ADផ្ទាំងផ្សព្វផ្សាយពាណិជ្ជកម្ម

Picture

មិនធម្មតា មុខសញ្ញា​២​នាក់ សេព​គ្រឿងញៀ.ន​៣​ឆ្នាំ ធ្លាប់​ប្លន់ និង​ឆក់​យ៉ាង​សកម្ម​នៅ​ខេត្តកំពង់ស្ពឺ

4 អាទិត្យ មុន

ខេត្តកណ្ដាល ៖ ជនសង្ស័យ​២​នាក់ គឺជា​មុខសញ្ញា​ចោរកម្ម ដែល​កន្លង​មក​ធ្លាប់​ធ្វើ​សកម្មភាព​ប្លន់ និង​ឆក់​កាបូប យ៉ាង​សកម្ម​បាន​សម្រេច​ច្រើន​លើក នៅ​ក្នុងភូមិ​សាស្ត្រ​ខេត្តកំពង់ស្ពឺ និង​ប្រើប្រាស់​គ្រឿងញៀន ៣​ឆ្នាំ…

ខេត្តកណ្ដាល ៖ ជនសង្ស័យ​២​នាក់ គឺជា​មុខសញ្ញា​ចោរកម្ម ដែល​កន្លង​មក​ធ្លាប់​ធ្វើ​សកម្មភាព​ប្លន់ និង​ឆក់​កាបូប យ៉ាង​សកម្ម​បាន​សម្រេច​ច្រើន​លើក នៅ​ក្នុងភូមិ​សាស្ត្រ​ខេត្តកំពង់ស្ពឺ និង​ប្រើប្រាស់​គ្រឿងញៀន ៣​ឆ្នាំ មក​ហើយ តែ​មានសំណាង​បាន​គេចខ្លួន​រួច​រហូត ។ ស្រាប់តែ​នៅ​ចុង​ក្រោយ​នេះ ដូរ​ទីកន្លែង​ចូល​មក​ធ្វើ​សកម្មភាព​នៅ​ក្នុង​ទឹកដី​ស្រុក​អង្គស្នួល ខេត្តកណ្ដាល​វិញ​ម្ដង ហើយ​បាន​ធ្វើ​សកម្មភាព​ធាក់​ប្លន់​ម៉ូតូ​ពី​សិស្សសាលា​ស្រី​ម្នាក់ ខណៈ​ដែល​នាង​កំពុង​ជិះ​ម៉ូតូ​ចេញពី​សាលារៀន​ទៅ​ផ្ទះ បណ្ដាល​ឲ្យ​នាង​ដួល​រង​របួស​យ៉ាងដំណំ ហើយ​ជនសង្ស័យ​បាន​យក​ម៉ូតូ​ជិះ​គេចខ្លួន ។

ប៉ុន្តែ​ពេល​មក​ធ្វើ​សកម្មភាព​នៅ​ក្នុង​ទឹកដី​ស្រុក​អង្គស្នួល មិន​ងាយស្រួល​ឯណា ក៏​ត្រូវ​បាន​កម្លាំង​នគរបាល​ស្រុក​គ្រប់​ផ្នែក រួម​ជាមួយ​កម្លាំង​ប៉ុស្តិ៍​នគរបាល​រដ្ឋបាល​ម្កាក់ ប៉ុស្តិ៍​សំរោង​លើ ប៉ុស្តិ៍​ពើក និង​ប៉ុស្តិ៍​ដំណាក់​អំពិល នៃ​អធិការដ្ឋាន​នគរបាល​ស្រុក​អង្គស្នួល ខេត្តកណ្ដាល ដោយ​មានការ​ចូលរួម​ពី​កម្លាំង​ប្រជា​ការពារ​ភូមិ​ផង និង​សហ​ការណ៍​ជាមួយ​នគរបាល​ប៉ុស្តិ៍​ភ្នំ​តូច នៃ​អធិការដ្ឋាន​ស្រុក​សាមគ្គី​មុនី​ជ័យ ខេត្តកំពង់ស្ពឺ ដេញ​តាម​ឃាត់ខ្លួន​ទាល់តែ​បាន និង​ដកហូត​បាន​ម៉ូតូ​ប្រគល់​ជូន​ជន​រង​គ្រោះ​ផង​ដែរ ។

