ADផ្ទាំងផ្សព្វផ្សាយពាណិជ្ជកម្ម

Picture

អាមេរិក​បញ្ជូន​នាវា​មុជ​ទឹក​នុយ​ក្លេ​អ៊ែរ​ទៅ​ជិត​គុយ​បា​ដើម្បី​ឃ្លាំ​មើល​រុស្ស៊ី

1 ខែ មុន

ទី​ក្រុង​វ៉ាស៊ីនតោន៖ បន្ទាប់​​ពី​​​​នាវា​មុជ​ទឹក​នុយ​ក្លេអ៊ែរ​រុស្ស៊ី​ចូល​ចត​នៅ​​​​គុយ​បា​មិន​បាន​ប៉ុន្មាន​​​ផង​ ប្រទេស​អាមេរិក​ក៏​បញ្ជូន​នាវា​​មុជ​ទឹក​នុយ​ក្លេអ៊ែរ​​របស់​ខ្លួន​ទៅ​​ឆក​សមុទ្រ​ក្វាន់​តា​ណាម៉ូ (Guantanamo Bay) ភ្លាម​១​រំពេច​។ ទី​នេះ​ជា​ទឹក​ដី​របស់​គុយ​បា​ ប៉ុន្តែ​ត្រូវ​អាមេរិក​ជួល​ធ្វើ​ជា​មូល​ដ្ឋាន​កង​ទ័ព​​​។ ​​ថ្វី​ដ្បិត​​​នាវា​ចម្បាំង​រុស្ស៊ី​​ទៅ​គុយ​បា​លើក​នេះ​គ្រាន់​តែ​ជា​ទស្សន​កិច្ច​ធម្ម​តា​​​ក៏​ដោយ​​។​​ ​ប៉ុន្តែ​អាមេរិក​​មិន​ចង់​មើល​ស្រាលសភាព​​​ការណ៍​នេះ​​ទេ​​…

ទី​ក្រុង​វ៉ាស៊ីនតោន៖ បន្ទាប់​​ពី​​​​នាវា​មុជ​ទឹក​នុយ​ក្លេអ៊ែរ​រុស្ស៊ី​ចូល​ចត​នៅ​​​​គុយ​បា​មិន​បាន​ប៉ុន្មាន​​​ផង​ ប្រទេស​អាមេរិក​ក៏​បញ្ជូន​នាវា​​មុជ​ទឹក​នុយ​ក្លេអ៊ែរ​​របស់​ខ្លួន​ទៅ​​ឆក​សមុទ្រ​ក្វាន់​តា​ណាម៉ូ (Guantanamo Bay) ភ្លាម​១​រំពេច​។ ទី​នេះ​ជា​ទឹក​ដី​របស់​គុយ​បា​ ប៉ុន្តែ​ត្រូវ​អាមេរិក​ជួល​ធ្វើ​ជា​មូល​ដ្ឋាន​កង​ទ័ព​​​។ ​​ថ្វី​ដ្បិត​​​នាវា​ចម្បាំង​រុស្ស៊ី​​ទៅ​គុយ​បា​លើក​នេះ​គ្រាន់​តែ​ជា​ទស្សន​កិច្ច​ធម្ម​តា​​​ក៏​ដោយ​​។​​ ​ប៉ុន្តែ​អាមេរិក​​មិន​ចង់​មើល​ស្រាលសភាព​​​ការណ៍​នេះ​​ទេ​​ ហើយ​ក៏​មិន​ចង់​ឱ្យ​រុស្ស៊ី​ឡើង​ចាង​ខ្លាំង​ពេក​​​នៅ​ក្បែរ​ទី​តាំង​របស់​ខ្លួន​​​​។

បញ្ជា​ការដ្ឋាន​កង​ទ័ព​អាមេរិក​ប្រចាំ​តំបន់​ប្រតិ​បត្តិ​ការ​សឹក​​ខាង​ត្បូង​ចេញ​សេចក្ដី​ប្រកាស​របស់​ខ្លួន​ថា​នាវា​មុជ​ទឹក​នុយ​ក្លេអ៊ែរ​ឈ្មោះ​​យូ​អែស​អែស ហេឡេណា (USS Helena) នឹង​ចូល​ចត​នៅ​ឆក​សមុទ្រ​ក្វាន​តា​ណាម៉ូ​​តាម​ទម្លាប់​ធម្ម​តា​។ ទី​នេះ​ជា​ច្រក​ចេញ​ចូល​នៃបញ្ជា​ការ​ដ្ឋាន​កងទ័ព​អាមេរិក​ភាគ​ខាង​ត្បូង​។ សេចក្ដីថ្លែងការណ៍​​​បញ្ជាក់​ថា​គម្រោង​ចូល​ចត​នេះ​មាន​ជា​យូរ​មក​ហើយ​។ គ្រាន់​តែ​ថា​វា​គាប់​ជួន​នឹង​ការ​មក​ដល់​នៃ​នាវា​មុជ​ទឹក​នុយក្លេអ៊ែរ​ និង​នាវា​ចម្បាំង​របស់​រុស្ស៊ី​នៅ​ទី​ក្រុង​ឡាហាវ៉ាន​។​

