូវបង្ខំចិត្តធ្វើដំណើរតាមយន្តហោះឯកជនវិញម្ដង។ ដំណឹងនេះទើបតែត្រូវខុទ្ទកាល័យរបស់លោកបង្ហើបឱ្យដឹងកាលពីថ្ងៃចន្ទ។
សារព័ត៌មាននូវែលហ្សេឡង់ចុះផ្សាយថាយន្តហោះបូអ៊ីង៧៥៧នោះនៅពេលចូលចាក់សាំងនៅប្រទេសប៉ាពួញូហ្គីណេសុខៗស្រាប់តែគាំងម៉ាស៊ីនប្រើការលែងកើតតែម្ដង។ ដូច្នេះ ក្រុមអ្នកវិនិយោគ និងអ្នកសារព័ត៌មានដែលត្រូវរួមដំណើរជាមួយលោកឡាក់សុនទៅប្រទេសជប៉ុនត្រូវជាប់ផុងទៅណាមិនរួច។ គេដឹងថាយន្តហោះយោធាដែលប្រុងដឹកលោកឡាក់សុនទៅប្រទេសជប៉ុននោះចាស់ហួសសម័យណាស់ទៅហើយ។ ពោលគឺវាមានអាយុកាលតាំងពីជាង៣០ឆ្នាំមុនមកម៉្លេះ។
នេះចេះយន្តហោះខូចម៉ាស៊ីនមុនពេលចាកចេញដំណើរ។ ចុះបើកំពុងហោះហើរកណ្ដាលអាកាសសុខៗស្រាប់តែរលត់ម៉ាស៊ីនកណ្ដាលទីមិនវីរវរធំទៅហើយ? នៅពេលនិយាយដល់ចំណុចនេះធ្វើឱ្យយើងមានអារម្មណ៍ព្រឺសម្បុរខ្ញាកៗ។ គេនៅចាំបានថាកាលពីពេលថ្មីៗនេះថ្នាក់ដឹកនាំកំពូលៗរបស់ប្រទេសខ្លះកម្រិតប្រធានាធិបតី ឬអនុប្រធានាធិបតីបានស្លាប់ជាហូរហែដោយសារការធ្លាក់យន្តហោះ ឬឧទ្ធម្ភាគចក្រ។ ឧទាហរណ៍ករណីធ្លាក់ឧទ្ធម្ភាគចក្រស្លាប់ប្រធានាធិបតីអ៊ីរ៉ង់កាលពីថ្ងៃទី២០ ខែឧសភា, ករណីធ្លាក់ឧទ្ធម្ភាគចក្រស្លាប់អនុប្រធានាធិបតីប្រទេសម៉ាឡាវី (Malawi) កាលពីថ្ងៃទី១១ ខែមិថុនា និងករណីធ្លាក់ឧទ្ធម្ភាគចក្រស្លាប់អគ្គបញ្ជាការកងទ័ពប្រទេសកេនយ៉ា (Kenya) កាលពីថ្ងៃទី១៨ ខែមេសា ឆ្នាំ២០២៤។
ងាកមកករណីប្រទេសនូវែលហ្សេឡង់វិញម្ដង, រដ្ឋមន្ត្រីការពារជាតិនូវែលហ្សេឡង់សារភាពថាករណីខូចម៉ាស៊ីនយន្តហោះនេះជាក្ដីអាម៉ាស់របស់ប្រទេសជាតិ។ ចាប់ពីពេលនេះតទៅ, នៅពេលលោកឡាក់សុន និងគណៈប្រតិភូអមនាយករដ្ឋមន្ត្រីធ្វើដំណើរទៅណាម្ដងៗ នូវែលហ្សឺឡង់ត្រូវប្រើប្រាស់យន្តហោះឯកជនវិញម្ដង។ ក្រសួងការពារជាតិនូវែលហ្សេឡង់មិនសូវមានរបស់ទាន់សម័យសម្រាប់ប្រើប្រាស់ប៉ុន្មានទេ។ ដូច្នេះត្រូវបង្ខំចិត្តប្រើប្រាស់របស់ហួសដឺឡេ។ រដ្ឋាភិបាលចង់ចំណាយថវិកាបន្ថែមទៀតទៅលើវិស័យការពារជាតិដែរ។ ប៉ុន្តែជាក់ស្ដែង រដ្ឋព្យាយាមចាយលុយយ៉ាងត្បិតត្រៀតជាទីបំផុតនៅពេលសេដ្ឋកិច្ចជាតិកំពុងធ្លាក់ចុះ៕
វីឌីអូ
https://www.youtube.com/watch?v=BFVivoLsvxo&ab_channel=Newshub
https://cdn.jwplayer.com/previews/3xjMkWF2
ចែករំលែកព័តមាននេះ