(អាមេរិក)៖ ឆ្មាអាយុ៥ឆ្នាំមួយក្បាលដែលមានឈ្មោះថា Max ទទួលបានសញ្ញាបត្របណ្ឌិតកិត្តិយសពីសាកលវិទ្យាល័យ Vermont ក្នុងសហរដ្ឋអាមេរិក សម្រាប់ការជួយដេញចាប់សត្វកណ្តុរ និងផ្តល់ភាពរីករាយ គួរឱ្យស្រលាញ់ ជាឆ្មាល្បីបំផុតសម្រាប់និស្សិតនៅទីនោះ។

រដ្ឋបាលសាកលវិទ្យាល័យ Vermont បានសរសេរនៅលើបណ្តាញសង្គមថា ឆ្មា​នេះមានឈ្មោះពេញថា Max Dow សមាជិកជាទីស្រឡាញ់បំផុតរបស់សាកលវិទ្យាល័យអស់រយៈពេលជាច្រើនឆ្នាំ។

ការប្រកាសអំពីសញ្ញាប័ត្របណ្ឌិតកិត្តិយសរបស់ឆ្មា Max Dow បានបញ្ជាក់យ៉ាងច្បាស់ថា«ដោយមានការយល់ព្រមពីមហាវិទ្យាល័យ និងក្រុមប្រឹក្សាភិបាលនៃសាកលវិទ្យាល័យ Vermont យើងបានសម្រេចចិត្តផ្តល់រង្វាន់ដល់ Max Dow នូវងារជាបណ្ឌិតកិត្តិយស»។

យោងតាមព័ត៌មានចុងក្រោយឆ្មា Max Dow នឹងមិនចូលរួមក្នុងពិធីប្រគល់សញ្ញាបត្របណ្ឌិតរបស់គាត់ទេ។ ដូច្នេះ សាលា​នឹង​ប្រគល់​វា​ទៅ​ឲ្យ​ម្ចាស់​វា គឺ​នាង Ashley Dow។