ហេតុការណ៍​នេះ បាន​កើតឡើង​កាលពី​វេលា​ម៉ោង​០៥​និង​៣០​នាទី​ល្ងាច​ថ្ងៃ​ទី​២៣ ខែឧសភា ឆ្នាំ​២០២៤ នៅ​តាម​ផ្លូវ​កៅស៊ូ ស្ថិត​នៅ​ក្នុងភូមិ​ខ្លុង ឃុំ​ទួល​ព្រេ​ជ ស្រុក​អង្គស្នួល ខេត្តកណ្តាល ។

ជនសង្ស័យ រួម​មាន ៖
ទី​១-​ឈ្មោះ ឱម ណាំ​ឈៀវ ភេទ​ប្រុស អាយុ​២៦​ឆ្នាំ (​មាន​សារធាតុ​ញៀន​ក្នុង​ទឹកនោម ។
ទី​២-​ឈ្មោះ ស៊ី​ម សាល ភេទ​ប្រុស អាយុ​១៨​ឆ្នាំ (​មាន​សារធាតុ​ញៀន​ក្នុង​ទឹកនោម ) ។
អ្នក​ទាំង​២​នេះ ស្នាក់​នៅ​ក្នុងភូមិ​អណ្តូង​ច្រុះ សង្កាត់​ត្រាច​ទង ក្រុង​ឧដុង្គ​ម៉ែ​ជ័យ ខេត្តកំពង់ស្ពឺ ។

ជនសង្ស័យ​ក៏​បាន​សារភាព​ប្រាប់​នគរបាល​ថា កន្លង​មក​ពួក​ខ្លួន​ទាំង​២​នាក់ និង​បក្ខពួក ធ្លាប់​បាន​ធ្វើ​សកម្មភាព​ធាក់​ប្លន់​យក​ម៉ូតូ​ចំនួន​០២​លើក និង​ឆក់​កាបូប​តាម​ផ្លូវ​ចំនួន​០៣​លើក នៅ​ក្នុង​ទឹកដី​ខេត្តកំពង់ស្ពឺ ហើយ​ក៏​បាន​ប្រើប្រាស់​ថ្នាំ​ញៀន អស់​រយៈពេល​០៣​ឆ្នាំ​មក​ហើយ​ដែរ ។

នគរបាល​ដកហូត​បាន​វត្ថុ​តាង រួម​មាន ៖ ម៉ូតូ​ម៉ាក​ហុងដា​ស្កូ​ប​ពី ពណ៌​ស ផលិត​ឆ្នាំ​២០២១ ពាក់​ស្លាក​លេខ ភ្នំពេញ​1IW-0098 (​ជា​របស់​ជន​រង​គ្រោះ​) ម៉ូតូ​ម៉ាក​យ៉ា​ម៉ា​ហា​MT ពណ៌​កាប់​ស្តាំ​ង​ផលិត​ឆ្នាំ​២០១៩ ពាក់​ស្លាក​លេខ ភ្នំពេញ​1KF-9310 (​ជា​របស់​ជនសង្ស័យ ជិះ​ធ្វើ​សកម្មភាព​) ទូរ​សព្ទ​ដៃ​ចំនួន​០២​គ្រឿង​ម៉ាក​សាំ​ស៊ុ​ង A13 ពណ៌​ផ្ទៃមេឃ​១​គ្រឿង​, ទូរ​សព្ទ​ដៃ​ម៉ាក​អូ​ប៉ូ ពណ៌​ខ្មៅ​១​គ្រឿង​(​ជា​របស់​ជនសង្ស័យ​) អាវធំ​ពណ៌​ស​០១, មួក​សុវត្ថិភាព​០១, កូន​កន្ត្រៃ​ចំនួន​០២, កូនសោ​ដោះ​គ្រឿង​លេខ​១៣​ចំនួន​០១, ទួន​ណា​វី​ស​ដង​ឈើ​០១, នាឡិកាដៃ​ចំនួន​០២​គ្រឿង​, លោហធាតុ​ពណ៌​លឿង​(​ចិ​ញ្ជៀ​ន​ចំនួន​០៣​វង់​), កាត​ធនាគារ​វី​ង​(Wing Bank)​ចំនួន​០៤​សន្លឹក​, កាបូប​ដាក់​លុយ​ពណ៌​ខ្មៅ​០១, កាបូបស្ពាយ​ពណ៌​ត្រេ​អ៊ី ០១(​ជា​របស់​ជនសង្ស័យ​)​។

