ទីក្រុងវ៉ាស៊ីនតោន៖ លោកបៃដឹនចាប់ផ្ដើមបញ្ចេញសាំង១លានបារ៉ែលពីក្នុងឃ្លាំងដើម្បីត្រៀមទប់ទល់មិនឱ្យសាំងឡើងថ្លៃទៅរួចនៅរដូវក្ដៅឆ្នាំនេះ។ ស្ថានីយប្រេងឥន្ធនៈដែលទទួលបានសាំងពីកន្លែងស្តុកទុកនៅរដ្ឋញូជើស៊ី និងរដ្ឋមេន (New Jersey & Maine) នឹងទទួលបានមួយលើកៗចំនួនមួយសែនបារ៉ែល។ វិធីនេះអាចជួយទប់ស្កាត់ការហក់ឡើងថ្លៃនៃសាំងមុនថ្ងៃឈប់សម្រាកទិវាឯករាជ្យជាតិថ្ងៃទី៤…
ទីក្រុងវ៉ាស៊ីនតោន៖ លោកបៃដឹនចាប់ផ្ដើមបញ្ចេញសាំង១លានបារ៉ែលពីក្នុងឃ្លាំងដើម្បីត្រៀមទប់ទល់មិនឱ្យសាំងឡើងថ្លៃទៅរួចនៅរដូវក្ដៅឆ្នាំនេះ។ ស្ថានីយប្រេងឥន្ធនៈដែលទទួលបានសាំងពីកន្លែងស្តុកទុកនៅរដ្ឋញូជើស៊ី និងរដ្ឋមេន (New Jersey & Maine) នឹងទទួលបានមួយលើកៗចំនួនមួយសែនបារ៉ែល។ វិធីនេះអាចជួយទប់ស្កាត់ការហក់ឡើងថ្លៃនៃសាំងមុនថ្ងៃឈប់សម្រាកទិវាឯករាជ្យជាតិថ្ងៃទី៤ ខែកក្កដាខាងមុខនេះ។ នេះបើយោងតាមការប្រកាសរបស់ក្រសួងថាមពល។
កាលពីថ្ងៃអង្គារ សាំងមួយហ្កាឡុង (gallon) ដែលមានចំណុះ៣,៧៨លីត្រលក់ចេញតម្លៃ៣,៦ដុល្លារនៅទូទាំងប្រទេសអាមេរិក។ មានន័យថាឡើងថ្លៃ៦សេនក្នុងមួយហ្កាឡុងបើប្រៀបធៀបនឹងរយៈពេលដូចគ្នាកាលពីឆ្នាំ២០២៣។ ការបញ្ចេញសាំងសម្រាប់ដាក់លក់ជាវិធីមួយនៅក្នុងចំណោមវិធីមួយចំនួនទៀតដែលប្រធានាធិបតីអាមេរិកអាចធ្វើបានដោយមិនបាច់ឆ្លងកាត់ការអនុញ្ញាតពីស្ថាប័នណាទេ។
ចំណាត់ការនេះក៏អាចជួយបង្កើនប្រជាប្រិយភាពផ្នែកនយោបាយផងដែរនៅពេលរដូវបោះឆ្នោតជិតចូលមកដល់។ លោកបៃដឹនធ្លាប់បញ្ចេញសាំងនៅក្នុងស្តុកយកមកប្រើអស់យ៉ាងសន្ធឹកកាលពីឆ្នាំ២០២២នៅពេលសង្គ្រាមអ៊ុយក្រែនផ្ទុះឡើងភ្លាមៗ។ កាលនោះ គាត់បញ្ចេញសាំងប្រើច្រើនពេកធ្វើឱ្យសាំងបម្រុងនៅសល់តិចបំផុតមិនធ្លាប់មានចាប់តាំងពីទសវត្សទី៨០។ វិធានការរបស់ប្រធានាធិបតីនៅឆ្នាំបោះឆ្នោតនេះជួយធ្វើឱ្យតម្លៃសាំងស្ថិរភាព។
តម្លៃនេះធ្លាប់បានហក់ឡើងខ្ពស់ម្ដងហើយនៅពេលសង្គ្រាមអ៊ុយក្រែនទើបតែផ្ទុះឡើងភ្លាមៗ។ ទោះបីតម្លៃសាំងនៅថេរក៏ដោយ ក៏អ្នកសាធារណរដ្ឋនិយមនៅតែមិនពេញចិត្ត។ ពួកគេត្អូញត្អែរថាលោកបៃដឹនយកបញ្ហាសាំងមកកេងចំណេញផ្នែកនយោបាយ។ ក្រោយមកទៀត លោកបៃដឹនខិតខំបូមប្រេងឆៅមកចម្រាញ់ជាសាំងដើម្បីដាក់បំពេញនៅក្នុងស្តុកឡើងវិញ។ គិតត្រឹមខែមេសា ឆ្នាំ២០២៤នេះ ប្រទេសអាមេរិកមានប្រេងឆៅបម្រុង៣៦៤លានបារ៉ែល។
ឃើញថាចំនួននេះនៅតែតិចជាងប្រេងបម្រុងទុកកាលពីពេលមុនផ្ទុះសង្គ្រាមអ៊ុយក្រែន។ ប៉ុន្តែយ៉ាងហោចណាស់ចំនួនប៉ុណ្ណឹងក៏អាចចាត់ទុកថាគ្រាន់បើដែរព្រោះមានបរិមាណច្រើនជាងគេនៅក្នុងចំណោមប្រេងបម្រុងនៅប្រទេសដទៃទៀតទូទាំងពិភពលោក។ ក្រសួងថាមពលកំណត់ថាអត្រាលក់ចេញនេះតម្រូវឱ្យប្រេងដែលដឹកជញ្ជូនទៅតាមស្ថានីយយ៉ាងយូរបំផុតត្រឹមថ្ងៃទី៣០ ខែមិថុនា។ សូមជម្រាបថាសាំងមួយបារ៉ែលបើគិតតាមរង្វាស់រង្វាល់របស់ប្រទេសអាមេរិកមានចំណុះ១៥៩លីត្រ។ ដូច្នេះ ១លានបារ៉ែលស្មើនឹង១៥៩លានលីត្រ៕
ចែករំលែកព័តមាននេះ