ខេត្តកំពង់ស្ពឺ ៖ ដីដែលមិនមានទិន្នន័យក្នុងទំនប់អូរក្រាំងអំបិល ពេលនេះ ត្រូវបានប្រភពបង្ហើបថា ក្រុមឈ្មួញកំពុងសំរុកកាយអាចម៍ដីទៅចាក់ តែមិនមានប្រភពបញ្ជាក់ថា គេចាក់ដើម្បីយកធ្វើអ្វីនោះទេ ។ ក្រុមគ្រឿងចក្រដែលកំពុងធ្វើសកម្មភាពនោះ…
ខេត្តកំពង់ស្ពឺ ៖ ដីដែលមិនមានទិន្នន័យក្នុងទំនប់អូរក្រាំងអំបិល ពេលនេះ ត្រូវបានប្រភពបង្ហើបថា ក្រុមឈ្មួញកំពុងសំរុកកាយអាចម៍ដីទៅចាក់ តែមិនមានប្រភពបញ្ជាក់ថា គេចាក់ដើម្បីយកធ្វើអ្វីនោះទេ ។ ក្រុមគ្រឿងចក្រដែលកំពុងធ្វើសកម្មភាពនោះ ត្រូវបានសង្ស័យថា ជាគ្រឿងចក្ររបស់ថៅកែ លឹម ចាន់ថុល ដែលមានសកម្មភាពជីកកាយស្តារអាងទំនប់អូរក្រាំងអំបិលនៅជិតនោះដែរ។ ករណីនេះ ធ្វើឲ្យមហាជនមន្ទិលសង្ស័យថា តើមានអាថ៌កំបាំងអ្វីនៅពីក្រោយរឿងនេះខ្លះ?
រឿងរ៉ាវជីកស្តារអាងទំនប់អូរក្រាំងអំបិលនៅតែជាទីចាប់អារម្មណ៍របស់ប្រជាពលរដ្ឋ ចង់ដឹងចង់ឮថា តើមន្ទីរ និងក្រសួងពាក់ព័ន្ធអនុញ្ញាតិច្បាប់ត្រឹមណា? បានជាក្រុមគ្រឿងចក្ររបស់ថៅកែ លឹម ចាន់ថុល ដែលមានខ្នងបង្អែកជាមន្ត្រីកងរាជអាវុធហត្ថខេត្តកំពង់ស្ពឺដ៏មានឥទ្ធិពលមួយរូប ជីកកាយស្ទើរតែពេញផ្ទៃអាងទំនប់អូរក្រាំងអំបិលទៅហើយនោះ ។
ប្រជាពលរដ្ឋដាក់ការសង្ស័យថា ថៅកែ លឹម ចាន់ថុល ជីកកាយស្តារអាងទំនប់អូរក្រាំងអំបិលនេះលើសច្បាប់កំណត់ និងខុសទីតាំង ។ រឿងនេះ ពាក់ព័ន្ធជាមួយមន្ត្រីទទួលបន្ទុកជំនាន់ណាខ្លះ ជាពិសេស គឺមន្ទីរធនធានទឹក និងរ៉ែថាមពលតែម្តង ។
តាមប្រភពព័ត៌មានពីប្រជាពលរដ្ឋដែលរស់នៅក្នុងភូមិស្លារ ភូមិអូរក្រាំងអំបិល និងភូមិត្បិះ បានបង្ហើបឱ្យដឹងថា ពួកគាត់មានដីអាស្រ័យផលម្នាក់បន្តិចៗនៅក្នុងអាងទំនប់អូរក្រាំងអំបិលនោះ ហើយដោយរដ្ឋគេថាត្រូវការអភិវឌ្ឍន៍ ក៏បង្ខំចិត្តយកដីពួកគាត់ដែលបានអាស្រ័យផល ដោះស្រាយគោលនយោបាលត្រឹម១ម៉ែត្រការ៉េបាន៨កាក់ដុល្លារ ។
ធ្វើឱ្យពួកគាត់មិនសប្បាយចិត្តនូវអ្វីដែលពួកគាត់ចង់បាននោះឡើយ បើរដ្ឋត្រូវការអភិវឌ្ឍន៍មិនអីនោះទេ ប៉ុន្តែនេះ គឺជាលេសរបស់នាយទុន (ថៅកែគ្រឿងចក្ររកស៊ីសោះ) ដែលយកលេសជីកស្តារអាងទំនប់ទឹកអូរក្រាំងអំបិល ដើម្បីបានទឹកសម្រាប់ប្រើប្រាស់ និងអាស្រ័យផលស្រោចស្រពដំណាំ ។ ប៉ុន្តែអ្វីដែលធ្វើឱ្យពួកគាត់ហួសចិត្តនោះគឺ ក្រុមថៅកែគ្រឿងចក្រ បានឃុបឃិតជាមួយមន្ត្រីជំនាញខិលខូច យកលេសជីកស្តារអូរក្រាំងអំបិល ដើម្បីយកអាចម៍ដីទៅចាក់បំពេញដីដែលមានប្លង់រឹងខ្លះនិងដីក្នុងទំនប់អូរក្រាំងអំបិលនេះ ។
