ទីក្រុងវ៉ាស៊ីនតោន៖ តើប្រទេសរុស្ស៊ីនឹងឆ្លើយតបយ៉ាងណានៅពេលក្រុមប្រទេសផ្ដល់ជំនួយយោធាទៅឱ្យអ៊ុយក្រែនចាប់ផ្ដើមផ្ដល់សញ្ញាភ្លើងខៀវឱ្យអ៊ុយក្រែនប្រើប្រាស់អាវុធជំនួយទាំងនេះបាញ់ចូលទឹកដីរុស្ស៊ី? កាលពីពេលកន្លងមក អ៊ុយក្រែនធ្លាប់បាញ់ចូលទឹកដីរុស្ស៊ីម្ដងម្កាលដែរ។ ជាពិសេសបាញ់ចូលតំបន់ជិតៗព្រំដែនដូចជាទីក្រុងបែលហ្គោរ៉ូត (Belgorod) ជាដើម។ បើវាយប្រហារផ្លូវឆ្ងាយចូលទឹកដីរុស្ស៊ី, អ៊ុយក្រែនច្រើនប្រើប្រាស់យន្តហោះដ្រូន។ ក៏ប៉ុន្តែអ៊ុយក្រែនសូមបញ្ជាក់ថាអាវុធទាំងនោះជាអាវុធរបស់ខ្លួនផ្ទាល់។ មានន័យថាខ្លួនមិនដែលប្រើអាវុធជំនួយទៅវាយប្រហារចូលទឹកដីរុស្ស៊ីទេ។
នៅដំណាក់កាលចុងក្រោយនេះ ប្រទេសខ្លះចាប់ផ្ដើមចូលខ្លួនពាក់ព័ន្ធកាន់តែជ្រៅនៅក្នុងសង្គ្រាមអ៊ុយក្រែន។ ឧទាហរណ៍ ប្រធានាធិបតីបារាំងធ្លាប់និយាយជាច្រើនដងថាលោកមិនបដិសេធទេលទ្ធភាពនៃការបញ្ជូនកងទ័ពទៅអ៊ុយក្រែន។ រដ្ឋមន្ត្រីការបរទេសអង់គ្លេសក៏បើកដៃឱ្យអ៊ុយក្រែនប្រើប្រាស់អាវុធអង់គ្លេសបាញ់ចូលទឹកដីរុស្ស៊ីផងដែរ។ ប៉ុន្មានថ្ងៃមុននេះ ក្រុមអ្នកតំណាងរាស្ត្រអាមេរិកយល់ឃើញថាលោកបៃដិនគួរណាស់ដកចេញនូវការដាក់កំហិតឱ្យអ៊ុយក្រែនប្រើអាវុធជំនួយរបស់អាមេរិកតែនៅលើទឹកដីអ៊ុយក្រែន។ ចង់មានន័យថាលោកបៃដិនគួរណាស់បណ្ដោយឱ្យអ៊ុយក្រែនបាញ់ចូលទឹកដីរុស្ស៊ីខ្លះទៅ។
ចំណុចសំខាន់នៅត្រង់ថាថ្វីដ្បិតសង្គ្រាមអ៊ុយក្រែនផ្ទុះឡើងជាង២ឆ្នាំមកហើយក្ដី ប៉ុន្តែប្រទេសទាំង២ពុំដែលប្រកាសសង្គ្រាមដាក់គ្នាម្ដងណាឡើយ។ លោកពូទីនចាត់ទុកត្រឹមតែថានេះជាប្រតិបត្តិការពិសេសតែប៉ុណ្ណោះ។ បើរុស្ស៊ីប្រកាសសង្គ្រាម មានន័យថាសង្គ្រាមនេះមិនមែនតូចតាចទេ។ ដូច្នេះ ពិភពលោកកំពុងរង់ចាំអ៊ុតចំណុចនេះទាំងអស់គ្នា។ អ្នកខ្លះបារម្ភថាប្រទេសមហាអំណាចមិនគួរនិយាយពន្យុះឱ្យអ៊ុយក្រែនបាញ់ចូលរុស្ស៊ីទេ។ ក្រែងលោរុស្ស៊ីប្រើដៃធ្ងន់នាំឱ្យពិបាកខ្លួន។
