ពិតទេ! ផោ.មច្រើន អាចជួយអ្នកស្រកទម្ងន់ ?
បរទេស ៖ ផោម គឺជាឧស្ម័នក្នុងពោះវៀន ដែលជួនកាលត្រូវបានហៅថា ហើមពោះ ឬ Flatulence។
បរទេស ៖ ផោម គឺជាឧស្ម័នក្នុងពោះវៀន ដែលជួនកាលត្រូវបានហៅថា ហើមពោះ ឬ Flatulence។ អ្នកអាចនឹងផោម នៅពេលអ្នកលេបខ្យល់ច្រើនពេលនិយាយ ទំពារ និងលេបអាហារ។ អ្នកក៏អាចផោម ដោយសារតែបាក់តេរីក្នុងពោះវៀនធំ ដែលធ្វើការដើម្បីបំបែកអាហារ។
ជាទូទៅ មនុស្សជាមធ្យមឆ្លងកាត់ការបញ្ចេញឧស្ម័នប្រហែល ២០០មីលីលីត្រក្នុង១ថ្ងៃ តាមរយៈការផោមពី ១០ ទៅ ២៥ដងក្នុង១ថ្ងៃ។ ដោយសារតែកើតឡើងជាញឹកញាប់ អ្នកប្រហែលជាឆ្ងល់ថា តើការផោមមានអត្ថប្រយោជន៍អ្វីខ្លះ? ជាពិសេស តើរាងកាយអ្នកដុតកាឡូរីបន្ថែម តាមរយៈការបណ្តេញជាតិពុលទាំងនោះដែរឬទេ? ពាក់ព័ន្ធជុំវិញបញ្ហានេះ បើយោងតាមរបាយការណ៍ពីគេហទំព័រ Healthline របស់សហរដ្ឋអាមេរិក ចម្លើយដ៏ខ្លីគឺ មិនពិតនោះទេ ។
ការអះអាងតាមប្រព័ន្ធអ៊ីនធឺណេតដ៏ពេញនិយមកន្លងមក បានអះអាងថា ប្រសិនបើអ្នកផោមម្តងស្មើនឹងបានដុតកាឡូរី ៦៧កាឡូរី ហើយការផោម៥២ដងក្នុង១ថ្ងៃនឹងដុតបំផ្លាញជាតិខ្លាញ់ក្នុងខ្លួន១ផោន ដែលស្មើនឹងជិតកន្លះគីឡូក្រាម ពោលគឺ ០.៤៥គីឡូក្រាម។ ប៉ុន្តែការអះអាងនោះត្រូវបានបង្ហាញថា មិនពិតនោះទេ។
បណ្តាអ្នកជំនាញបានគូសបញ្ជាក់ថា ការផោមគឺជាសកម្មភាពអកម្ម ដូច្នេះមិនអាចដុតកាឡូរីបានទេ។ នៅពេលអ្នកផោម សាច់ដុំអ្នកសម្រាក ហើយសម្ពាធនៅក្នុងពោះវៀនរបស់អ្នកនឹងរុញឧស្ម័នចេញដោយមិនបាច់ប្រឹង។ ផ្ទុយពីការដុតកាឡូរី កើតឡើងនៅពេលដែលសាច់ដុំធ្វើការងារធ្ងន់ដូចជា ការហាត់ប្រាណ ជាដើម។
យ៉ាងណាមិញ បណ្តាអ្នកជំនាញបានលើកឡើងថា មធ្យោបាយតែមួយគត់ដែលអាចដុតកាឡូរីតាមរយៈការផោម កើតឡើងនៅពេលអ្នកបង្ខំផោម ឬប្រឹងផោមខ្លាំង ដែលសកម្មភាពនេះ នឹងមិនផ្តល់ផលល្អដល់សុខភាព ឬខុសពីធម្មតា។ ប្រសិនបើអ្នកធ្វើបែបនេះ អ្នកនឹងហត់ ហើយការដុតកាឡូរីទៀតសោតមានចំនួនតិចតួចបំផុតប្រហែល ១ ឬ ២កាឡូរីតែប៉ុណ្ណោះ ដូច្នេះវាមិនគ្រប់គ្រាន់សម្រាប់ការផ្លាស់ប្តូរសុខភាព ឬការសម្រកទម្ងន់អ្នកនោះទេ។
គន្លឹះក្នុងការសម្រកទម្ងន់គឺ ការទទួលទានចំណីអាហារមានកាឡូរីតិច ការធ្វើលំហាត់ប្រាណឱ្យបានច្រើន ដើម្បីដុតបំផ្លាញកាឡូរីបន្ថែម។ នៅពេលអ្នកទទួលទានអាហារសម្រាប់ការសម្រកទម្ងន់ អ្នកគួរជ្រើសរើសអាហារមានកាឡូរីទាប ប៉ុន្តែនៅតែសំខាន់លើអាហារូបត្ថម្ភ ដែលរួមមានដូចជា ផលិតផលស្រស់, គ្រាប់ធញ្ញជាតិ, ប្រូតេអ៊ីនគ្មានខ្លាញ់ និងទឹកដោះគោ។ ជៀសវាងអាហារសម្បូរកាឡូរី ដែលមិនបំពេញ ឬផ្តល់សារធាតុចិញ្ចឹមដល់អ្នកដូចជា បង្អែមផ្អែម និងនំប៉័ងស (White Bread) ។
