ទីក្រុងម៉ានីឡា៖ ថ្មីៗនេះ កងសន្តិសុខរបស់រដ្ឋាភិបាលហ្វ៊ីលីពីនបានបើកប្រតិបត្តិការសឹកបាញ់សម្លាប់ក្រុមប្រដាប់អាវុធឥស្លាមនិយមចំនួនដប់នាក់។ ពួកគេមិនព្រមប្រគល់ខ្លួនឱ្យចាប់តាមសម្រួលទេ។ ដូច្នេះក៏កើតជាការបាញ់តដៃគ្នា។ ការប្រយុទ្ធគ្នារវាងនគរបាលទល់នឹងចលនាប្រដាប់អាវុធទាំងនោះកើតឡើងនៅតំបន់ខាងត្បូងដែលសម្បូរប្រជាជនកាន់សាសនាឥស្លាមរស់នៅ។ នៅទីនេះ ក្រុមឧទ្ទាមដែលនៅសេសសល់នៅតែបន្តការតស៊ូរបស់ខ្លួន។
នៅក្នុងចំណោមអ្នកស្លាប់ទាំងនោះក៏មានលោកអាមេរ៉ូល ម៉ាន់ហ្គោរ៉ាន់កា (Amerol Mangoranca) ជាមេដឹកនាំចលនាប្រដាប់អាវុធឈ្មោះម៉ូតតេ ដាឡាស់ ឥស្លាមមីយ៉ាស់ (Maute-Dawlah Islamiya)។ នេះបើយោងតាមការបង្ហើបឱ្យដឹងពីនគរបាលប្រចាំតំបន់កើតហេតុ។ កងកម្លាំងរបស់រដ្ឋាភិបាលបានធ្វើដំណើរទៅដល់ជិតទីក្រុងម៉ារ៉ាន់តាវ (Marantao) មុនពេលព្រឹកព្រហាមដើម្បីអនុវត្តតាមដីកាចាប់ខ្លួនលោកម៉ាន់ហ្គោរ៉ាន់កា និងបក្សពួករបស់គាត់ពាក់ព័ន្ធនឹងបទល្មើសជាច្រើនករណីដែលមានជាអាទិ៍៖ អំពើកាប់សម្លាប់, អំពើមនុស្សឃាត និងការចាប់ជំរិតមនុស្ស។
ក្រោយមក ភាគីទាំង២ក៏បាញ់តដៃគ្នារយៈពេលមួយម៉ោង។ ខាងចលនាឧទ្ទាមក៏មានប្រពន្ធរបស់មេឧទ្ទាម និងនារីបីនាក់ផងដែរ។ យោងតាមសេចក្ដីរាយការណ៍ដាច់ដោយឡែកមួយទៀតរបស់យោធាហ្វ៊ីលីពីន គេបានរកឃើញកុមារតូចម្នាក់នៅរស់រានមានជីវិតក្រោយពេលឆាកប្រយុទ្ធគ្នាបានបិទបញ្ចប់ទៅវិញ។ យោធាខាងលើថ្លែងបន្តទៀតថាខាងកងកម្លាំងរបស់រដ្ឋាភិបាលមិនបានរងរបួស ឬស្លាប់ទេ។ ពួកគេថែមទាំងរឹបអូសបានកាំភ្លើង និងគ្រាប់រំសេវមួយចំនួនទៀតផង។
ក្រុមឧទ្ទាមខាងលើនេះត្រូវគេសង្ស័យថាជាអ្នកនៅពីក្រោយការវាយឆ្មក់មួយករណីកាលពីខែមករា ឆ្នាំ២០២៦បណ្ដាលឱ្យស្លាប់ទាហាន៤នាក់ និងរបួសម្នាក់។ ជនប្រដាប់អាវុធដែលត្រូវបានបាញ់សម្លាប់លើកនេះជាបក្សពួកតែមួយដែលវាយដណ្ដើមកាន់កាប់ទីក្រុងម៉ារ៉ាវី (Marawi) កាលពីប៉ុន្មានឆ្នាំមុន និងក៏ជាអ្នកក្រឡុកស្ថានការណ៍ធ្វើឱ្យមានអំពើហិង្សាជាច្រើនឆ្នាំមកហើយ៕ ប្រភព៖ អារ៉ាប់ ញូស៍ (Arab News) និងប្រភពដទៃទៀត
ចែករំលែកព័តមាននេះ