ចំណែកដីដែលកំពុងចាក់ក្នុងគោលបំណងសាងសង់ធ្វើជារោងចក្រ (ចាក់អត់ច្បាប់) ពេលនេះ អ្វីដែលគេឃើញដឹកយកទៅចាក់បំពេញដីនៅខាងកើតឆៀងខាងជើងក្បែរវត្តរលាំងកំពូលដើម្បីសាងសង់រោងចក្រ។ ចំពោះដីប្រជាពលរដ្ឋដែលធ្លាប់ប្រកបរបរធ្វើស្រែចំការ និងដំណាំផ្សេងៗកន្លងមកនោះគឺ ថៅកែជីកកាយ អស់ទៅហើយមិនអាចធ្វើអ្វីបានទៀតទេ ក្លាយជារណ្តៅជ្រៅទៅហើយ ។
កត្តានេះហើយ ទើបធ្វើឱ្យប្រជាពលរដ្ឋដាក់ការសង្ស័យថាការជីកកាយស្តារអាងទំនប់អូរក្រាំងអំបិលរបស់ ថៅកែ លឹម ចាន់ថុល ដែលអាងអំណាចបងថ្លៃជាមន្ត្រីកងរាជអាវុធហត្ថខេត្តកំពង់ស្ពឺមួយរូបដ៏មានឥទ្ធិពលមហិមានេះ ជីកកាយលើដីដែលអត់ច្បាប់ ហើយយកទៅចាក់ដីចំណីអូរដែលសេសសល់នោះ ក៏ពុំមានច្បាប់អនុញាតិដែរ ។ គេពុំឃើញវត្តមានរបស់មន្ទីរក្រសួងជំនាញណាម្នាក់ចុះទៅត្រួតពិនិត្យឡើយ។
ដោយសារកត្តានេះហើយ ប្រជាពលរដ្ឋដែលមិនទាន់បានទទួលសំណងលើការអាស្រ័យផលលើកជាសំណួរថា តើមានមន្ត្រីជំនាញណាខ្លះពាក់ព័ន្ធក្នុងរឿងនេះ ហើយមានអាថ៌កំបាំងអ្វីខ្លះ ទើបការជីកស្តារពាសពេញផ្ទៃអាងទំនប់អូរក្រាំងអំបិលស្រេចតែអំពើចិត្តបែបនេះទៅហើយនោះ បែរជាមិនមានមន្ត្រីជំនាញចុះទៅពិនិត្យ និងហាមឃាត់ ។
ប្រភពព័ត៌មានបានឱ្យដឹងថា លោកថៅកែ លឹម ចាន់ថុល នេះ បានធ្វើការសុំច្បាប់ធ្វើអាជីវកម្មជីក
ស្តារអាងទំនប់ទឹកអូរក្រាំងអំបិលមានទំហំជិត១០ហិកតា ធ្វើការជីកកាយមានរយៈពេល២ឆ្នាំតែប៉ុណ្ណោះ។ ប៉ុន្តែពេលនេះ សង្ស័យថៅកែរូបនោះ ធ្វើខុសទីតាំងច្បាប់អនុញាតិ។
ជាក់ស្តែង កាលពីថ្ងៃទី៣០ ខែឧសភា ឆ្នាំ២០២៤ ម្សិលមិញនេះ ថៅកែ លឹម ចាន់ថុល បានយកគ្រឿងចក្រជីកកាយមកខាងកើតចំកណ្តាលផ្ទៃទំនប់អូរក្រាំងអំបិល ទើបប្រជាពលរដ្ឋដាក់ការសង្ស័យថា ផុតព្រំប្រទល់ និងលើសច្បាប់កំណត់ ដោយអាងអំណាចបងថ្លៃជាប៉េអឹមហើយមើលទៅ ទើបហ៊ានធ្វើបែបនេះបាន ។
ពាក់ព័ន្ធនឹងការលើកឡើងខាងលើ របស់ប្រជាពលរដ្ឋសង្ស័យថៅកែ លឹម ចាន់ថុល ជីកកាយស្តារអាងទំនប់អូរក្រាំងអំបិលលើសច្បាប់កំណត់នេះដែរ អ្នកយកព័ត៌មានយើងបានទាក់ទងទៅលោក ញ៉ាញ់ ជាបហ៊ង ប្រធានមន្ទីរធនធានទឹក និងឧតុនិយមខេត្តកំពង់ស្ពឺ តាមប្រព័ន្ធតេឡេក្រាមដើម្បីសួរនាំ ប៉ុន្តែលោកចូលមើលហើយ មិនឆ្លើយតប ។
ដោយឡែក លោក ប៊ិន ថេត ប្រធានការិយាល័យរ៉ែ និងថាមពលខេត្តកំពង់ស្ពឺបានឱ្យដឹងតាមទូរស័ព្ទថា ថ្ងៃមិញ ជំនាញលោកបានចុះទៅពិនិត្យវាស់វែងរួចហើយមិនខុសទីតាំងអីទេ ។ ហើយខាងណាដែលនិយាយថាខុសទីតាំងនោះ សូមឱ្យជួយចុះពិនិត្យទាំងអស់គ្នាក្រែលោសង្ស័យអី ពីព្រោះគាត់មានអាជ្ញាប័ណ្ណពីក្រសួងរ៉ែ និងថាមពល ដូចជាទំហំជាង៨ហិកតា ៕
ចែករំលែកព័តមាននេះ