កង​នាវា​ចម្បាំង​រុស្ស៊ី​ មុន​នឹង​បើក​ទៅ​ដល់​ប្រទេស​គុយ​បា ​ក៏​ឆ្លៀ​តឱកាស​បើក​លយ​ទៅ​កៀក​នឹង​​​​ឆ្នេរ​សមុទ្រ​រដ្ឋ​ផ្លរីដា​របស់​ប្រទេស​អាមេរិក​សម្បើម​ណាស់​ដែរ​​។ នាវា​ទាំង​នេះ​​ ក្រោយ​ពេល​ចាក​ចេញ​ពី​គុយ​បា នឹង​ឆៀង​ចូល​ទៅ​ឈប់​សំចត​នៅ​ប្រទេស​វេណេ​ហ្ស៊ូអេឡា​​ជា​សម្ព័ន្ធ​មិត្ត​របស់​រុស្ស៊ី​​ ហើយ​ត្រៀម​ចូល​រួម​ធ្វើ​សមយុទ្ធ​យោធា​នៅ​សមុទ្រ​ការីប៊ីន (Caribbean)​។

ទូរ​ទស្សន៍​ស៊ីអឹន​អឹន​ (CNN) ផ្សាយ​ថា​ប្រទេស​អាមេរិក និង​កាណាដា​តាម​ដាន​ដោយ​ឥត​ប៉​ប្រិច​ភ្នែក​ចំពោះ​នាវា​ចម្បាំង​របស់​រុស្ស៊ី​។ ប្រទេស​ទាំង​២​ថែម​ទាំង​បញ្ជូន​នាវា​​ និង​យន្ត​ហោះ​​​​ឃ្លាំ​មើលយ៉ាង​ប្រកិត​​​។ ទី​ប្រឹក្សា​សន្តិ​សុខ​ជាតិ​អាមេរិក លោក​ជេក​ ស៊ូលីវេន (Jake Sullivan)​ថ្លែង​​ថា​​យើង​ត្រូវ​តែ​តាមដាន​យ៉ាង​ស្អិត​ និង​ដោយ​ប្រុង​ប្រយ័ត្ន​​​​ចំពោះ​​​នាវា​រុស្ស៊ី​​ទាំង​នោះ​។ លោក​យល់​ថា​គ្មាន​សញ្ញា​ណា​១​​បង្ហាញ​ថា​ការ​ចូល​ចត​របស់​នាវា​រុស្ស៊ី​អាច​នឹង​ពាក់​ព័ន្ធ​នឹង​ការ​ផ្ទេរ​អាវុធ​រវាង​ប្រទេស​រុស្ស៊ី​ និង​គុយ​បា​ទេ​។

លោក​ជេក​ ស៊ូលីវេន (Jake Sullivan) ជា​ទី​ប្រឹក្សា​សន្តិ​សុខ​ជាតិ​អាមេរិក

​ក្រុម​​បក្ស​​សា​ធារណ​រដ្ឋ​​ឆ្លៀត​កេង​ចំណេញ​ផ្នែក​នយោបាយ​ពី​ព្រឹត្តិ​ការណ៍​នេះ​​។ ពួក​គេ​​ថ្លែង​​ថា​​ការ​ដែលរុស្ស៊ី​​ហ៊ាន​​ចូល​ដល់​កណ្ដាល​បេះ​ដូង​របស់​អាមេរិក​បែប​នេះ​​​ដោយ​សារ​​​​ភាព​កម្សោយ​នៃ​នយោបាយ​ការ​បរទេស​របស់​លោក​បៃដិន​​​​។ លោក​ពូទីន​ប្រកាស​​ថ្មី​ៗ​នេះ​​ថា​បើ​អាមេរិក​និង​បស្ចិម​ប្រទេស​ធ្វើ​ដាក់​រុស្ស៊ី​បែប​ណា​រុស្ស៊ី​នឹង​ធ្វើ​ដាក់​ពួក​គេ​វិញ​បែប​នោះ​។ លោក​ថ្លែង​ដូច្នេះ​​បន្ទាប់​ពី​អាមេរិក អង់គ្លេស បារាំង​​ ​និង​ប្រទេស​ដទៃ​ទៀត​បើក​ដៃ​ឱ្យ​អ៊ុយ​ក្រែន​ប្រើ​ប្រាស់​អាវុធ​ជំនួយ​បាញ់​ចូល​ទឹក​ដី​រុស្ស៊ី​។