ដោយឡែក​សិស្ស​ស្រី​រង​គ្រោះ​ឈ្មោះ ស​.​អ​.​ស​.​គ​.​ក អាយុ​១៧​ឆ្នាំ ជនជាតិ​ខ្មែរ រៀន​នៅ​វិទ្យាល័យ​ហ៊ុន សែន អង្គស្នួល ឃុំ​បែក​ចាន ស្រុក​អង្គស្នួល ។ នាង​បាន​របួស​ដាច់​រលាត់​សាច់​ចំនួន​០៣​កន្លែង គឺ​នៅ​ស្មា​ខាងស្តាំ​០១​កន្លែង​, ក្បាលជង្គង់​ខាងស្តាំ​០១​កន្លែង និង​ខ្នងជើង​ខាងស្តាំ​០១​កន្លែង ។

នគរបាល​បាន​ប្រាប់​ឲ្យ​ដឹង​ថា នៅ​មុន​ពេល​កើតហេតុ​សិស្ស​ស្រី​រង​គ្រោះ​ខាងលើ បាន​ជិះ​ម៉ូតូ​ម្នាក់ឯង ចេញពី​រៀន​ត្រលប់​ទៅ​ផ្ទះ លុះ​ពេល​ទៅ​ជិត​ដល់​ត្រង់​ចំណុច​កើតហេតុ បានឃើញ​ជនសង្ស័យ​០២​នាក់​នោះ កំពុង​ជិះ​ម៉ូតូ​ធំ​០១​គ្រឿង ខណៈនោះ​នាង​បាន​បើក​ម៉ូតូ​វ៉ា​ជែង​ទៅ​មុន ស្រាប់តែ​ជនសង្ស័យ​បើក​ម៉ូតូ​ដេញ​តាម​ពីក្រោយ រួច​ធ្វើ​សកម្មភាព​ធាក់​ដៃចង្កូត​ម៉ូតូ​របស់​នាង​បណ្តាល​ឲ្យ​ដួល​ម៉ូតូ​បោក​នឹង​ថ្នល់​រង​របួស​។ បន្ទាប់​មក​ជនសង្ស័យ​ម្នាក់ ដែល​ជិះ​ក្រោយ បាន​ចុះ​ទៅ​លើក​ម៉ូតូ​របស់​ជន​រង​គ្រោះ ហើយ​នាំ​គ្នា​ជិះ​គេចខ្លួន​ត្រឡប់​ក្រោយ​ទៅ​ទិស​ខាងកើត​វិញ ។

