ខេត្តបាត់ដំបង ៖ យោងតាមសេចក្ដីរាយការណ៍បានឱ្យដឹងថា រថយន្តធុនធ្ងន់ (ប្រភេទសណ្ដោង) មួយគ្រឿងដែលមានដឹកឈើក្ដារបន្ទះចំនួន០៤សន្លឹក ស្មើនឹងជាង១៣ម៉ែត្រគូប ត្រួវបានមន្ត្រីឧទ្យានុអនុរក្ស និងកម្លាំងសម្ព័ន្ធមិត្តសត្វព្រៃ (W.A)…
ខេត្តបាត់ដំបង ៖ យោងតាមសេចក្ដីរាយការណ៍បានឱ្យដឹងថា រថយន្តធុនធ្ងន់ (ប្រភេទសណ្ដោង) មួយគ្រឿងដែលមានដឹកឈើក្ដារបន្ទះចំនួន០៤សន្លឹក ស្មើនឹងជាង១៣ម៉ែត្រគូប ត្រួវបានមន្ត្រីឧទ្យានុអនុរក្ស និងកម្លាំងសម្ព័ន្ធមិត្តសត្វព្រៃ (W.A) ប្រចាំស្នាក់ការ «ច្រកចង្អៀត» ស្ទាក់ចាប់បាន កាលពីរសៀលថ្ងៃទី១០ មិថុនា ពេលដែលរថយន្តយក្សនេះ ដឹកឈើចេញពីទឹកដីស្រុកវាលវែង ខេត្តពោធិ៍សាត់ ចូលមកដល់ចំណុចខាងមុខ «ស្នាក់ការ ច្រកចង្អៀត» ស្ថិតក្នុងភូមិព្រៃធំ ឃុំកំពង់ល្ពៅ ស្រុកសំឡូត ។
មន្ត្រីបរិស្ថានបានរាយការណ៍ថា រថយន្តដឹកឈើល្មើសច្បាប់នោះ ក្បាលសណ្ដោងពាក់ស្លាកលេខ ត្បូងឃ្មុំ 3A-3400 កន្ទុយពាក់ស្លាកលេខ ព្រះសីហនុ 4A-2829 ។ រថយន្តនេះ ដឹកឈើក្ដារបន្ទះប្រភេទឈើ «ថ្ពង់» ចំនួន០៤សន្លឹកធំៗ សរុប១៣,៨៣ម៉ែត្រគូប ។ បើតាមប្រភពព័ត៌មាន រថយន្តយក្សមួយនេះ បានដឹកឈើ «ថ្ពង់» ចំនួន០៤សន្លឹកធំៗនេះ ចេញពីទឹកដីខេត្តពោធិ៍សាត់ ឆ្ពោះមកកាន់ស្រុកសំឡូត ខេត្តបាត់ដំបង តែពេលមកដល់ចំណុច«ច្រកចង្អៀត»ឆ្លងផុតព្រំប្រទល់ខេត្តពោធិ៍សាត់បន្តិច ក៏ត្រូវមន្ត្រីឧទ្យានុរក្សា និងកម្លាំងអង្គការ W.A ដែលមានស្នាក់ការក្បែរព្រំប្រទល់នោះ ស្ទាក់ចាប់តែម្ដង ។
ប៉ុន្តែគេមិនឃើញមានការឃាត់ខ្លួនបានអ្នកបើកបររថយន្តដឹកបទល្មើសព្រៃឈើនេះទេ ។ បើតាមប្រភពគេអះអាងថា «តៃកុងឡានដឹកឈើនេះរត់រួច ពេលត្រូវកម្លាំងស្ទាក់ចាប់»។ បើតាមប្រភព
ដដែលបានបញ្ជាក់ដែរថា នៅពេលរថយន្តយក្សនេះ ព្យាយាមដឹកឈើចេញពីទឹកដីស្រុកវាលវែង ឆ្ពោះមកកាន់ទឹកដីស្រុកសំឡួត ក៏មានមន្ត្រីឧទ្យានុរក្ស ប្រចាំស្រុកវាលវែងដេញតាមពីក្រោយ និង បានរាយការណ៏ជាបន្តបន្ទាប់ស្នើឲ្យកម្លាំងជំនាញស្រុកសំឡូតជួយស្ទាក់ចាប់ដែរ រហូតរថយន្តនេះមកដល់ច្រកចង្អៀត ឆ្លងផុតព្រំប្រទល់បន្តិចក៏ត្រូវកម្លាំងជំនាញ ស្រុកសំឡូតស្ទាក់ចាប់តែម្ដង។
យ៉ាងណាក្ដី បើតាមសេចក្ដីរាយការណ៍បានឲ្យដឹងចុងក្រោយថា ក្រោយពីធ្វើការត្រូតពិនិត្យ និង ធ្វើកំណត់ហេតុរួចរាល់ ទាំងរថយន្ត ទាំងឈើ (វត្ថុតាង) ត្រូវបានរក្សាទុកជាបណ្ដោះអាសន្ន នៅស្នាក់ការរង ប្រចាំច្រកចង្អៀត ដើម្បីរងចាំចំណាត់ការបន្តតាមនីតិវិធី៕
ចែករំលែកព័តមាននេះ