ឯកឧត្តម វ៉ាត់ ចំរើន កត្តាចម្បង នៃការលេងកីឡា គឺគោរពវិន័យ នាំមកនូវសេចក្ដីថ្លៃថ្នូរ
រាជធានីភ្នំពេញ ៖ ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា បានលើកឡើងថា…
រាជធានីភ្នំពេញ ៖ ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា បានលើកឡើងថា ៖ «សូមរៀន និងចងចាំទាំងអស់គ្នា ហើយត្រូវនិយាយដដែលៗបន្តគ្នាថា កីឡា គឺវិន័យ មុនលេងកីឡាគេស្រែកកីឡា វិន័យ ដោយវិន័យនេះហើយ គឺជាសេចក្តីថ្លៃថ្នូរ ជាទ្រព្យសម្បត្តិ និងជាអ្វីៗគ្រប់យ៉ាងសម្រាប់ជីវិត» ។
នេះជាការលើកឡើងរបស់ឯកឧត្តមរដ្ឋលេខាធិការ នៅក្នុងកិច្ចប្រជុំគណៈកម្មការគ្រប់ផ្នែកជាមួយប្រតិភូកីឡា នៅល្ងាចថ្ងៃទី១៨ ខែឧសភា ឆ្នាំ២០២៤ នៅមជ្ឈមណ្ឌលជាតិ ហ្វឹកហ្វឺនកីឡា នៃការប្រកួតកីឡាឧត្តមសិក្សា និងមធ្យមសិក្សាបច្ចេកទេសថ្នាក់ជាតិ ឆ្នាំ២០២៤ ។
ឯកឧត្តម វ៉ាត់ ចំរើន បានបន្ថែមយ៉ាងដូច្នេះថា ៖ «ដូច្នេះមានន័យថា វិន័យ គឺការគោរពគ្នាទៅវិញទៅមក គោរពពេលវេលា បទបញ្ជា និងការគោរពខ្លួនឯង។ ដើម្បីឱ្យដំណើរការប្រកួតឱ្យបានរលូន ហើយមានកិត្តិយសទាំងអស់គ្នា គឺត្រូវការថែរក្សាឱ្យបាននូវវិន័យ ។ ប្រសិនបើយើងធ្លាប់ចេញទៅប្រកួតហ្គេម នៅក្រៅប្រទេស គឺយើងនឹងដឹងអំពីសារៈសំខាន់នៃការគោរពវិន័យនេះ វាចាំបាច់ប៉ុណ្ណា ដោយចំណុចសំខាន់ទី១នៃវិន័យនេះ គឺការពាក់បណ្ណសម្គាល់ខ្លួន ដែលបង្ហាញអំពីការចូលរួមប្រកួត ឬជាអ្នកបម្រើការ ក្នុងហ្គេមនីមួយៗ។ ក្រៅពីអត្តសញ្ញាណនៃហ្គេម ក៏ការពាក់បណ្ណសម្គាល់ខ្លួនមានសារៈសំខាន់សម្រាប់ផ្នែកសន្តិសុខសណ្តាប់ធ្នាប់ផងដែរ» ។
ជាមួយគ្នានេះ ឯកឧត្តម វ៉ាត់ ចំរើន ក៏បានជំរុញលើកទឹកចិត្តដល់ថ្នាក់ដឹកនាំ ប្រតិភូ លោកគ្រូ អ្នកគ្រូនៅគ្រឹះស្ថានសិក្សា ដែលចូលរួមប្រកួតកីឡាសិស្សឧត្តមសិក្សា និងមធ្យមសិក្សាបច្ចេកទេសថ្នាក់ជាតិជួយជំរុញដល់ការផ្សព្វផ្សាយ ដើម្បីបញ្ចេញព័ត៌មានការប្រកួតពីការចូលរួមប្រកួតរបស់ខ្លួនទៅក្នុងគេហទំព័រ និងបណ្តាញសង្គមរបស់ខ្លួន ជាពិសេសគឺសាកលវិទ្យាល័យ ដែលទទួលបានជ័យលាភីល្អៗ គឺត្រូវតែបង្ហាញពីមោទនភាព ដែលទាំងអស់នេះគឺជាការបង្ហាញពីឧត្តមប្រយោជន៍ សម្រាប់ព្រឹត្តិការណ៍របស់យើង។ ក្នុងការរួមចំណែកផ្សព្វផ្សាយនេះ ឯកឧត្តមស្នើសុំឱ្យផ្សព្វផ្សាយក្នុងរូបភាពវិជ្ជមាន ដែលផ្តល់ប្រយោជន៍ដល់ការអប់រំ និងសង្គមជាតិ ។