នគរបាល​ដដែល បាន​ប្រាប់​ឲ្យ​ដឹង​បន្ត​ទៀត​ថា ភ្លាម​ៗ​នោះ នាងរង​គ្រោះ​បាន​ទូរ​សព្ទ​ប្រាប់​ឪពុក​របស់​នាង ហើយ​ឪពុក​របស់​នាង​បាន​ទូរ​សព្ទ​រាយការណ៍ ប្រាប់​ប្រជា​ការពារ​ភូមិ ទើប​មានការ​ស្រែក​ប្រកាស​តាម​វិទ្យុ​ក​ទាក់ទង ទៅ​កាន់​កម្លាំង​ប៉ុស្តិ៍​នគរបាល​រដ្ឋបាល​ទួល​ព្រេ​ជ​ឲ្យ​ជួយ​អន្តរាគមន៍​។ ក្រោយ​ពី​ទទួល​បាន​ព័ត៌មាន​នោះ​ហើយ កម្លាំង​នគរបាល​ប៉ុស្ដិ៍​ទួល​ព្រេ​ជ បាន​ចេញ​ធ្វើការ​ពួនស្ទាក់ នៅ​ក្នុងភូមិ​សាស្ត្រ​របស់​ខ្លួន ក៏​ឃើញ​ជនសង្ស័យ​កំពុង​ជិះ​ម៉ូតូ​ម្នាក់​១​គ្រឿង​យ៉ាង​លឿន​។ ភ្លាម​ៗ​នោះ កម្លាំង​នគរបាល​ខាងលើ​បាន​ដេញ​តាម​បណ្ដើរ​ប្រកាស​តាម​វិទ្យុទាក់ទង​បណ្ដើរ​ទៅ​កាន់​គោលដៅ​នានា ហើយ​ជនសង្ស័យ បាន​ព្យាយាម​ជិះ​ម៉ូតូ​គេចខ្លួន​ទៅ​ដល់​ត្រង់​ចំណុច​ភូមិ​ម៉ឺន​រាម ឃុំ​ទួល​ព្រេ​ជ ជនសង្ស័យ​ម្នាក់​ដែល​ជិះ​ម៉ូតូ​របស់​ជន​រង​គ្រោះ ក៏​បាន​ផ្តួល​ម៉ូតូ​ចោល ហើយ​រត់ឡើង​ជិះ​ម៉ូតូ​បក្ខពួក​របស់​ខ្លួន​វិញ ។

នគរបាល​ខាងលើ​បាន​បញ្ជាក់​ប្រាប់​ទៀត​ថា ខណៈនោះ នគរបាល​ប៉ុស្តិ៍​ទួល​ព្រេ​ជ​នៅ​តែ​បន្ត​ដេញ​តាម ចំណែក​កម្លាំង​នគរបាល​ស្រុក​គ្រប់​ផ្នែក រួម​ជាមួយ​កម្លាំង​ប៉ុស្តិ៍​នគរបាល​រដ្ឋបាល​ម្កាក់ ប៉ុស្តិ៍​សំរោង​លើ ប៉ុស្តិ៍​ពើក និង​ប៉ុស្តិ៍​ដំណាក់​អំពិល នៃ​អធិការដ្ឋាន​នគរបាល​ស្រុក​អង្គស្នួល​។ បាន​នាំ​គ្នា​ចេញ​ស្ទាក់​និង​ដេញ​តាម​ដែរ ប៉ុន្តែ​ជនសង្ស័យ​មិន​ព្រម​ឈប់​ឡើយ បាន​ព្យាយាម​ជិះ​រត់​ចូល​ដល់​ទឹកដី​ភូមិ​រោង​ដំរី ឃុំ​ភ្នំ​តូច ស្រុក​សាមគ្គី​មុនី​ជ័យ ខេត្តកំពង់ស្ពឺ​។

បន្ទាប់​មក​ក៏​បាន​ផ្តួល​ម៉ូតូ​ចោល​រួច កម្លាំង​នគរបាល​ខាងលើ​ឃាត់ខ្លួន​បាន​ជនសង្ស័យ​០១​នាក់ ចំណែក​១​នាក់​ទៀត បាន​បន្ត​គេចខ្លួន ហើយ​ក្រោយមក​ដោយ​មានការ​ចូលរួម​សហ​ការណ៍​ជា​ពី​កម្លាំង​នគរបាល​ប៉ុស្តិ៍​ន​ភ្នំ​តូច នៃ​អធិការដ្ឋាន​នគរបាល​ស្រុក​សាមគ្គី​មុនី​ជ័យ ខេត្តកំពង់ស្ពឺ ទើប​ឃាត់ខ្លួន​១​នាក់​ទៀត រួច​នាំ​ខ្លួន​ទៅ​អធិការដ្ឋាន​នគរបាល​ស្រុក​អង្គស្នួល​ចាត់ការ​តាម​ច្បាប់ ៕

អត្ថបទសរសេរ ដោយ