រាជធានីភ្នំពេញ ៖ តារាចម្រៀង និងសម្តែងចាស់វស្សានាង ញឹម ចាន់ថន បានសម្តែងការហួសចិត្ត ត្បិតមានការចោទសួរមកលើរូបនាង ពាក់ព័ន្ធទៅនឹងការទទួលបានមេដាយច្រើនដោយសារមានខ្សែ ។
តារាស្រីរូបនេះបានបញ្ជាក់ថា សម្រាប់មេដាយទាំងអស់ដែលនាងទទួលបាននាពេលនេះ មិនមែនបានមកដោយស្រួលៗនោះឡើយ ពោលគឺនាងបានចូលរួមជួយការងារសង្គម និងសិល្បៈជាបន្តបន្ទាប់ ។
តាមរយៈសំណេរដែលបង្ហោះលើបណ្តាញសង្គម ញឹម ចាន់ថន បានលើកឡើងថា ខ្ញុំមិនចង់អួតទេ តែអ្នកខ្លះគាត់សួរខ្ញុំថា មានខ្សែមែន បានមេដាយច្រើនម្ល៉េះ ចង់សើចតិច ហួសចិត្តតិច ចឹងក៏ចង់ប្រាប់ទៅវិញ ។
នាងបញ្ជាក់ថា មេដាយមិនចេះតែបានងាយៗស្រួលទេ ខ្ញុំទទួលមេដាយក្នុងការងារសង្គមតាំង២០១២ ហើយបានទទួលមេដាយជាច្រើនដែលនាងខ្ញុំលះបង់ជួយកន្លងមក តែខ្ញុំមិនដែលបង្ហាញ។
នាងបន្ថែមថា សម្រាប់ការងារសិល្បៈថ្មីៗនេះ ខ្ញុំទទួលមេដាយ ដែលនាងខ្ញុំបានថតភាពយន្តចំរៀង (ទុក្ខស្រីប្ដីព្រាត់)ដែលជារឿងពិតរបស់សម្ដេចពុក និងសម្ដេចម៉ែ និងចូលសិល្បៈជាង២០ឆ្នាំ ទទួលបានមេដាយ២ដង រួមទាំងលិខិតថ្លែងជាច្រើនទៀត នាងខ្ញុំបង្ហាញហើយ សូមជ្រាបផង ចាសសូមអរគុណ និងក្ដីស្រទ្បាញ់ពីនាងខ្ញុំ (ញឹម ចាន់ថន)។
ជាការកត់សម្គាល់តារាសម្តែង នាង ញឹម ចាន់ថន បានសាងកេរ្តិ៍ឈ្មោះលើវិថីសិល្បៈរហូតមកទល់នាពេលនេះមានរយៈពេលប្រមាណជិត២០រួចមកហើយ ។ នាងគឺជាតារាសម្តែងម្នាក់ថែលល្បីល្បាញខ្លាំងខាងសម្តែងតួអង្គខ្មោច និងតួចប្ញកកាចឆ្នាស់ឆ្នើម ខណៈពេលតារាសម្តែងរូបនេះ ក៏ធ្លាប់ជាតារាសិចស៊ីម្នាក់ក្នុងរង្វង់សិល្បៈ។
ក្រៅពីអាជីពជាតារាសម្តែង ញឹម ចាន់ថន ក៏ជាពិធីការិនី និងកំពុងបម្រើការងារជាបុគ្គលិករបស់ក្រុមហ៊ុនឯកជនក្នុងស្រុកមួយផងដែរ ៕
ចែករំលែកព័តមាននេះ