រាជធានីភ្នំពេញ ៖ កម្ពុជាកំពុងតែជំរុញធ្វើយ៉ាងណាប្រែក្លាយកំពង់ផែក្រុងព្រះសីហនុឱ្យក្លាយទៅជាកំពង់ផែតំបន់ និងមជ្ឈមណ្ឌលឡូជីស្ទីក ឬភស្តុភាកម្ម នៅឆ្នាំ ២០៥០ ។ នេះបើតាមការលើកឡើងរបស់ លោក…
រាជធានីភ្នំពេញ ៖ កម្ពុជាកំពុងតែជំរុញធ្វើយ៉ាងណាប្រែក្លាយកំពង់ផែក្រុងព្រះសីហនុឱ្យក្លាយទៅជាកំពង់ផែតំបន់ និងមជ្ឈមណ្ឌលឡូជីស្ទីក ឬភស្តុភាកម្ម នៅឆ្នាំ ២០៥០ ។ នេះបើតាមការលើកឡើងរបស់ លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី ១ ក្រុមប្រឹក្សាអភិវឌ្ឍន៍កម្ពុជា ។
លោកឧបនាយករដ្ឋមន្ត្រីបានលើកឡើងនូវផែនការនេះប្រាប់ លោក សៃតូ តេស៊ូអូ (Saito TETSUO) រដ្ឋមន្ត្រីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន នៅព្រឹកថ្ងៃ ទី ២៣ ខែឧសភា ឆ្នាំ ២០២៤ ក្នុងឱកាសចូលរួមក្នុងសន្និសីទអន្តរជាតិលើកទី ២៩ ស្ដីពី «អនាគតរបស់អាស៊ី» ។
លោក ស៊ុន ចាន់ថុល បានថ្លែងអំណរគុណទៅកាន់មិត្តជប៉ុនដែលតែងតែចូលរួមយ៉ាង សកម្ម ក្នុងការកសាងសង្គមសេដ្ឋកិច្ចកម្ពុជា និងការចូលរួមកសាងហេដ្ឋារចនាសម្ព័ន្ធនៅក្នុង ប្រទេសកម្ពុជា ។ ជាក់ស្តែងនៅដើមអាណត្តិទី ៧ នេះផងដែរ រាជរដ្ឋាភិបាលបានធ្វើការសម្ពោធ និងបើកការដ្ឋានដែលជាជំនួយរបស់មិត្តជប៉ុនជាបន្តបន្ទាប់រួមមាន ផ្លូវជាតិលេខ ៥ ប្រព័ន្ធប្រព្រឹត្តកម្មទឹកកខ្វក់ជើងឯក និងគម្រោងបើកការដ្ឋានលើកកម្ពស់កំពង់ផែក្រុងព្រះសីហនុ ដំណាក់កាលទី ២ ជំហានទី ១ ។
ឆ្លៀតក្នុងឱកាសនោះ លោកឧបនាយករដ្ឋមន្ត្រីក៏បានសំណូមពរឱ្យភាគីជប៉ុន ជួយពន្លឿនការអនុវត្តគម្រោងលើកកម្ពស់កំពង់ផែក្រុងព្រះសីហនុឱ្យបានទាន់ពេលវេលា និងជំរុញ គម្រោងការសិក្សាធ្វើឱ្យកំពង់ផែក្រុងព្រះសីហនុក្លាយជាកំពង់ផែតំបន់ និងមជ្ឈមណ្ឌលឡូជីស្ទីក នៅឆ្នាំ ២០៥០ ដើម្បីជំរុញសន្ទុះកំណើនសេដ្ឋកិច្ចកម្ពុជា ។
ជាការឆ្លើយតប លោករដ្ឋមន្ត្រីជប៉ុន បានបង្ហាញនូវការតាំងចិត្តយ៉ាងមុតមាំនឹងជំរុញឱ្យភាគីពាក់ព័ន្ធពន្លឿនការអនុវត្តគម្រោងលើកកម្ពស់កំពង់ផែស្វយ័តក្រុងព្រះសីហនុ នេះឱ្យ បានកាន់តែឆាប់រហ័សដើម្បីធានាបានថា គម្រោងការនេះនឹងអាចបញ្ចប់តាមផែនការដែលបានគ្រោងទុក ។
បន្ថែមពីនេះ លោកក៏បានបង្ហាញនូវការតាំងចិត្តថា នឹងស្នើឱ្យភាគីពាក់ព័ន្ធពិនិត្យលើសំណើ គម្រោងសិក្សាផែនការមេធ្វើឱ្យកំពង់ផែក្រុងព្រះសីហនុ ក្លាយជាកំពង់ផែតំបន់ និង មជ្ឈមណ្ឌលឡូជីស្ទីកនៅឆ្នាំ ២០៥០ ឱ្យបានកាន់តែឆាប់រហ័ស សំដៅអាចឱ្យការសិក្សា គម្រោងនេះអាចចាប់ផ្តើមនាពេលដ៏ខ្លីខាងមុខនេះ ។
កំពង់ផែស្វយ័តក្រុងព្រះសីហនុ គឺជាកំពង់ផែសមុទ្រទឹកជ្រៅដ៏សំខាន់នៃព្រះរាជាណាចក្រកម្ពុជា ដែលមានផ្ទៃដីប្រតិបត្តិការប្រមាណ ១២៥ ហិកតា ។ កំពង់ផែស្ថិតនៅឈូងសមុទ្រកំពង់សោម ដែលជាកំពង់ផែទឹកជ្រៅតែមួយគត់សម្រួលដល់ការដឹកជញ្ជូនតាមសមុទ្រដែលទទួលបានភាពអនុគ្រោះពីធម្មជាតិ ដូចជាមានជម្រៅទឹកជ្រៅ មានកោះជារបាំងខ្យល់ និងរលកធំៗ ហើយស្ថិតនៅចំទីតាំងដែលពុំតម្រូវឱ្យមានការបូមស្តារឃ្លងនាវាជាប្រចាំឡើយ ៕
ចែករំលែកព័តមាននេះ