ជំនួប Fury និង Usyk អ្នកឈ្នះបាន៣០លានដុល្លារ អ្នកចាញ់បានដល់១០០លានដុល្លារ
ប្រទេសអារ៉ាប៊ីសាអូឌីត ៖ ការប្រកួតប្រដាល់សកលប្រវត្តិសាស្ត្រដ៏កក្រើកប្រចាំឆ្នាំ ២០២៤ បានបញ្ចប់
ប្រទេសអារ៉ាប៊ីសាអូឌីត ៖ ការប្រកួតប្រដាល់សកលប្រវត្តិសាស្ត្រដ៏កក្រើកប្រចាំឆ្នាំ ២០២៤ បានបញ្ចប់ទៅជាមួយភាពអស្ចារ្យដ៏បំផុត បន្ទាប់ពី Oleksandr Usyk អ្នកប្រដាល់ដ៏ឆ្នើមជនជាតិអ៊ុយក្រែន បានក្លាយជាម្ចាស់ខ្សែក្រវាត់ទម្ងន់ធ្ងន់ពិភពលោក WBC ក្រោយផ្តួលអ្នកលេងកណ្តាប់ដៃដែកចក្រភពអង់គ្លេស Tyson Fury ដោយពិន្ទុមិនឯកច្ឆន្ទ។
ការប្រកួត១២ទឹក ដែលធ្វើឡើងនៅកីឡដ្ឋាន Kingdom Arena មានមូលដ្ឋាននៅទីក្រុងរីយ៉ាដ (Riyadh) ប្រទេសអារ៉ាប៊ីសាអូឌីត កាលពីថ្ងៃទី១៨ ខែឧសភា ឆ្នាំ២០២៤ កន្លងទៅ អ្នកប្រយុទ្ធអ៊ុយក្រែន Usyk បានផ្តល់មេរៀនដ៏មហាឈឺចាប់ដល់ជើងខ្លាំងអង់គ្លេស Fury ឱ្យស្គាល់រសជាតិចាញ់លើកដំបូងក្នុងអាជីពរបស់ខ្លួន ដោយចៅក្រមកាត់សេច្តីបានផ្តល់ឱ្យ Usyk ឈ្នះពិន្ទុមិនឯកច្ឆន្ទ ១១២-១១៥ ១១៤-១១៣ និង ១១៣-១១៤។
តាមរយៈជ័យជម្នះដ៏សំខាន់នេះ Usyk ដែលតែងតែលើកឡើងអំពីកង្វល់ចំពោះក្រុមគ្រួសារ និងប្រជាជាតិអ៊ុយក្រែនរបស់ខ្លួន ដែលស្ថិតនៅក្នុងភ្លើងសង្គ្រាមឈ្លានពានរបស់រុស្ស៊ីនោះ កំពុងកាន់កាប់ខ្សែក្រវាត់ចំនួន ៤ នៅពេលនេះ ក្រោយដណ្តើមបានខ្សែក្រវាត់ទម្ងន់ធ្ងន់ពិភពលោក WBC ពី Fury បន្ថែមពីលើខ្សែក្រវាត់ចំនួន ៣ ដែលខ្លួនកំពុងកាន់កាប់រួមមាន WBA (Super), WBO និង IBF បន្ទាប់ពីឆ្លងកាត់ ២២ប្រកួតកន្លងមក ឈ្នះទាំងអស់ និងផ្តួលគូប្រកួតឱ្យសន្លប់ ១៤ដង។ ចំណែក Fury ស្គាល់បរាជ័យលើកដំបូងក្នុងអាជីព ៣៦ប្រកួតរបស់ខ្លួន ដែលឈ្នះ៣៤ដង ស្មើ១ដងនិងផ្តួលគូប្រកួតឱ្យសន្លប់ ២៤ដង។
យោងតាមប្រភពពីកាសែត Marca និងគេហទំព័រ talkSPORT កាលពីថ្ងៃទី១៩ ខែឧសភា ឆ្នាំ២០២៤ កន្លងទៅ បានឱ្យដឹងថា អ្នកផ្សព្វផ្សាយការប្រកួតជនជាតិអាមេរិក លោក Bob Arum បានបង្ហាញថា Tyson Fury ដែលជាអ្នកចាញ់ទទួលបានប្រាក់ ១០០លានដុល្លារអាមេរិក ខណៈ Oleksandr Usyk ដែលជាអ្នកឈ្នះទទួលបានត្រឹម ៣០លានដុល្លារអាមេរិក ប៉ុណ្ណោះ។
ប៉ុន្តែទោះយ៉ាងណា បើតាមប្រភពពីសារព័ត៌មាន The Mirror ដែលបានស្រង់របាយការណ៍ចេញពីក្រុមហ៊ុនវិនិយោគ Stocklytics បានឱ្យដឹងថា កីឡាករ Fury នឹងបាត់បង់ប្រាក់ច្រើនជាងពាក់កណ្តាលនៃចំនួនទឹកប្រាក់ដែលទទួលបានពីការប្រកួតទល់នឹង Usyk ដោយសារតែច្បាប់ពន្ធរបស់ចក្រភពអង់គ្លេស។
អ្នកប្រដាល់វ័យ៣៥ឆ្នាំរូបនេះ នឹងត្រូវបង្ខំឱ្យបង់ពន្ធលើប្រាក់ចំណូល ៤៦លានផោន ដែលស្មើនឹង ៥៨លានដុល្លារអាមេរិក នៅក្នុងការធានារ៉ាប់រងជាតិ។ អ្នកនាំពាក្យក្រុមហ៊ុន Stocklytics បានពន្យល់ថា មិនខ្វល់ថា អ្នកជានរណានោះទេ ប្រសិនបើអ្នកជាអ្នករស់នៅចក្រភពអង់គ្លេស អ្នកត្រូវតែបង់ពន្ធលើប្រាក់ចំណូលរកបាននៅបរទេស តាមរបៀបដូចគ្នា៕ (រូបភាព ៖ AFP)
ចែករំលែកព័តមាននេះ