តាមការគូសបញ្ជាក់ពីលោក ហួត សេងទ្រី ប្រធាននាយកដ្ឋានរៀបចំ និងគ្រប់គ្រងព្រឹត្តិការណ៍កីឡាបានឱ្យដឹងថា នាយកដ្ឋានចំណុះអគ្គនាយកដ្ឋានកីឡា នៃក្រសួងអប់រំ យុវជន និងកីឡា សហការជាមួយសហព័ន្ធកីឡាជាតិទាំង១៣ រៀបចំ ការប្រកួតកីឡាឧត្តមសិក្សា និងមធ្យមសិក្សាបច្ចេកទេសថ្នាក់ជាតិ ឆ្នាំ២០២៤ ចាប់ពីថ្ងៃទី១៨- ២៧ ខែឧសភា ឆ្នាំ២០២៤ នៅរាជធានីភ្នំពេញ ដែលបានកំណត់យកប្រភេទកីឡា ចំនួន១៣ រួមមាន៖ កីឡាបាល់ទាត់ បាល់ទះ បាល់បោះ អត្តពលកម្ម ប៉េតង់ ហែលទឹក វាយសី វាយកូនឃ្លីលើតុ តេក្វាន់ដូ WT តេក្វាន់ដូ ITF ការ៉ាតេ សីដក់ និងគុនដាវ ស្មើនឹង ១០៣វិញ្ញាសា សរុប ៧១៨ មេដាយ ដែលមានប្រតិភូ គ្រូបង្វឹក កីឡាករ កីឡាការិនីចូលរួមប្រកួតសរុប ១ ៧៦៤ នាក់ ស្រី ៣៩១ នាក់ ដែលអញ្ជើញមកពី ៤៧ គ្រឹះស្ថានឧត្តមសិក្សា ដោយក្នុងនោះមានគ្រឹះស្ថានសិក្សាសាធារណៈ ចំនួន ១៣ និងគ្រឹះស្ថានសិក្សាឯកជនចំនួន ៣៤ ។
ការប្រកួតកីឡាឧត្តមសិក្សា និងមធ្យមសិក្សាបច្ចេកទេសថ្នាក់ជាតិឆ្នាំ២០២៤នេះ មានគោលបំណង ដើម្បីបង្កើតលក្ខខណ្ឌសម្រាប់ការជួបជុំ ការផ្លាស់ប្តូរបទពិសោធន៍ រវាងសាកលវិទ្យាល័យ និងគ្រឹះស្ថានឧត្តមសិក្សា និងមធ្យមសិក្សាបច្ចេកទេស ក្នុងបរិបទដែលនាំមកនូវ វប្បធម៌ ការអប់រំ សកម្មភាពកីឡា បង្កើនភាពសប្បាយរីករាយ និងពង្រឹងកាយសម្បទាមាំមួន។ ការប្រកួតកីឡានេះតម្រូវឱ្យឈរលើស្មារតីទទួលខុសត្រូវ ការគោរពវិន័យ គោរពបទបញ្ជាបច្ចេកទេស ចេះយោគយល់ អធ្យាស្រ័យ ទើបអាចផ្សារភ្ជាប់យ៉ាងជិតស្និទ្ធនូវចំណងមិត្តភាព សាមគ្គីភាព និងភាតរភាព ដែលជាគំរូមួយដ៏ល្អប្រសើរសម្រាប់ប្រទេសជាតិយើង និងជៀសផុតពីអំពើអសកម្មផ្សេងៗនៅក្នុងសង្គម ពិសេសជាងនេះទៀតនោះឱ្យស្របទៅតាមលំនាំនៃការរៀបចំការប្រកួតកីឡាសាកលវិទ្យាល័យមានលក្ខណៈជាហ្គេម (GAMES) ទៅនឹងការប្រកួតកីឡាសាកលវិទ្យាល័យ អាស៊ាន (ASEAN University Games) ទៀតផង៕
ចែករំលែកព័តមាននេះ