រាជធានីភ្នំពេញ ៖ រដ្ឋបាលរាជធានីភ្នំពេញ នឹងធ្វើការដំឡើងភ្លើងសញ្ញាចរាចរ នៅចំណុចប្រសព្វរវាងផ្លូវលេខ៧០ និងមហាវិថីព្រះមុនីវង្ស ដាក់ខឿនបែងចែកទ្រូងផ្លូវលើមហាវិថីព្រះមុនីវង្ស រៀបចំផ្លូវលេខ៤៧ ជាផ្លូវឯកទិស និងរៀបចំផ្លូវទ្វេទិស មានទិសដៅទៅមក ចាប់ពីផ្លូវលេខ៨០ ដល់រង្វង់មូលវត្តភ្នំ ដើម្បីកាត់បន្ថយការកកស្ទះចរាចរណ៍ នៅតំបន់រង្វង់មូលកួចកាណុង ។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ បានឱ្យដឹងថា រដ្ឋបាលរាជធានីភ្នំពេញ បានសង្កេតឃើញពីស្ថានភាពចរាចរនៅចំណុចរង្វង់មូលកួចកាណុង មានការកកស្ទះជារៀងរាល់ថ្ងៃ ជាពិសេសម៉ោងមមាញឹក (ចន្លោះពីម៉ោង៧:០០នាទីព្រឹក ដល់ម៉ោង៨:៣០នាទីព្រឹក និងពីម៉ោង១៦:៣០នាទីរសៀល ដល់ម៉ោង១៩:០០នាទីយប់) ដែលជាហេតុធ្វើឱ្យប៉ះពាល់ដល់ការធ្វើដំណើរ និងសណ្ដាប់ធ្នាប់សាធារណៈ ។
ដូច្នេះដើម្បីជួយសម្រួលដល់ការធ្វើដំណើររបស់បងប្អូនប្រជាពលរដ្ឋឱ្យកាន់តែងាយស្រួល និងសមស្របតាមបទដ្ឋានបច្ចេកទេស រដ្ឋបាលរាជធានីភ្នំពេញ មានគម្រោងរៀបចំកែសម្រួលប្រព័ន្ធចរាចរ នៅតំបន់ជុំវិញចំណុចរង្វង់មូលកួចកាណុង ដូចខាងក្រោម ៖
១-ដំឡើងភ្លើងសញ្ញាចរាចរនៅចំណុចប្រសព្វរវាងផ្លូវលេខ៧០ និងមហាវិថីព្រះមុនីវង្ស
២-ដាក់ខឿនបែងចែកទ្រូងផ្លូវលើមហាវិថីព្រះមុនីវង្សចាប់ពីច្រមុះជ្រូករង្វង់មូលកួចកាណុង ដល់ផ្លូវលេខ៨០
៣-រៀបចំផ្លូវឯកទិសលើផ្លូវលេខ៤៧ ទិសដៅឆ្ពោះទៅវត្តភ្នំ ចាប់ពីរង្វង់មូលកួចកាណុង ដល់ផ្លូវលេខ៨០
៤-រៀបចំផ្លូវទ្វេទិស មានទិសដៅទៅមក ចាប់ពីផ្លូវលេខ៨០ ដល់រង្វង់មូលវត្តភ្នំ។
គម្រោងខាងលើនេះ នឹងដាក់ឱ្យដំណើរការសាកល្បងចាប់ពីថ្ងៃសុក្រទី០៧ ខែមិថុនា ឆ្នាំ២០២៤ តទៅអាស្រ័យហេតុនេះ សូមសាធារណជនទាំងអស់ និងបងប្អូនប្រជាពលរដ្ឋ ដែលធ្វើចរាចរឆ្លងកាត់ភូមិសាស្ត្រខាងលើមេត្តាយោគយល់ និងចូលរួមសហការតាមខ្លឹមសារខាងលើនេះ ប្រកបដោយស្មារតី ទទួលខុសត្រូវខ្ពស់ ។
ទទួលបានសេចក្តីជូនដំណឹងនេះ បញ្ជាការដ្ឋានកងរាជអាវុធហត្ថរាជធានីភ្នំពេញ ស្នងការដ្ឋាននគរបាលរាជធានីភ្នំពេញ រដ្ឋបាលខណ្ឌពាក់ព័ន្ធ និងមន្ទីរសាធារណការ និងដឹកជញ្ជូនរាជធានីភ្នំពេញ ត្រូវសហការអនុវត្ត និងសម្របសម្រួលសណ្តាប់ធ្នាប់ចរាចរត្រង់ចំណុចភូមិសាស្ត្រខាងលើនេះឱ្យទទួលបានលទ្ធផលល្អ និងប្រកបដោយប្រសិទ្ធភាពខ្ពស់ ៕
![](https://kohsantepheapdaily.com.kh/wp-content/uploads/2024/06/61491587a6ad5f069b62cd1841f34702.jpg)
![](https://kohsantepheapdaily.com.kh/wp-content/uploads/2024/06/2720723da2aaf7aed26e551b76d1a11c-1.jpg)
![](https://kohsantepheapdaily.com.kh/wp-content/uploads/2024/06/d726c2f2a2d6c28b9143d05e9d90a7ea.jpg)
ចែករំលែកព័តមាននេះ