ខេត្តបន្ទាយមានជ័យ ៖ នាយករងម្នាក់​នៃសាលាបឋមសិក្សាថ្មពួក ស្រុកថ្មពួក ខេត្តបន្ទាយមានជ័យ ត្រូវបានឃាត់ខ្លួនបញ្ជូនទៅសាលាដំបូងខេត្តបន្ទាយមានជ័យ កាលពី​ថ្ងៃទី២៥ ខែឧសភា ឆ្នាំ២០២៤ ពីបទលួងរំលោ.ភសិស្សស្រីម្នាក់បានសម្រេចជាច្រើនលើក ដោយសន្យាឱ្យពិន្ទុល្អ និង​ចំណាត់ថ្នាក់ខ្ពស់​ ។

លោកស្រីឧត្តមសេនីយ៍ត្រីឌី សុជាតិ ស្នងការរង ទទួលផែនការងារប្រឆាំងការជួញដូរមនុស្សនិងយែនឌឺ បានឱ្យដឹងថា ជនសង្ស័យឈ្មោះ មន្ត សុមិត្ត ភេទប្រុស អាយុ៥៣ឆ្នាំ រស់នៅភូមិអណ្ដូងខ្លុង ឃុំគំរូ ស្រុកថ្មពួក ខេត្តបន្ទាយមានជ័យ មានតួនាទីជានាយករងសាលាបឋមសិក្សាថ្មពួក ស្ថិតក្នុងស្រុកថ្មពួក ខេត្តបន្ទាយមានជ័យ ។ ចំណែក​សិស្ស​ស្រីរងគ្រោះ​មាន​អាយុ១២ឆ្នាំ ។

លោកស្រីឧត្តមសេនីយ៍ស្នងការរង ​បាន​បន្តថា ការឃាត់ខ្លួនជនសង្ស័យម្នាក់នេះគឺយោងតាមបណ្ដឹង​ពីប្រជាពលរដ្ឋឈ្មោះ ទឹម ញ៉ាន ភេទប្រុស អាយុ៦២ឆ្នាំ រស់នៅស្រុកថ្មពួក ខេត្តបន្ទាយមាន​ជ័យ ​កាល​ពី​ថ្ងៃទី២៤ ខែឧសភា ឆ្នាំ២០២៤ ​បាន​ប្តឹងចោទប្រកាន់ទៅលើឈ្មោះ មន្ត សុមិត្ត នាយករង បាន​លួង​លោមចៅស្រីរបស់គាត់រំលោ.ភសម្រេចជាច្រើនលើក ខណៈពេលគាត់បានឃើញទឹកមុខចៅស្រីមានសភាពស្លេកស្លាំងខុសពីធម្មតា ហើយបានសួរនាំ ចៅស្រីបានប្រាប់ពីហេតុការណ៍ដែលបានកើត​មក​លើខ្លួននោះ ។ ក្រោយពីទទួលបណ្ដឹងរួចមក កម្លាំងនគរបាលស្រុកថ្មពួកបាននាំខ្លួនជនសង្ស័យមកសួរនាំ នៅអធិការដ្ឋាននគរបាលស្រុកថ្មពួក ។

លោកស្រីឧត្តមសេនីយ៍ត្រី ឌី សុជាតិ បានបញ្ជាក់ថា នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានរំលោភក្មេងស្រីរងគ្រោះពិតមែនកាលពីខែមេសានិងនៅថ្ងៃទី២២ ខែឧសភា ឆ្នាំ២០២៤នេះ នៅក្នុងបន្ទប់បណ្ណាល័យ ដោយសន្យាឱ្យពិន្ទុល្អ និងឱ្យចំណាត់ថ្នាក់ខ្ពស់ ។

ដោយផ្អែកលើបណ្ដឹងជីតាក្មេងស្រីរងគ្រោះ និងការបំភ្លឺពីជនរងគ្រោះ ព្រមទាំងចម្លើយសារភាពរបស់ជនសង្ស័យ ។

បច្ចុប្បន្ន ជនសង្ស័យត្រូវបានកម្លាំងនគរបាលការិយាល័យប្រឆាំងការជួញដូរមនុស្សនិងការពារអនីតិជន បានរៀបចំសំណុំរឿងបញ្ជូនខ្លួនទៅសាលាដំបូងខេត្តបន្ទាយចាត់ការតាមនីតិវិធីហើយដែរ ៕