រាជធានីភ្នំពេញ ៖ អគ្គិភ័យបានឆាបឆេះស្មៅព្រៃ និងដើមស្វាយងាប់ៗនិងរស់នៅក្នុងដីឡូត៌មួយកន្លែង ដែលស្ថិតនៅជិតរោងចក្រ និងផ្ទះសម្បែងអ្នកភូមិបង្កឲ្យមានការភ្ញាក់ផ្អើលភ័យខ្លាច ដល់ប្រជាពលរដ្ឋ ដោយខ្លាចឆេះរាលដល់រោងចក្រ និងផ្ទះសម្បែងរបស់ពួកគាត់ ។
ចំណែកអាជ្ញាធរ ព្រមទាំងសមត្ថកិច្ច កម្លាំងប្រជាការពារក៏បានចេញអន្តរាគមន៍ភ្លាមៗ ដោយបានហៅរថយន្តពន្លត់អគ្គិភ័យច្រើនគ្រឿងទៅបាញ់ពន្លត់ ទើបពុំមានការឆេះរាលដាល ។ ហេតុការណ៍នោះបានកើតឡើង កាលពីវេលាម៉ោង៩និង៣០នាទីព្រឹក ថ្ងៃទី១២ ខែមិថុនា ឆ្នាំ២០២៤ នៅក្នុងដីឡូត៌មួយកន្លែង ស្ថិតនៅតាមបណ្ដោយផ្លូវជាតិលេខ២ ជិតវត្តព្រះធាតុ ភូមិកណ្ដាល សង្កាត់លួស ខណ្ឌដង្កោ រាជធានីភ្នំពេញ ។
អ្នកភូមិខាងលើបាននិយាយថា ពួកគាត់មិនបានដឹងថា ការឆាបឆេះនេះបង្កឡើងដោយសារតែមានអ្នកបោះចោលកន្ទុយបារីផ្ដេសផ្ដាស ឬ មានអ្នកដុត ឬក៏មានអ្នកយករកឃ្មុំហើយបោះចោលភ្លើងនោះទេ ប៉ុន្តែនៅសុខៗស្រាប់តែឃើញឆេះខ្លាំងទៅហើយ ។ ដោយឡែកនៅក្នុងទីតាំងដីឡូត៌មួយនោះពោរពេញទៅដោយស្មៅ ព្រៃ និងដើមស្វាយងាប់ និងរស់ជាច្រើនទើបធ្វើឲ្យភ្លើងឆេះលឿនខ្លាំងណាស់ ដែលជាហេតុបង្កឲ្យពួកគាត់មានការព្រួយបារម្ភយ៉ាងខ្លាំង ។
អ្នកភូមិបានប្រាប់ឲ្យដឹងបន្តទៀតថា អ្វីដែលជាការព្រួយបារម្ភខ្លាំងនោះ ក៏ព្រោះតែទីតាំងដីឡូត៌ដែលត្រូវភ្លើងឆេះនេះ ស្ថិតនៅជិតរោងចក្រផង និងផ្ទះសម្បែងរបស់ពួកគាត់ផង ហើយក៏នៅជិតខ្សែកាបភ្លើងផងដែរ ។ ចំណែកការឆាបឆេះមានទំហំធំទៀត ដូច្នេះប្រសិនបើគ្មានការអន្តរាគមន៍ណាមួយទាន់ពេលវេលាទេនោះ ភ្លើងអាច និងឆេះរាលដល់បំផ្លាញរោងចក្រ និងផ្ទះពួកគាត់ច្រើនខ្នងមិនខានឡើយ ។
ប្រភពដដែលបានប្រាប់ឲ្យដឹងបន្តទៀតថា ពួកគាត់គ្មានមធ្យោបាយដើម្បីពន្លត់ភ្លើងបាននោះទេ ម្នាក់ៗបានត្រឹមតែឈរមើលទាំងការភ័យខ្លាច បន្ទាប់មកក៏រាយការណ៍ជូនអាជ្ញាធរ និងសមត្ថកិច្ច ដើម្បីជួយអន្តរាគមន៍ ។ បន្ទាប់ពីទទួលបានដំណឹងនេះភ្លាម អាជ្ញាធរសង្កាត់ ខណ្ឌ ព្រមទាំងនគរបាលប៉ុស្តិ៍រលួស និងនគរបាលខណ្ឌដង្កោ កម្លាំងប្រជាការពារបានទៅកាន់ទីនោះភ្លាមៗ ។
ដោយឡែកក្រុមអ្នកពន្លត់អគ្គិភ័យក៏នាំយករថយន្តពន្លត់អគ្គិភ័យទៅបាញ់ពន្លត់ជាបន្តបន្ទាប់ ទើបទប់ស្កាត់ការឆេះរាលដាល និងបានថមថយ ប៉ុន្តែរហូដល់វេលាថ្ងៃត្រង់ថ្ងៃដដែលភ្លើងមិនទាន់រលត់ទៅវិញទាំងស្រុងទេ ហើយក្រុមពន្លត់អគ្គិភ័យកំពុងបន្តបាញ់ទឹកពន្លត់បន្តទៀតនៅឡើយ ៕
ចែករំលែកព័តមាននេះ