​តាម​ពិត​ លោក​បៃដិន​មិន​បាន​បើក​ដៃ​ឱ្យ​អ៊ុយ​ក្រែន​បាញ់​ទៅ​រុស្ស៊ី​ដោយ​សេរី​នោះ​ទេ​។ លោក​គ្រាន់​តែ​ចង់​ផ្ដោត​សំខាន់​ទៅ​លើ​សង្គ្រាម​នៅ​តំបន់​ខាគីវ​ដែល​ទទួល​រង​ការ​វាយ​ប្រហារយ៉ាង​ខ្លាំង​​ពី​កង​ទ័ព​រុស្ស៊ី​។ លោក​មិនចង់​​ឃើញ​​ទី​ក្រុង​ធំ​លំដាប់​ទី​២​​មួយ​នេះធ្លាក់​ទៅ​ក្នុង​ដៃ​របស់​រុស្ស៊ី​ដោយ​​ងាយ​ស្រួលពេក​ទេ​។ ដូច្នេះ លោក​យល់​ថា​អ៊ុយ​ក្រែន​អាច​ប្រើ​អាវុធ​ជំនួយ​ដើម្បី​វាយ​រុញ​ច្រាន​កង​ទ័ព​រុស្ស៊ី​ឱ្យ​ថយ​ក្រោយ​វិញ​។ ពេល​ខ្លះ​​ បើ​​អ៊ុយ​ក្រែន​ត្រូវ​បាញ់​​ចូល​ទឹក​ដី​រុស្ស៊ី​ជិត​ៗ​ព្រំ​ដែន​ក៏​គួរ​​ពិចារណា​​​តាម​នោះ​ចុះ​។

លោក​បៃដិន​​នៅ​តែ​មិន​គាំទ្រ​ឱ្យ​បាញ់​ជ្រៅ​ៗ​ចូល​ទឹក​ដី​រុស្ស៊ី​ទេ​។ លោក​ប្រកាស​ថា​អាវុធ​អាមេរិក​មិន​ត្រូវ​បាញ់​តម្រង់​ទៅ​ទី​ក្រុង​ម៉ូស្គូ​ជា​ដាច់​ខាត​។ មូល​ហេតុ​ដោយ​សារ​លោក​បារម្ភ​ថា​បើ​រុស្ស៊ី​សង​សឹក​វិញ​មិន​មែន​បាញ់​ទៅ​លើ​អ៊ុយ​ក្រែន​ទេ​ ប៉ុន្តែ​អាច​នឹង​បាញ់​ទៅ​ប្រទេស​ម្ចាស់​ជំនួយ​អាវុធ​ទាំង​នោះ​តែ​ម្ដង​។ លោក​ពូទីន​ទើប​តែ​ប្រកាស​ថ្មី​ៗ​នេះ​ថា​លោក​អាច​នឹង​បញ្ជូន​អាវុធ​ទៅប្រទេស​សម្ព័ន្ធ​មិត្ត​របស់​រុស្ស៊ី​ដើម្បី​ឱ្យ​ពួក​គេ​ជួយ​​បាញ់​ចូល​ទឹក​ដី​អាមេរិក អង់គ្លេស និង​បារាំង​។​

​សមាជិក​ព្រឹទ្ធ​សភា​ម្នាក់​ឈ្មោះ​ថេត​គ្រូស​ (Ted Cruz) ថ្លែង​ប្រាប់​ទូរ​ទស្សន៍​ហ្វក់​​ថា​ (Fox) នៅ​ពេល​យើង​មាន​ប្រធានាធិបតីទន់​ខ្សោយ​​ (ចង់​សំដៅ​លើ​លោ​ក​បៃដិន) ពេល​នោះ​មនុស្ស​អាក្រក់​ៗ​នៅ​​ក្នុង​លោក​នេះ​នឹង​ឡើង​ចាង​ជា​មិន​ខាន​ឡើយ​។ ដូច​យើង​ឃើញ​ស្រាប់​ហើយ​​ នៅ​ពេល​នេះ រុស្ស៊ី​បញ្ជូន​នាវា​ចម្បាំង​ទៅ​ដល់​គុយ​បា​ដែល​​​បំពាក់​សុទ្ធ​តែ​​គ្រាប់​មីស៊ីល​​លឿន​ជាង​សំឡេង​ ឬ​​ហាយ​ពើ​សូនិច (hypersonic)។ ទី​តាំង​នោះ​ស្ថិត​នៅ​ចម្ងាយ​តែ​​១៤៥​គីឡូម៉ែត្រ​​ប៉ុណ្ណោះ​ពី​រដ្ឋ​ផ្លរីដា​របស់​ប្រទេស​អាមេរិក​​៕​

លោក​ថេត​គ្រូស (Ted Cruz) ជា​សមាជិក​ព្រឹទ្ធ​សភា​មក​ពី​គណ​បក្ស​សា​ធារណរដ្ឋ​

អត្ថបទសរសេរ ដោយ

កែសម្រួលដោយ