ម្យ៉ាងវិញទៀត អាហារមានជាតិសរសៃខ្ពស់ (Fiber) ច្រើនតែបំពេញអាហារូបត្ថម្ភបានច្រើន និងមានសុខភាពល្អ ប៉ុន្តែត្រូវដឹងថា ពួកវាអាចបង្កជាឧស្ម័នច្រើន ជាពិសេសប្រសិនបើអ្នកមិនធ្លាប់ទទួលទានអាហារទាំងនោះ។ ដូច្នេះអ្នកជំនាញណែនាំទទួលអាហារជាតិសរសៃ Fiber តិចក្នុងរបបអាហារអ្នក អំឡុងពេលសម្រកទម្ងន់។ ស្ត្រីគួរតែទទួលទានជាតិសរសៃ Fiber ពី ២០-២៥ក្រាមជារៀងរាល់ថ្ងៃ ខណៈបុរសគួរតែទទួលទានពី ៣០-៣៨ក្រាមជារៀងរាល់ថ្ងៃ ដើម្បីស្រកទម្ងន់។
នៅពេលនិយាយអំពីការហាត់ប្រាណ អ្នកគួរតែចំណាយពេលចាប់ពី ៣០នាទី ទៅ១ម៉ោងនៃលំហាត់ប្រាណកម្រិតមធ្យមជារៀងរាល់ថ្ងៃ ដែលរួមបញ្ចូលទាំង ការដើរ រត់លេង ហែលទឹក ធាក់កង់ និងការលើកទម្ងន់។ សកម្មភាពបញ្ចេញញើសតាមរយៈការថែទាំសួន ឬការបោសសម្អាតផ្ទះឱ្យបានញឹកញាប់ ក៏អាចជួយដុតកាឡូរីបានច្រើនផងដែរ។
ចំណុចរសើបមួយទៀតលើកឡើងថា ប្រសិនបើការផោមមិនបានដុតកាឡូរីនោះទេ ហេតុអ្វីបានជាពេលខ្លះយើងមានអារម្មណ៍ថា ស្គម ឬស្រាលខ្លួន បន្ទាប់ពីផោមរួច? ត្រង់ចំណុចនេះ អ្នកជំនាញលើកឡើងថា នោះប្រហែលជាដោយសារតែការផោមជាវិធីល្អក្នុងការកាត់បន្ថយការហើមពោះ ខណៈដែលការហើមពោះអាចបណ្តាលមកពីកត្តាជាច្រើនរួមមាន ៖
ការទទួលទានអាហារមានជាតិខ្លាញ់ ដែលធ្វើឱ្យក្រពះបញ្ចេញចោលយឺត និងអាចធ្វើឱ្យអ្នកមានអារម្មណ៍តឹងពោះ ឬឆ្អល់ពោះ។ ទទួលទានភេសជ្ជៈមានជាតិកាបូន ដែលបញ្ចេញពពុះឧស្ម័នក្នុងក្រពះរបស់អ្នក។ ការទទួលទានអាហារមានជាតិហ្គាស ដូចជាសណ្តែក និងស្ពៃក្តោប ជាដើម ដែលបណ្តាលឱ្យបាក់តេរីក្នុងក្រពះបញ្ចេញឧស្ម័ន។ ការញ៉ាំអាហារលឿនពេក ការផឹកតាមបំពង់បឺត ការទំពារស្ករកៅស៊ូ ឬការជក់បារី ដែលទាំងអស់នេះអាចធ្វើឱ្យអ្នកលេបខ្យល់លើស។ ភាពតានតឹង ឬការថប់បារម្ភ ក៏អាចនាំអោយកើនឡើងឧស្ម័នក្នុងបំពង់រំលាយអាហារផងដែរ ហើយការឆ្លងមេរោគ ឬស្ទះពោះវៀន ដែលអាចបណ្តាលឱ្យបាក់តេរីបញ្ចេញឧស្ម័ន។
សរុបមកវិញ ការផោមគឺជារឿងធម្មតាសម្រាប់មនុស្សលោក ដែលវាអាចធ្វើឱ្យអ្នកមានអារម្មណ៍ធូរពោះ ប្រសិនបើអ្នកកំពុងជួបប្រទះការឡើងឧស្ម័នក្នុងពោះវៀន។ រឿងមួយដែលការផោមមិនអាចជួយបានគឺ ស្រកទម្ងន់ ព្រោះមិនមែនជាសកម្មភាពដែលជួយដុតកាឡូរីបានច្រើននោះទេ។
ប្រសិនបើអ្នកកំពុងស្វែងរកការសម្រកទម្ងន់ ចូរប្រកាន់ខ្ជាប់នូវរបបអាហារដែលមានសុខភាពល្អ និងផែនការហាត់ប្រាណទៀងទាត់ ដូច្នេះអ្នកអាចដុតកាឡូរីបានច្រើនជាងការញ៉ាំ ៕ (ប្រភព ៖ Healthline រូបភាព ៖ DUDE Wipes, New York Post និង Vita4you)
ចែករំលែកព័តមាននេះ