ខេត្តកំពង់ស្ពឺ ៖ មហាជនកំពង់រង់ចាំសង្កតមើលថា តើហេតុអ្វីបានមន្ទីរធនធានទឹក និងឧតុនិយម និងមន្ទីររ៉ែនិងថាមពលខេត្តកំពង់ស្ពឺ មិនកំណត់ព្រំឱ្យបានច្បាស់លាស់ក្នុងការជីកស្តារដីអាងទំនប់អូរក្រាំងអំបិលរបស់ថៅកែ លឹម ចាន់ថុល ខណៈលេចឮថាមិនទាន់ដោះស្រាយសំណងផលប៉ះពាលើដីអាស្រ័យផលជាមួយប្រជាពលរដ្ឋដាច់ស្រេចនៅឡើយ…
ខេត្តកំពង់ស្ពឺ ៖ មហាជនកំពង់រង់ចាំសង្កតមើលថា តើហេតុអ្វីបានមន្ទីរធនធានទឹក និងឧតុនិយម និងមន្ទីររ៉ែនិងថាមពលខេត្តកំពង់ស្ពឺ មិនកំណត់ព្រំឱ្យបានច្បាស់លាស់ក្នុងការជីកស្តារដីអាងទំនប់អូរក្រាំងអំបិលរបស់ថៅកែ លឹម ចាន់ថុល ខណៈលេចឮថាមិនទាន់ដោះស្រាយសំណងផលប៉ះពាលើដីអាស្រ័យផលជាមួយប្រជាពលរដ្ឋដាច់ស្រេចនៅឡើយ ។ តើហេតុអីនាំគ្នាស្ងាត់មាត់ដូចគេយកអ្វីមកចុក?
រឿងជីកស្តារអាងទំនប់ទឹកអូរក្រាំងអំបិលរបស់លោកថៅកែ លឹម ចាន់ថុល នៅតែជាទីចាប់អារម្មណ៍របស់មហាជន ក៏ព្រោះតែគេបានឃើញគ្រឿងចក្របានជីកកាយស្ទើរតែពេញផ្ទៃអាងទំនប់អូរក្រាំងអំបិលនេះ ។ ប្រជាពលរដ្ឋដាក់ការសង្ស័យថា មន្ទីរធនធានទឹកនិងឧតុនិយម និងមន្ទីរ រ៉ែនិងថាមពលខេត្តកំពង់ស្ពឺមិនបានកំណត់ព្រំ និងបោះបង្គោលព្រំឱ្យពិតប្រាកដច្បាស់លាស់នៅឡើយទេ ទោះបីក្រសួងចេញច្បាប់ទំហំ៩ហិកតា៩៦អាក៏ដោយ ។
អ្វីដែលរឹតតែចាប់អារម្មណ៍ទៅនោះ ពេលឮថា មិនទាន់ដោះស្រាយជាមួយប្រជាពលរដ្ឋដែលអាស្រ័យផលនៅឡើយទេ ។ ដោយគេសង្កេតឃើញថា បន្ទាប់ពីកោះសន្តិភាពធ្វើការផ្សព្វផ្សាយរឿងដីអូរក្រាំងអំបិលនេះ គេបានឃើញក្រុមថៅកែ លឹម ចាន់ថុល កំពុងតែដុតដៃដុតជើង ហៅប្រជាពលរដ្ឋម្ចាស់ដីមកជួបនៅសាលាឃុំវល្លិសរ ដើម្បីសម្របសម្រួលកុំឱ្យផ្ទុះរឿងកាន់តែធំទៅៗ ។
បើតាមប្រភពព័ត៌មានបានបង្ហើបឱ្យដឹងថា កាលពីរសៀលថ្ងៃសៅរ៍ ទី០១ ខែមិថុនា ឆ្នាំ២០២៤ គេបានឃើញមនុស្សមួយក្រុមប្រមាណ៣ទៅ៤នាក់ បានកាន់លុយមួយបាច់ធំ ចូលទៅក្នុងសាលាឃុំវល្លិសរ ដោយមានវត្តមានលោកមេឃុំវល្លិសផងដែរ ព្រមទាំងប្រជាពលរដ្ឋប្រមាណជាង១០នាក់ ដើម្បីជួបចរចារនិងដោះស្រាយគោលនយោបាយរឿងផលប៉ះពាល់ដីអាស្រ័យផល ដោយក្នុងម្នាក់ទទួលបានជាង១០លានរៀល ជាថ្នូរមិនរករឿងនិងដាក់ពាក្យបណ្តឹង និងឈប់ធ្វើការតវ៉ាទៀត ។ ប៉ុន្តែតាមប្រភពព័ត៌មានមួយផ្សេងទៀតបានបង្ហើបឱ្យដឹងថា ការកោះហៅប្រជាពលរដ្ឋដែលរស់នៅក្នុងភូមិស្លារ ឃុំវល្លិសរ ដែលមានដីអាស្រ័យផលនៅក្នុងអាងទំនប់អូរក្រាំងអំបិលកាលពីរសៀលរហូតដល់ល្ងាចថ្ងៃទី០១ ខែមិថុនា ឆ្នាំ២០២៤ នៅសាលាឃុំវល្លិសរនោះ ប្រជាពលរដ្ឋមិនទាន់ព្រមយកលុយគោលនយោបាយនោះទេ ។