ទោះជាយ៉ាងណាក្ដី ប្រទេសអាមេរិកដែលជាអ្នករៀមច្បងគេនៅក្នុងក្រុមសម្ព័ន្ធមិត្តរបស់អ៊ុយក្រែនចាប់ផ្ដើមផ្ដល់សញ្ញាភ្លើងខៀវទៅអ៊ុយក្រែនហើយ។ លោកបៃដិនបានអនុញ្ញាតឱ្យអ៊ុយក្រែនប្រើប្រាស់អាវុធរបស់អាមេរិកដើម្បីបាញ់ចូលទឹកដីរុស្ស៊ីហើយ។ ប៉ុន្តែការអនុញ្ញាតនេះធ្វើឡើងជាសម្ងាត់។ នេះបើយោងតាមការចុះផ្សាយរបស់ទស្សនាវដ្ដីប៉ូលីទីកូ (Politico) ដែលដកស្រង់ប្រភពមិនបញ្ចេញឈ្មោះរហូតដល់ទៅបីនាក់សុទ្ធតែនិយាយដូចៗគ្នា។
សូមបញ្ជាក់ត្រង់ចំណុចនេះថាលោកបៃដិនអនុញ្ញាតឱ្យបាញ់ចូលទឹកដីរុស្ស៊ីនៅក្បែរទីក្រុងខាគីវតែប៉ុណ្ណោះព្រោះលោកសម្លឹងឃើញថាទីក្រុងធំលំដាប់ទី២របស់អ៊ុយក្រែននេះមិនអាចបណ្ដោយឱ្យរុស្ស៊ីវាយយកបានដោយងាយស្រួលពេកទេ។ មន្ត្រីដែលស្នើសុំបញ្ចេញឈ្មោះខាងលើនោះបង្ហើបឱ្យដឹងថាលោកបៃដិនបានណែនាំឱ្យក្រុមការងាររបស់គាត់ធ្វើយ៉ាងណាឱ្យអ៊ុយក្រែនអាចប្រើអាវុធអាមេរិកវាយបកវិញទៅលើកងទ័ពរុស្ស៊ីនៅខាគីវ ហើយវាយរុញច្រានពួកគេឱ្យថយក្រោយវិញ។
បើអ៊ុយក្រែនមិនទាន់សម្រេចចិត្តធ្វើដូច្នេះទេ ពួកគេក៏អាចត្រៀមខ្លួនបាញ់កាំភ្លើងរបស់អាមេរិកជាបណ្ដើរៗចាប់ពីពេលនេះទៅក៏បានដែរ។ មន្ត្រីដដែលនេះសូមបញ្ជាក់ថាលោកបៃដិនឱ្យធ្វើដូច្នេះមែន ប៉ុន្តែលោកនៅតែរក្សាជំហរមិនគាំទ្រ និងមិនលើកទឹកចិត្តឱ្យអ៊ុយក្រែនប្រើប្រាស់អាវុធដែលអាចបាញ់បានឆ្ងាយៗ ឧទាហរណ៍ដូចជាគ្រាប់មីស៊ីល ឬយន្តហោះចម្បាំងវាយប្រហារចូលជ្រៅពេកទៅក្នុងទឹកដីរុស្ស៊ីទេ។ មានន័យថាលោកបន្តរក្សាទុកគោលនយោបាយនេះនៅជាធរមានដដែល។
ទស្សនាវដ្ដីប៉ូលីទីកូមិនបានបញ្ជាក់ឱ្យច្បាស់ថាតើលោកបៃដិនអនុញ្ញាតឱ្យអ៊ុយក្រែនធ្វើដូច្នេះតាំងពីពេលណាមក។ គួរកត់សម្គាល់ថាប្រទេសអាមេរិកធ្លាប់បាននិយាយជាហូរហែថាខ្លួនមិនលើកទឹកចិត្ត ឬជំរុញឱ្យអ៊ុយក្រែនប្រើអាវុធរបស់អាមេរិកបាញ់ចូលទឹកដីរុស្ស៊ីទេ។ ប៉ុន្តែប្រមុខការទូតអាមេរិក លោកប្លីងខិន (Blinken) នៅពេលអ្នកសារព័ត៌មានស្នើសុំឱ្យលោកបញ្ជាក់ជំហរឡើងវិញ លោកថាគោលនយោបាយរបស់អាមេរិកមិនប្រាកដជារឹងត្អឹងនៅមួយកន្លែងទេ។ ជួនកាលអាចបត់បែនចុះឡើងៗអាស្រ័យទៅលើកាលៈទេសៈ និងសភាពការណ៍ជាក់ស្ដែង។
យោងតាមកាសែតដឹញូយ៉កថាមស៍ (The New York Times) ប្រទេសផ្ដល់ជំនួយយោធាទៅឱ្យអ៊ុយក្រែនមានសិទ្ធិកំណត់លក្ខខណ្ឌថាអ៊ុយក្រែនអាចប្រើប្រាស់បានកម្រិតណា។ មានន័យថាអ៊ុយក្រែនអាចប្រើប្រាស់កាំភ្លើងកម្រិតណា ឬបែបណាស្រេចលើបុព្វសិទ្ធិរបស់ម្ចាស់ជំនួយ។ ប្រទេសគាំទ្រឱ្យអ៊ុយក្រែនប្រើអាវុធជំនួយរបស់ខ្លួនវាយចូលទឹកដីរុស្ស៊ីមានដូចជាកាណាដា អង់គ្លេស សាធារណរដ្ឋឆេក អេស្តូនី ហ្វាំងឡង់ បារាំង អាល្លឺម៉ង់ ឡាតវី លីទុយអានី ហូឡង់ ស៊ុយអែត និងប៉ូឡូញ។
អ្នកដែលនិយាយសម្ដីខែង និងចិត្តសឿងខ្លាំងជាងគេគឺអង់គ្លេសតាមរយៈប្រមុខការទូតរបស់ខ្លួននៅទីក្រុងកៀវកាលពីថ្ងៃទី៣ ខែឧសភា។ លោកនិយាយផូងៗដោយឥតសំចៃមាត់ថារុស្ស៊ីវាយប្រហារអ៊ុយក្រែនដោយឥតបន្ធូរដៃ។ ដូច្នេះ អ៊ុយក្រែនអាចប្រើប្រាស់ការគិតតាមការគួរថាតើខ្លួនគួរវាយបកទៅរុស្ស៊ីវិញ ឬយ៉ាងណា។ លោកចាត់ទុកថានេះជាសិទ្ធិស្វ័យសម្រេចរបស់អ៊ុយក្រែន និងជាការទទួលខុសត្រូវផ្ទាល់របស់អ៊ុយក្រែនក្នុងការប្រើប្រាស់សិទ្ធិការពារខ្លួន។
ពាក្យសម្ដីនេះធ្វើឱ្យមេដឹកនាំប្រទេសសម្ព័ន្ធមិត្តដទៃទៀតចាប់ផ្ដើមមានចិត្តក្លាហានជាងមុន។ ឥឡូវនេះ ប្រធានាធិបតីបារាំង លោកម៉ាក្រុងកំពុងនិយាយបញ្ចុះបញ្ចូលអធិការបតីអាល្លឺម៉ង់ លោកអូឡាហ្វ សូល (Olaf Scholz) ដើម្បីឱ្យលោកកែប្រែគោលជំហរឡើងវិញ។ លោកម៉ាក្រុងថ្លែងនៅចំពោះមុខលោកសូលថាបើយើងនៅតែធ្វើបែបនេះតទៅទៀតមិនខុសពីការនិយាយពាក្យមួយឃ្លាទៅអ៊ុយក្រែនថា «យើងផ្ដល់អាវុធជូនទៅអ្នក។ ប៉ុន្តែសូមអ្នកកុំបាញ់អាវុធទាំងនេះឱ្យសោះ»៕
ចែករំលែកព័តមាននេះ