ទីក្រុងឥស្លាមម៉ាបាត៖ ប្រទេសប៉ាគីស្ថានបន្ទាប់ពីប៉ះទង្គិចគ្នាជាមួយឥណ្ឌាមួយប្រាវកាលពីប៉ុន្មានសប្ដាហ៍មុននោះ ឥឡូវនេះកំពុងរងគ្រោះយ៉ាងដំណំដោយសារខ្យល់កន្ត្រាក់ និងភ្លៀងធ្លាក់ខ្លាំងវិញម្ដង។ អាជ្ញាធរអះអាងថាមនុស្សយ៉ាងតិច៣២នាក់ស្លាប់ និងជាង១៥០នាក់រងរបួសដោយសារភ្លៀង និងខ្យល់កន្ត្រាក់ដែលវាយប្រហារយ៉ាងសង្គ្រប់ទៅលើតំបន់នានាទូទាំងប្រទេសនេះរយៈពេលមួយសប្ដាហ៍។
គិតទៅ, គ្រោះធម្មជាតិនេះហាក់ដូចជាប្រែប្រួលឆាប់រហ័សពេកហើយ។ កាលពីមុននេះ ប៉ាគីស្ថានទើបតែកើតមានរលកកម្ដៅស្ទើរឆេះ។ មិនយូរប៉ុន្មានក៏មានភ្លៀងធ្លាក់ខ្លាំងជាច្រើនមេជាប់ៗគ្នា។ អាជ្ញាធររាយការណ៍ថាមនុស្សស្លាប់៥នាក់ទៀតកាលពីថ្ងៃព្រហស្បតិ៍ដោយសារភ្លៀង និងខ្យល់កន្ត្រាក់នៅភាគពាយព្យ។ ក្រសួងឧតុនិយមព្យាករថាស្ថានភាពខ្យល់កន្ត្រាក់នឹងបន្តកើតឡើងនៅភាគខាងជើង និងភាគកណ្ដាលប្រទេសប៉ាគីស្ថានរហូតដល់ថ្ងៃសៅរ៍សប្ដាហ៍នេះទើបស្ងប់ស្ងាត់ទៅវិញ។
កាលពីថ្ងៃសៅរ៍សប្ដាហ៍មុន បាតុភូតខ្យល់កន្ត្រាក់បានឆក់យកជីវិតមនុស្ស១៤នាក់ និងក្រោយមកនៅថ្ងៃអង្គារស្លាប់ថែម១០នាក់ថែមទៀត។ អាជ្ញាធរចាត់ទុកថានេះជាហេតុការណ៍ដ៏អាក្រក់បំផុតមួយដែលកើតឡើងនៅប៉ាគីស្ថានដោយសារការប្រែប្រួលអាកាសធាតុយ៉ាងឆាប់រហ័ស។ នៅទីក្រុងហ៊ីដេរ៉ាបាត (Hyderabad) ខេត្តស៊ីន (Sindh) កាលពីថ្ងៃពុធស្លាប់ក្មេងៗបីនាក់។
ប្រភពខ្លះថាករណីស្លាប់ភាគច្រើនបំផុតបណ្ដាលមកពីខ្យល់បក់ខ្លាំងធ្វើឱ្យបាក់ជញ្ជាំង និងដំបូលផ្ទះ។ ក្រៅពីនេះក៏មានករណីស្លាប់ដោយសារបន្ទះផ្ទាំងសូឡាហោះប៉ើងទៅត្រូវជនរងគ្រោះផងដែរ។ ជារៀងរាល់ឆ្នាំឱ្យតែដល់រដូវវស្សាម្ដងៗ មនុស្សស្លាប់យ៉ាងរង្គាលដោយសារភ្លៀង ផ្គរ រន្ទះ និងខ្យល់កន្ត្រាក់នៅប្រទេសប៉ាគីស្ថាន។ ប៉ុន្តែចម្លែកឆ្នាំនេះ ភ្លៀងចាប់ផ្ដើមធ្លាក់ និងមានខ្យល់បក់ខ្លាំងខុសពីសព្វមួយដង។
ប៉ាគីស្ថានក៏មិនខុសពីប្រទេសដទៃទៀតនោះទេ បាន និងកំពុងជួបប្រទះនឹងអាកាសធាតុប្រែប្រួលឆាប់រហ័ស។ រដូវរងាដែលធ្លាប់តែត្រជាក់ខ្លាំងបែរជាក្ដៅហួតហែងខ្លាំងដល់ថ្នាក់រីងទឹកអស់រលីងពីត្រពាំង បឹង បួរ។ ចូលដល់ខែចែត្ររឹតតែក្ដៅបែកក្រហែង។ ឈានដល់ខែឧសភានេះ សីតុណ្ហភាពហក់ឡើងខ្ពស់ជាងខែឧសភាឆ្នាំមុនៗរហូតដល់៦អង្សា។ ពោលគឺតំបន់ខ្លះសីតុណ្ហភាពអតិបរមាកើនឡើងដល់៤៨អង្សា៕
ចែករំលែកព័តមាននេះ