ដោយសម្របសម្រួលគ្នាមិនត្រូវ ក្រុមថៅកែគ្រឿងចក្រហ៊ានឱ្យតម្លៃ៨កាក់ដុល្លារក្នុងមួយម៉ែត្រការ៉េ តែមិនត្រូវរ៉ូវគ្នា។ ដូច្នេះ ប្រជាពលរដ្ឋមិនព្រមតាមការសម្របសម្រួលរបស់ក្រុមមនុស្សទាំងនោះនិងលោកមេឃុំវល្លិសរ ដែលជាអ្នកសម្របសម្រួលក្នុងឱកាសនោះឡើយ។ ប្រភពបង្ហើបថា ក្នុងរង្វង់ដីប៉ះពាល់ជាង១០ហិកតា ប្រជាពលរដ្ឋ២៧គ្រួសារនោះ ទាល់តែបានតាមអ្វីដែលជាការស្នើសុំទើបពួកគាត់ព្រមទទួលយក និងបញ្ចប់រឿង។
បើតាមប្រជាពលរដ្ឋបង្ហើបថា ប្រសិនបើការសម្របសម្រួលដោះស្រាយមិនចប់ទេនោះ ពួកគាត់នឹងដាក់ពាក្យបណ្តឹងទៅតុលាការដើម្បីជួយរកយុត្តិធម៌ហើយ។ ដោយសារតែពេលកន្លងមកក្រុមមនុស្សទាំងនោះបានកក់លុយលើដីដែលជីកកាយស្តារបន្តិចបន្តួចហើយដាក់គ្រឿងចក្រជីកកាយព្រំ ដោយមិនទាន់ឱ្យលុយគ្រប់នៅឡើយ កន្លងទៅពួកគាត់ផ្ទុះការតវ៉ាម្តងហើយពេលនោះគេឱ្យនៅស្ងៀមសិនចាំគេទូទាត់ឲ្យ ទើបស្ងាត់រហូតមកដល់ពេលនេះ។
ប្រភពច្បាស់ការថា គ្រឿងចក្រថៅកែ លឹម ចាន់ថុល សុំច្បាប់ពីក្រសួងជិត១០ហិកតាមែន ប៉ុន្តែជីកកាយបានមួយចំនួនប៉ុណ្ណោះ បើកាយប៉ះដីពលរដ្ឋដែលអាស្រ័យផលនឹងផ្ទុះរឿងទៀត ពីព្រោះថា មិនទាន់ឱ្យលុយប្រជាពលរដ្ឋគ្រប់ចំនួននៅឡើយទេ ។ ចំពោះការកំណត់ព្រំមន្ទីររ៉ែ និងខាងមន្ទីរធនធានទឹកមិនទាន់ចុះកំណត់ឲ្យបានត្រឹមត្រូវព្រោះថាបើចុះកំណត់ព្រំឲ្យបានច្បាស់លាស់នោះប្រជាពលរដ្ឋនឹងមើលឃើញថាគ្របលើដីអាស្រ័យផលរបស់ពួកគាត់ដែលមិនទាន់បានទទួលសំណងផលប៉ះពាល់លើដីអាស្រ័យផលហើយប្រជាពលរដ្ឋនឹងផ្ទុះការតវ៉ាទើបគេ ចេះតែបើកដៃបណ្ដែតបណ្ដោយឲ្យក្រុមគ្រឿងចក្រធ្វើអ្វីតាមអំពើចិត្តបែបនេះ ។
ពាក់ព័ន្ធរឿងខាងលើនេះ អ្នកយកព័ត៌មានមិនអាចសុំការបំភ្លឺពីលោកថៅកែ លឹម ចាន់ថុល ម្ចាស់អាជីវកម្មរណ្តៅដីអូរក្រាំងអំបិលបានទេ ដោយគ្មានលេខទូរស័ព្ទធ្វើការទំនាក់ទំនង។ ដោយឡែក លោក នៅ ឌឹម មេឃុំវល្លិសរ មិនអាចសុំការធ្វើអត្ថាធិបាយបានទេកាលពីល្ងាចថ្ងៃទី០២ ខែមិថុនា ឆ្នាំ២០២៤នេះ បើមានព័ត៌មានប្លែកយើងនឹងផ្សាយជូនបន្តទៀត ។ ព័ត៌មានបន្ថែមមានផ្សាយជូនលើកាសែតកោះសន្តិភាព ។
ចែករំលែកព័តមាននេះ