ព្រៃវែង ៖ រថយន្តសាំយ៉ុងចំនួន ២គ្រឿង ដែលផ្ទុកធ្យូង សរុបប្រមាណជិត ៤ តោនបម្រុងឆ្លងដែនទៅប្រទេសវៀតណាម ត្រូវបានកម្លាំងកងរាជអាវុធហត្ថស្រុកព្រះស្ដេច ឆ្មក់បង្ក្រាបបាន…
ព្រៃវែង ៖ រថយន្តសាំយ៉ុងចំនួន ២គ្រឿង ដែលផ្ទុកធ្យូង សរុបប្រមាណជិត ៤ តោនបម្រុងឆ្លងដែនទៅប្រទេសវៀតណាម ត្រូវបានកម្លាំងកងរាជអាវុធហត្ថស្រុកព្រះស្ដេច ឆ្មក់បង្ក្រាបបាន រួចប្រគល់ទៅឲ្យមន្ត្រីជំនាញរដ្ឋបាលព្រៃឈើ ចាត់ការបន្តទៅតាមនីតិវិធី ។
សកម្មភាពចុះបង្ក្រាបការនាំចេញធ្យូង ដោយខុសច្បាប់នេះបានធ្វើឡើងនៅវេលាម៉ោង៨និង៣០នាទីព្រឹក ថ្ងៃទី២៩ ឧសភា នៅចំណុចភូមិអន្លង់ចា ឃុំព្រះស្ដេច ស្រុកព្រះស្ដេច ខេត្តព្រៃវែង ។
រថយន្តដែលត្រូវបានកម្លាំងអាវុធហត្ថស្រុកព្រះស្ដេចចាប់ឃាត់ មានចំនួន ២ គ្រឿង ដោយទី១ រថយន្តម៉ាកសាំយ៉ុង ពណ៌ខៀវលាយបៃតង គ្មានស្លាកលេខ បើកបរដោយឈ្មោះ អាន អឿន ភេទប្រុស អាយុ៣១ឆ្នាំ រស់នៅភូមិមជ្ឈិមភាគ ឃុំអញ្ជើម ស្រុកត្បូងឃ្មុំ ខេត្តត្បូងឃ្មុំ និងអ្នករួមដំណើរម្នាក់ឈ្មោះ ណូន ពៅ ភេទប្រុស អាយុ២១ឆ្នាំ រស់នៅភូមិ.ឃុំខាងលើជាមួយគ្នា ដឹកធ្យូងទម្ងន់២៧០០គីឡូក្រាម ។ ទី២ រថយន្តម៉ាកសាំយ៉ុង ក្បាលពណ៌សលាយខៀវ ទ្រុងពណ៌បៃតង អត់ស្លាកលេខ បើកបរដោយឈ្មោះ ឆឺត វាសនា ភេទប្រុស អាយុ ៣៣ឆ្នាំ រស់នៅភូមិកូនត្មាត ឃុំអញ្ចើមស្រុកត្បូងឃ្មុំ ខេត្តត្បូងឃ្មុំ ។
និងអ្នករួមដំណើរឈ្មោះ ទូច ជ័យ ភេទប្រុស អាយុ៣០ឆ្នាំ រស់នៅភូមិត្រពាំងចក ឃុំអញ្ចើម ស្រុកត្បូងឃ្មុំ ខេត្តត្បូងឃ្មុំ ។ ដឹកធ្យូងម្ងន់១១០០គីឡូក្រាម ។
ប្រភពព័ត៌មានពីមន្ត្រីអាវុធហត្ថស្រុកព្រះស្ដេច បានឲ្យដឹងថា ក្រោយពេលចាប់ឃាត់រថយន្តទាំងពីរគ្រឿងនេះ សួរនាំរកឯកសារពាក់ព័ន្ធក្នុងការដឹកជញ្ជូន ប៉ុន្តែរថយន្តទាំងពីរគ្រឿងនេះ អត់មានឯកសារអ្វីទាំងអស់ ទើបមន្ត្រីជំនាញអាវុធហត្ថស្រុកព្រះស្ដេច ចាប់ឃាត់រថយន្តទាំងពីរ រួចប្រគល់ទៅឲ្យមន្ត្រីជំនាញរដ្ឋបាលព្រៃឈើបាភ្នំ ចាត់ការបន្ត ហើយបច្ចុប្បន្ន មនុស្សទាំង៤នាក់ រួមទាំងវត្ថុតាង ត្រូវបានឃាត់ទុកនៅស្នាក់ការផ្នែករដ្ឋបាលព្រៃឈើបាភ្នំ ៕
ចែករំលែកព័តមាននេះ